మళ్లీ ‘సోమవారం పోలవరం’ వచ్చేసింది
గతంలో చంద్రబాబు నాయుడు హయాంలో ఈ నినాదం మారుమోగి పోయింది. ప్రతి వారం దీనిపై సమీక్షించి చరిత్ర సృషించారు.;
ముఖ్యమంత్రి నారా చంద్రబాబు నాయుడు 2014–19 అధికారంలో ఉన్నప్పుడు ప్రతి సోమవారం పోలరం అనే కార్యక్రమానికి శ్రీకారం చుట్టారు. సోమవారం వస్తే చాలు.. పోలవరం సందర్శన కానీ, పోలవరంపై సమీక్షలు కానీ చేపట్టేవారు. పోలవరం ప్రాజెక్టు నిర్మాణానికి పెద్ద ఎత్తున ప్రచారం కల్పించడంలో భాగంగా ప్రత్యేకంగా ఆర్టీసీ బస్సులు పెట్టి మరీ జనాలను తరలించే వారు. పోలవరం సందర్శకులకు రవాణా సౌకర్యాలతో పాటు భోజనాలు కూడా ఉచితంగానే సమకూర్చే వారు. పోలవరం సందర్శించిన సందర్భంలోనే పలువురు మహిళలు తీవ్ర ఉత్సాహానికి గురై ‘జయము జయము చంద్రన్న’ అంటూ పోలవరంలో మహిళా బృందం పాడిన ఓ భజన పాట ఇప్పటికీ ట్రెండ్‌ అవుతూనే ఉంది. తాను చేసిన పనికి ప్రజల్లో ప్రచారం చేసుకొని మార్కెటింగ్‌ చేసుకోవడంలో చంద్రబాబు మార్కు రాజకీయాన్ని ఎవరూ అందుకోలేరు. అయితే ప్రతి సోమవారం పోలవరం చేపట్టినా.. ఆ ఐదేళ్లల్లో పోలవరాన్ని మాత్రం పూర్తి చేయలేక పోయారు.