పిఠాపురంలోనే పవన్ కల్యాణ్ బస..

జనసేన అధినేత పవన్ కల్యాణ్ ప్రస్తుతం ఎన్నికల ప్రచారంలో బిజీబిజీగా ఉన్నారు. పిఠాపురంలో తనను గెలిపించాలంటూ ప్రజల మధ్యకు వెళ్తున్నారు. వారాహి విజయయాత్ర పేరిట జోరుగా ప్రచారం చేస్తున్న పవన్ కల్యాణ్.. ఈ ప్రచార సమయమంతా పిఠాపురంలోనే బస చేయనున్నారు. అందుకోసం ఇప్పటికే వెతుకులాట కూడా మొదలైంది. అయితే పవన్ కోసం చేబ్రోలులో నివాసం వెతుకుతున్నట్లు పార్టీ వర్గాలు చెప్పాయి. ఇందులో భాగంగానే ఇప్పటికే ఒక నివాసాన్ని కూడా ఎంపిక చేశామని, పిఠాపురంలో సొంతింటి నిర్మాణం పూర్తయ్యే వరకు అక్కడే ఉండాలని పవన్ నిర్ణయించుకున్నారని ఆయన అనుచరులు తెలిపారు. అందుకోసం చేబ్రోలు బైపాస్‌రోడ్డు పక్కన ఉన్న తన పంటపొలాల్లో రైతు ఓదూరి నాగేశ్వరరావు ఓ భవనాన్ని నిర్మించుకున్నారు. ఈ ఇంటికే పవన్ కల్యాణ్ బస చేయడానికి ఎంపిక చేశారు. ఇక్కడి నుంచే పవన్ కల్యాణ్ తన పార్టీ కార్యకలాపాలను కూడా సాంగించనున్నారు. అన్నిటికీ వీలుగా ఉండటంతోనే ఈ ఇంటిని ఖరారు చేశారని సమాచారం.