ఆ అమ్మాయిని చంపి అతడు రైలు కింద పడ్డాడు!

ప్రేమన్నాడు.. ఆ పిల్ల గొంతుకోశాడు..

నాన్నా, నువ్వంటే ఇష్టమన్నాడు, రైలు పట్టాల మీద తలపెట్టాడు..

ప్రేమించిన వాళ్ల కోసం బతకాల్సిన ఓ యువకుడు క్షణికావేశంలో బతకుబుగ్గి పాల్జేసుకోవడంతో పాటు కన్నవాళ్లకు కడుపుకోత మిగిల్చాడు. ఇంతటి దారుణ సంఘటన కాకినాడ జిల్లా సామర్లకోట మండలంలో జరిగింది.

ఆ అమ్మాయి, అబ్బాయిది గొల్లప్రోలు మండలం దుర్గాడ గ్రామం. ఒకే ఊరు కావడంతో చాలా కాలంగా పరిచయం ఉంది. ఆ అమ్మాయి పేరు దీప్తి. ఇంటర్ చదువుతోంది. అతని పేరు అశోక్. పాలిటెక్నిక్ చదివాడు. చెన్నైలో ఓ ప్రైవేటు కంపెనీలో పని చేస్తున్నాడు. వీరిద్దరి మధ్య ప్రేమ వ్యవహారం ఉన్నట్టు తెలుస్తోంది.

పనసపాడు సుబ్రహ్మణ్యేశ్వర స్వామి ఆలయ సమీపంలోని గాడేరు కాలువగట్టుపై జి.దీప్తి అనే 17 ఏళ్ల ఇంటర్‌ విద్యార్థిని శవం కనిపించడంతో పోలీసులు రంగంలోకి దిగారు. అదే సమయంలో హుస్సేన్‌పురం రైల్వే ట్రాక్‌పై గుండుతో ఉన్న కొమ్మూరి అశోక్‌ (19) మృతదేహం గుర్తించారు. బాలిక చనిపోయినచోట లభ్యమైన టోపీ ఆధారంగా అతనే హత్య చేసి.. ఆ తర్వాత ఆత్మహత్య చేసుకుని ఉంటాడని ప్రాథమికంగా తేల్చి దర్యాప్తు వేగవంతం చేశారు. రైల్వే పట్టాల సమీపంలో లభ్యమైన ద్విచక్రవాహనం నంబర్‌ ఆధారంగా మృతుడు, బాలిక గొల్లప్రోలు మండలంలోని దుర్గాడ గ్రామానికి చెందినవారని తేలింది. ఫోన్ కాల్‌డేటా విశ్లేషిస్తున్నారు.

ఆ బాలికను 9వ తరగతి నుంచి ప్రేమిస్తున్నానని వెంటపడటంతో ఆమె కుటుంబసభ్యులు కూడా గతంలో హెచ్చరించారు. అయితే ఇద్దరికీ సెల్‌ఫోన్‌లో పరిచయం కొనసాగుతున్నట్టు తెలుస్తోంది.