High alert Zones | ఆధ్యాత్మిక నగరాలపై నిఘా సంస్థల డేగ కన్ను

కేంద్ర నిఘా సంస్థల హెచ్చరికల నేపథ్యంలో ప్రధాన ఆధ్యాత్మిక కేంద్రాలు, నగరాల్లో హై అలర్ట్ ప్రకటించారు. రెండు తెలుగు రాష్ట్రాల్లోని 14 ప్రదేశాలను అత్యంత సున్నితమైన హై అలర్ట్ జోన్లు ( High alert zones )గా ప్రకటించినట్లు పోలీసు వర్గాల తెలిపిన సమాచారం. అందులో తిరుపతితో పాటు తిరుమల క్షేత్రాలు అంతర్జాతీయ విమానాశ్రయాలు పొరుగు రాష్ట్రాల నుంచి రవాణా సదుపాయం ఉన్న బస్టాండ్లను కూడా ఆ జోన్ పరిధిలో చేర్చాయి.

ప్రధాన ఆధ్యాత్మిక కేంద్రం తిరుమల తోపాటు అలిపిరిలో కూడా అక్టోపస్ దళాలు రంగంలోకి దిగాయి. అనుబంధ ఆలయాలతో పాటు శ్రీకాళహస్తి, కాణిపాకం, విజయవాడ కనకదుర్గమ్మ ఆలయం, రేణిగుంట విమానాశ్రయం, శ్రీహరికోట సతీష్ ధావన్ అంతరిక్ష ప్రయోగ కేంద్రంతో పాటు అంతర్జాయ విమానాశ్రయాల్లో కూడా స్పెషల్ ప్రొటెక్షన్ ఫోర్స్ (Special Protection Force SPF), కేంద్ర పారిశ్రామిక భద్రతా దళం (Central Industrial Security Force CISF) తోపాటు నిఘా వర్గాలు కూడా మరింత అప్రమత్తం అయ్యాయి.

ప్రయాణాలు చేయడానికో.. దర్శన సదుపాయం, అవసరం అయితే మినహా ఆ ప్రాంతాలకు వెళ్లకుండా కూడా భద్రతా సంస్థలు ప్రజలకు సూచిస్తున్నాయి. తనిఖీల సమయంలో అవసరమైన పత్రాలు చూపించడానికి కూడా సిద్ధంగా ఉండాలనే సూచనలు చేస్తున్నారు.

తిరుమలకు వెళ్లే సమయంలో యాత్రికులపై సందేహాలు ఉంటే, వెంటనే పోలీసులకు సమాచారం అందించాలని ట్యాక్సీ డ్రైవర్లకు తిరుపతి పోలీసులు ప్రత్యేక సూచనలు చేశారు.

రాష్ట్రంలోనే కాకుండా, తెలంగాణలో కూడా కొన్ని సున్నితమైన ప్రదేశాలను కేంద్ర నిఘా సంస్థలు గుర్తించాయి. గతంలో జరిగిన సంఘటనల ఆధారంగా ఉగ్రవాదుల కదలికలు, వారి సానుభూతిపరులు ఉంటారనే సందేహంతో రెండు తెలుగు రాష్ట్రాల్లోని భద్రతా సంస్థలు, గూఢచారవర్గాలను మరింత అప్రమత్తం చేసినట్లు సమాచారం. దీంతో ఈ ప్రాంతాల్లో రాష్ట్రానికి చెందిన సివిల్ పోలీసులతో పాటు నిఘా సిబ్బంది రేయింబవళ్లు నిఘా నేత్రాలు ఉంచారని తిరుపతిలోని ఓ పోలీస్ అధికారి చెప్పారు.

విశాఖపట్నం: రైల్వే స్టేషన్

రామకృష్ణ బీచ్

జగదాంబ జంక్షన్

విజయవాడ : రైల్వే స్టేషన్

పండిట్ నెహ్రూ బస్ స్టేషన్

ఎం.జి. రోడ్

హైదరాబాద్ : సికింద్రాబాద్ రైల్వే స్టేషన్

కూకట్‌పల్లి, నాంపల్లి

రాజీవ్ గాంధీ అంతర్జాతీయ విమానాశ్రయం

మహాత్మా గాంధీ బస్ స్టేషన్

ట్యాంక్ బండ్ ప్రాంతాల్లో స్థానిక పోలీసు యంత్రాంగంతో పాటు కేంద్ర నిఘా వర్గాలు కూడా దృష్టి నిలిపాయి. దీనికి కారణం కూడా లేకపోలేదు.

కర్నూలు జిల్లాలో జిల్లా అంతటా ఏక కాలంలో తనిఖీలు కొనసాగించారు. ఎస్పీ విక్రాంత్ పాటిల్ ఆదేశాల తో శనివారం రాత్రి జిల్లాలో దేవాలయాలు, బస్టాండ్‌లు, రైల్వే స్టేషన్‌లు, లాడ్జిలు తదితర ప్రదేశాలలో ప్రత్యేక తనిఖీలు నిర్వహించారు. సరిహద్దుల్లో, చెక్ పోస్టులలో ఆయా పోలీసులతో పాటు బాంబు స్క్వాడ్, డాగ్ స్క్వాడ్, ప్రత్యేక పోలీసు బృందాలతో తనిఖీ చేశారు.

దేశంలో ఎక్కడ ఉగ్రదాడులు జరిగినా అటు హైదరాబాద్, ఏపీలో చిత్తూరు జిల్లా మదనపల్లె ప్రాంతంలో లింకులు బయటపడిన సందర్బాలు అనేకం ఉన్నాయి. అటు కర్ణాటక, ఇటు తమిళనాడుకు సమీపంలో ఉన్న చిత్తూరు జిల్లాల్లోని పట్టణాల్లో తీవ్రవాదులు స్లీపర్ సెల్స్ గా ఆశ్రయం పొందిన సంఘటనలు వెలుగు చూసిన సంఘటనలతో ఈ ప్రాంత పోలీసు వర్గాలు ఉలిక్కిపడ్డాయి.

చిత్తూరు జిల్లాలోని పుత్తూరు పట్టణం గేటు పుత్తూరు ప్రాంతంలోని మేదరవీధిలో బిలాల్, ఇస్మాయిల్ కుటుంబంతో సహా జీవనం సాగించారు. వారిద్దరు సిమి తీవ్రవాదులు. ఏడాదిపాటు తమిళనాడుకు చెందిన ఇద్దరు తీవ్రవాదులు, పాత్రలు విక్రయిస్తూ, సాధారణ పౌరుల్లా జీవనం సాగిస్తూ, రహస్యంగా ఆపరేషన్ నిర్వహించడానికి పథకం సిద్ధం చేసుకుంటున్నారు. అదే సమయంలో తమిళనాడులోని నిఘా వర్గాలకు ఈ సమాచారం అందింది. వెంటనే చెన్నై నుంచి వచ్చిన అక్టోపస్ కమండోలు రంగంలోకి దిగారు. పిల్లలను అడ్డుగా ఉంచి, తప్పించుకోవాలనే వారి ఎత్తులను చిత్తు చేస్తూ, రక్తపాతానికి ఆస్కారం లేకుండా, టియర్ గ్యాస్ ప్రయోగించడం ద్వారా ఆ ఇద్దరు తీవ్రవాదులను అదుపులోకి తీసుకున్నారు.

"తిరుమలలో బ్రహ్మోత్సవాల వేళ మారణహోమం సృష్టించాలి" అనే ఆ తీవ్రవాదుల వ్యూహాన్ని నిఘా సంస్థలు విచ్ఛిన్నం చేశాయి. ఇదిలావుంటే..

ప్రేమలో పడిన మరో కాశ్మీర్ ప్రాంతానికి తీవ్రవాది మదనపల్లెలో పట్టుబడిన సంఘటన కూడా జిల్లాలో సంచలనం రేకెత్తించింది. పెద్దతిప్పసముద్రం (పీటీఎం) మండలం మల్లెల గ్రామానికి చెందిన ఓ ముస్లిం యువతి కాశ్మీర్ వెళ్లింది. అక్కడ మహ్మద్ ఖురేషీ అనే యువకుడితో ప్రేమలో పడింది. దాదాపు ఇది లవ్ జీహాదీగా భావించారు. ఆ యువతిని ప్రేమైకంలో ముంచెత్తిన ఖురేషీ కలిసి జీవించాలని నమ్మించాడు. కొన్నాళ్లకు ఆ యువతి మదనపల్లెకు తిరిగి వచ్చింది. కొన్నాళ్లకు ఖరేషీ కూడా పెట్టే బేడ, సర్దుకుని మదనపల్లెకు చేరుకున్నాడు. తల్లిదండ్రులకు తెలియకుండా ఆ యువతి ఖురేషీకి మదనపల్లె పట్టణానికి సమీపంలోని కుర్రవంక వద్ద ఓ గది అద్దెకు తీసుకుని ఆనందంగా గడుపుతుండగా, కేంద్ర నిఘా సంస్థల సమాచారంతో మదనపల్లె పోలీసులు అప్రమత్తం అయ్యారు. అనుమానాస్పద ప్రాంతాల్లో కార్డన్ సెర్చ్ సాగిస్తుండగా, ఖురేషీ పట్టుబడ్డాడు. అతని నుంచి మందుగుండు సామగ్రి, ఆయుధాలు కూడా స్వాధీనం చేసుకున్న నేపథ్యంలో జిల్లా మరోసారి ఉలిక్కిపడింది.

పట్టుబడిన బురేషీ కాశ్మీర్ ప్రాంతంలో వాటెంటెడ్ జాబితాలో ఉన్నట్లు పోలీసులు కూడా గుర్తించారు. తీవ్రవాది ఖురేషీని అరెస్టు చేసి, రిమాండ్కు పంపించారు. దాదాపు ఏడాది పాటు మదనపల్లె సబ్ జైలు, ఆ తరువాత కడప కేంద్ర కారాగారానికి బదిలీ చేయించుకోవడంలో ఖురేషీ దరఖాస్తులపై దరఖాస్తులు చేసుకోవడం ద్వారా జైళ్లు మార్పించుకుంటూ, కాశ్మీర్ జైలుకు తరలించుకునేలా చేసుకున్నట్లు సమాచారం.

మొత్తానికి పహల్ గావ్ అమానవీయ ఘటన నేపథ్యంలో కేంద్రంతో పాటు రాష్ట్ర పోలీసు, నిఘా వర్గాలు కూడా మరింత అప్రమత్తంగా వ్యవహరిస్తున్నాయి. అలిపిరి చెక్ పాయింట్ వద్ద తనిఖీలు ముమ్మరం చేశాయి.