సినిమా షూటింగ్స్ లో తమ్ముడు... పిఠాపురంలో నాగబాబు హడావుడి...

పవన్ కల్యాణ్ తీస్తున్న రెండు సినిమాలు

పవన్ కల్యాణ్ ప్రస్తుతం రెండు ప్రధాన సినిమాలపై దృష్టి సారించారు. ‘హరిహర వీరమల్లు’, ‘ఓజీ’ (OG). ‘హరిహర వీరమల్లు’ ఒక పీరియడ్ డ్రామా కాగా, ‘ఓజీ’ ఒక యాక్షన్ ఎంటర్‌టైనర్. ఈ రెండు చిత్రాలు పవన్ అభిమానుల్లో భారీ అంచనాలను రేకెత్తిస్తున్నాయి. ‘హరిహర వీరమల్లు’ షూటింగ్ దాదాపు పూర్తి కావచ్చిందని, కొన్ని కీలక సన్నివేశాలు మాత్రమే మిగిలి ఉన్నాయని సమాచారం. ఈ సినిమాను త్వరగా ముగించి రిలీజ్ చేసే దిశగా బృందం కృషి చేస్తోంది.

ఇక ‘ఓజీ’ విషయానికొస్తే, దర్శకుడు సుజీత్ రూపొందిస్తున్న ఈ చిత్రం షూటింగ్ శరవేగంగా సాగుతోంది. ఇప్పటివరకు సినిమాలోని చాలా భాగం చిత్రీకరణ పూర్తయినట్లు తెలుస్తోంది. ‘హంగ్రీ చీతా’ అనే ఫస్ట్ గ్లింప్స్ ఇప్పటికే విడుదలై, అభిమానుల్లో హైప్‌ను పెంచింది. పవన్ రాజకీయ బాధ్యతల మధ్య కూడా ఈ సినిమాకు డేట్స్ కేటాయిస్తూ, దీన్ని వీలైనంత త్వరగా పూర్తి చేయాలని భావిస్తున్నారు. ఈ రెండు సినిమాల తర్వాత పవన్ కొత్త ప్రాజెక్టులను ఒప్పుకోకుండా, పూర్తిగా రాజకీయాలపై దృష్టి పెట్టే అవకాశం ఉందని టాక్.

ఉప ముఖ్యమంత్రిగా పవన్ కల్యాణ్ ప్రారంభ రోజులు

ఉప ముఖ్యమంత్రిగా బాధ్యతలు చేపట్టిన కొత్తలో పవన్ కల్యాణ్ తీరిక లేకుండా గడిపారు. అటవీ శాఖ, పర్యావరణ శాఖలపై ప్రత్యేక దృష్టి సారించి, అధికారులతో అనేక సమీక్షలు నిర్వహించారు. వన్యప్రాణుల రక్షణ, అటవీ సంపద పరిరక్షణ కోసం కొత్త టోల్‌ఫ్రీ నంబర్‌ను ప్రవేశపెట్టడం, అటవీ శాఖలో యాంటీ-పోచింగ్ సెల్‌ను బలోపేతం చేయడం వంటి కీలక నిర్ణయాలు తీసుకున్నారు. ఈ చర్యలు పవన్‌ను ఒక చురుకైన నాయకుడిగా చూపించాయి.

మాజీ మంత్రి, వైఎస్సార్సీపీ సీనియర్ నేత పెద్దిరెడ్డి రామచంద్రారెడ్డి ఎస్టేట్ లో అటవీ భూములు ఉన్నాయని విచారణకు ఆదేశించి సంచలనం సృష్టించారు. అలాగే పల్నాడు జిల్లాలోని జగన్ పవర్ ప్రాజెక్టులో అటవీ భూములు ఉన్నాయని, ఆ భూములు ఆక్రమణకు గురైనట్లు భావించి విచారణకు ఆదేశించి వార్తల కెక్కారు. ఈ రెండు అంశాల్లోనూ కొండను తవ్వి ఎలుకను పట్టినట్లైంది.

అయితే సినిమాలకు ఇచ్చిన కమిట్‌మెంట్స్ ప్రకారం, ప్రస్తుతం ఆయన షూటింగ్‌లలో బిజీగా ఉన్నారు. ఈ విధంగా రాజకీయాలు, సినిమాల మధ్య సమతుల్యం పాటిస్తూ పవన్ ముందుకు సాగుతున్నారు.

పిఠాపురంలో రచ్చ

మరో వైపు పవన్ అన్న నాగబాబు ఎమ్మెల్సీగా బాధ్యతలు చేపట్టిన తర్వాత పిఠాపురం నియోజకవర్గంలో జరిగే అధికారిక కార్యక్రమాల్లో చురుకుగా పాల్గొంటున్నారు. ఈ క్రమంలో తెలుగుదేశం పార్టీ ఇన్‌చార్జ్ వర్మతో సమస్యలు తలెత్తాయి. శనివారం జరిగిన ఒక కార్యక్రమంలో నాగబాబు వర్మను ఆహ్వానించక పోవడంతో రచ్చ మొదలైంది. వర్మ అసంతృప్తితో ఉన్నారు. ఈ వివాదం జనసేన-తెలుగుదేశం మధ్య సమన్వయ సమస్యలను బయటపెట్టింది. పవన్ తన నియోజకవర్గంలో అభివృద్ధిపై దృష్టి పెట్టి, ప్రతి వారం సమీక్షలు చేస్తున్నప్పటికీ, ఈ ఘటన రాజకీయంగా చర్చనీయాంశంగా మారింది.

చంద్రబాబు నిశ్శబ్దం దేనికి సంకేతం?

ఈ పరిణామాలన్నింటినీ ముఖ్యమంత్రి చంద్రబాబు నాయుడు తన రాజకీయ అనుభవంతో గమనిస్తున్నారు. పిఠాపురం ఇష్యూపై ఆయన ఇంతవరకు ఎలాంటి ప్రకటన చేయకపోవడం ఆసక్తికరంగా మారింది. కొందరు దీన్ని చంద్రబాబు వ్యూహాత్మక నిశ్శబ్దంగా భావిస్తుండగా, మరికొందరు జనసేన-తెలుగుదేశం మధ్య సమస్యలను అంతర్గతంగా పరిష్కరించేందుకు ఆయన వేచి చూస్తున్నారని అంటున్నారు. ఏది ఏమైనా ఈ విషయంపై చంద్రబాబు తీరు రాజకీయ వర్గాల్లో చర్చనీయాంశంగా మారింది.

మెగా బ్రదర్స్ సరికొత్త ట్రెండ్

ఒకవైపు పవన్ సినిమా షూటింగ్‌లలో బిజీగా ఉంటే, మరోవైపు నాగబాబు పిఠాపురంలో ఓపెనింగ్స్‌లో హడావిడి చేస్తున్నారు. పరిపాలన, రాజకీయాలు, ఎంటర్‌టైన్‌మెంట్ రంగాల్లోనూ మెగా బ్రదర్స్ ఊపిరి సలపని వేగంతో దూసుకెళ్తున్నారు. ఈ క్రమంలో వారు సృష్టిస్తున్న సరికొత్త రాజకీయ ట్రెండ్‌ను ప్రజలు, రాజకీయ విశ్లేషకులు ఆసక్తిగా గమనిస్తున్నారు. పవన్ సినిమాలను పూర్తి చేసి పూర్తిగా రాజకీయాలపై దృష్టి పెడతారా? పిఠాపురం వివాదం ఎలా సద్దుమణుగుతుంది? చంద్రబాబు నిశ్శబ్దం వెనుక ఉన్న రాజకీయ ఆట ఏమిటి? ఈ ప్రశ్నలకు సమాధానాలు రానున్న రోజుల్లోనే తెలియనున్నాయి!