వైరల్‌గా మారిన పవన్‌ కళ్యాణ్, శ్రీశీ రవిశంకర్ భేటీ ఫొటోలు
సీఎం చంద్రబాబుతో రవిశంకర్ కలిసి దిగిన ఫొటోలు కంటే పవన్‌ కళ్యాణ్‌ని కలిసి దిగిన ఫొటోలు వైరల్‌గా మారాయి.
ఆంధ్రప్రదేశ్ పర్యటనలో ఉన్న ఆర్ట్‌ ఆఫ్‌ లివింగ్‌ వ్యవస్థాపకులు శ్రీశ్రీ రవిశంకర్, జనసేన అధ్యక్షులు, ఆంధ్రప్రదేశ్ ఉప ముఖ్యమంత్రి పవన్‌ కళ్యాణ్‌తో భేటీ అయ్యారు. గురువారం మంగళగిరిలోని పవన్‌ కళ్యాణ్ క్యాంపు కార్యాలయానికి వెళ్లిన రవిశంకర్, పవన్‌ కళ్యాణ్‌ను మర్యాదపూర్వకంగా కలిశారు. సాదరంగా ఆహ్వానించిన పవన్‌ కళ్యాణ్, రవిశంకర్‌ను శాలువా కప్పి ఘనంగా సత్కరించారు. అనంతరం పవన్‌ కళ్యాణ్‌ను సత్కరించిన రవిశంకర్ ఆయనను ఆశీర్వదించారు. అనంతరం వారిద్దరు కొద్ది సేపు ముచ్చరించుకున్నారు. ఇదిలా ఉంటే బుధవారం ఆంధ్రప్రదేశ్ ముఖ్యమంత్రి నారా చంద్రబాబును కలిసిన రవిశంకర్ పలు కార్యక్రమాల్లోను పాల్గొన్నారు. మైనారిటీ హక్కుల పరిరక్షణ సమితి ఆధ్వర్యంలో విజయవాడలో జరిగిన కార్యక్రమంలో ఆయన పాల్గొని ప్రసంగించారు. కులం, మతం, జాతి, వర్గం కంటే మానవత్వం ముఖ్యమైనదని ఆయన మాట్లాడారు. ఈ కార్యక్రమంలో ఏపీ అసెంబ్లీ స్పీకర్‌ చింతకాలయ అయ్యన్నపాత్రుడు, మంత్రి ఎన్‌ఎండీ ఫరూక్‌లు కూడా పాల్గొన్నారు. అనంతరం ఉండవల్లి వెళ్లి సీఎం చంద్రబాబును మర్యాదపూర్వకంగా కలిశారు.
అయితే సీఎం చంద్రబాబుతో రవిశంకర్ కలిసి దిగిన ఫొటోలు కంటే డిప్యూటీ సీఎం పవన్‌ కళ్యాణ్‌ను కలిసి దిగిన ఫొటోలు తాజాగా వైరల్‌గా మారాయి. సనాతన ధర్మం పరిరక్షణ, హిందూత్వ వాదంతో ఉప ముఖ్యమంత్రి పవన్‌ కళ్యాణ్ ఇటీవల ఫేమస్‌ కావడంతో శ్రీశ్రీ రవిశంకర్ కలయిక ఫొటోలు వైరల్‌గా మారాయనే టాక్‌ రాజకీయ వర్గాల్లో వినిపిస్తోంది.