Annamayya | మెట్లోత్సవంలో అన్నమయ్య కీర్తనలతో పులకించిన తిరుమల కొండలు

తిరుమల మెట్లోత్సవం సందర్భంగా మంగళవారం మధ్యాహ్నం ఈ కార్యక్రమం కనువిందుగా సాగింది. అలిపిరి పాదాల మండపం నుంచి ప్రారంభమయ్యే మెట్ల వద్ద శ్రీదేవి, భూదేవి సమేత శ్రీవేంకటేశ్వరస్వామి విగ్రహాలను ఆశీనులను చేశారు. పూజకార్యక్రమాలు నిర్వహించారు. అన్నమాచార్య వంశస్తుడు తాళ్లపాక హరి నారాయణాచార్యులు స్వామివారి విగ్రహాలకు ప్రత్యేక పూజలు అందించి, అన్నమయ్య కీర్తనలతో స్తుతించారు.

అలిపిరి మెట్ల వద్ద పూజలు చేసే సమయంలో కళాకారులు ప్రదర్శించిన సాంస్కృతిక కార్యక్రమాలు ఆకట్టుకున్నాయి. ఆయనతో పాటు ఇంకొందరు కూడా అన్నమయ్య ప్రతిమలను ఎత్తుకుని శ్రీవారిని కీర్తిస్తూ, తిరుమలకు పాదయాత్ర సాగించారు. రాజగోపురం నుంచి మెట్టమీదుగా సాగిన యాత్రలో చదునైన ప్రదేశం వద్ద కళాకారులు ఆలపించిన కీర్తనలు, ప్రదర్శనలు శ్రీవారిని అన్నచార్యుడు స్తుతించిన ఘట్టాలను ఆవిష్కరించారు.

అంతకుముందు అలిపిరి పాదాల మండపం వద్ద స్వామి విగ్రహాలకు పూజల అనంతరం అన్న‌మాచార్య ప్రాజెక్టు సంచాల‌కులు రాజ‌గోపాల‌రావు మాట్లాడారు. పూర్వం కాలం నుంచి ఎందరో మహనీయులు మెట్లమార్గంలో తిరుమలకు నడిచివెళ్లిన చరిత్రను వివరించారు. వసతి, సదుపాయాలు అంతంతమాత్రంగానే ఉన్న రోజుల్లో అడవిలో నడకతో వెళ్లిన యాత్రికులు, స్వామివారిని కీర్తించిన ఘట్టాలను వివరించారు. ఇలాంటి మెట్లోత్సవంలో పాల్గొనడం ఎంతో పుణ్యఫలం అని ఆయన అన్నారు. అన్నమాచార్యులు, శ్రీకృష్ణదేవరాయలు లాంటి మహనీయులు భక్తి ప్రపత్తులతో తిరుమల కొండలను అధిరోహింారన్నారు. శ్రీవారి వైభవాన్ని దశదిశలా వ్యాప్తి చేశారని వివరించారు. అలాంటివారి అడుగుజాడలలో నడిచి ఆ దేవదేవుని కృపకు అందరూ పాత్రులు కావాలనే తలంపుతో టీటీడీ మెట్లోత్సవాన్ని నిర్వహిస్తోందని తెలిపారు.

కార్యక్రమంలో టీటీడీ (TTD) దాస సాహిత్య ప్రాజెక్టు (Dasa Sahitya Project ) ప్రత్యేక అధికారి ఆనంద తీర్థాచార్యులు, అన్న‌మాచార్య ప్రాజెక్టు (Annamaacharya Project ) క‌ళాకారులు, దాదాపు 700 మందికిపైగా భజన మండళ్ల సభ్యులు భజనలు చేసుకుంటూ తిరుమలకు చేరుకున్నారు.