త్యాగాలకు అలవాటు పడ్డ పవన్‌కళ్యాణ్‌

ముందుగా కుదుర్చుకున్న ఒప్పందం ప్రకారం జనసేనకు 24 అసెంబ్లీ, మూడు పార్లమెంట్‌ స్థానాలు టీడీపీ కేటాయించింది. అయితే సుదీర్గ చర్చల్లో బీజేపీ కోసం జనసేన త్యాగం చేయాల్సి వచ్చింది. ఏకంగా రెండు పార్లమెంట్‌ స్థానాలతో పాటు మూడు అసెంబ్లీ సీట్లను బీజేపీకి ఇచ్చింది. బీజేపీ, జనసేనలు రానున్న ఎన్నికల్లో ఎన్ని సీట్లు సాధిస్తాయో చూడాల్సి ఉంది.

పొత్తులు ఖరారయ్యాయి. సీట్ల సర్థుబాటు పూర్తయింది. వెంటనే అభ్యర్థులను ప్రకటించి జగన్‌కు వణుకు పుట్టించాలి. టీడీపీ, బీజేపీ, జనసేన కూటమి దెబ్బకు దిమ్మ తిరగాలి. లేకుంటే వచ్చే ఎన్నికల్లో మనం ఓటర్లను ఆకర్షించలేమని నాయకుల మధ్య ఆసక్తికర చర్చ సాగినట్లు విశ్వసనీయ సమాచారం. చంద్రబాబు నివాసంలో జరిగిన చర్చలో బీజేపీ ముఖ్య నాయకులతో పాటు పవన్‌కళ్యాణ్, బాబులు పాల్గొన్నారు. ఢిల్లీలో మూడు రోజుల పాటు మకాం వేసిన వచ్చిన నేతలు ఎవరికి ఎన్ని సీట్లనేది తేల్చారు. ఎక్కడెక్కడ అనేది కూడా తేల్చారు. వెంటనే అభ్యర్థులను ప్రకటించాలనే నిర్ణయం తీసుకున్నారు.

రానున్న ఎన్నికల్లో తమను ఓటర్లు ఆదరిస్తారనుకుని కొన్ని నియోజకవర్గాల్లో జన సైనికులు ఇప్పటికే ప్రచారం చేసుకుంటున్నారు. వారి ఆశలపై పవన్‌కళ్యాణ్‌ నీళ్లు చల్లారు. 60 అసెంబ్లీ సీట్ల డిమాండ్‌ నుంచి 21 సీట్లకు పరిమితం అయ్యారు. ఇది జనసేన నాయకుల్లో అసంతృప్తికి దారి తీసింది. మొదట 24 అసెంబ్లీ సీట్లు తీసుకున్న జనసేన ఎలాగైనా మరో ఆరు సీట్లు సంపాదించి 30 అసెంబ్లీ స్థానాల్లో పోటీ చేస్తుందని జన సైనికులు భావించారు. అయితే వారి ఆశలు నెరవేరలేదు. ఎవరైనా నిరసన గళం వినిపిస్తే బయటకు పంపిస్థానని ఇప్పటికే జనసేన అధినేత ప్రకటించారు. దీంతో దిక్కుతోచని స్థితిలో జనసైనికులు ఉన్నారు.