బైజూస్‌పై జగన్‌కు ఎంత ప్రేమో

రెండేళ్లల్లో 9,52,925 ట్యాబ్‌లను ఏపీ ప్రభుత్వం కొనుగోలు చేసింది. గతేడాది 5,18,745, ఈ ఏడాది 4,34,185 చొప్పున ట్యాబులు కొనుగోలు చేసినట్లు గణాంకాలు వెల్లడిస్తున్నాయి. గతేడాది శ్యాంసంగ్‌ ఎ7 అనే మోడల్‌ ట్యాబు అమెజాన్‌ వెబ్‌సైట్‌లో కంపెనీనే రూ.11,999లకు అమ్ముతుంటే, రాష్ట్ర ప్రభుత్వం రూ.13,262లకు కొనుగోలు చేసింది. మార్కెట్లో హౌల్‌సెల్‌ ధర రూ.9వేలు మాత్రమే ఉంది. ఒక్కొ ట్యాబ్‌ను అదనంగా రూ.4వేలకు కొనుగోలు చేసినట్లు స్పష్టమైంది. ఈ ఏడాది ఈసర్‌ 1 మోడల్‌ ట్యాబును రూ.17,500లకు కొనుగోలు చేశారు. మార్కెట్‌లో ఇది రూ.14వేలకు మించి లేదు. çహోల్‌సేల్‌లో రూ.12వేలే ఉంటుంది. ట్యాబుల కొనుగోళ్లల్లో రూ.250కోట్లకు పైగా కుంభకోణం జరిగినట్లు ఆరోపణలు వచ్చాయి.

ప్రతి ట్యాబ్‌కు బైజూస్‌ కంటెంట్‌కు లైసెన్స్‌ కింద రూ.15,500లు ఇచ్చారు. ఇది రూ. 5వేల కంటే మించే అవకాశం లేదు. 8వ తరగతి విద్యార్థికి ఇచ్చిన కంటెంట్‌ వచ్చే ఏడాదికి ఉపయోగపడే అవకాశం లేదు. బైజూస్‌ మూతపడితే కంటెంట్‌ మొత్తాన్ని మార్చాల్సి ఉంటుంది. ఇప్పటికే ఈ కంపెనీ దివాళా తీసే స్థితిలో ఉంది. మోసాలకు పాల్పడి అప్పులపాలై ఫారెన్‌ ఎక్సె్చంజ్‌ కుంభకోణంలో విచారణను ఎదుర్కొంటున్నది. 20వేల మంది సిబ్బంది కంపెనీలో ఉంటే 12వేల మందిని తొలగించింది. ముగ్గురు డైరెక్టర్లు రాజీనామ చేశారు.

ఈ విషయాలపై సీపీఎం రాష్ట్ర కార్యదర్శి వి శ్రీనివాసరావు సోమవారం విజయవాడలో విలేకరులతో మాట్లాడారు. ఆయన మాటల్లోనే.. ట్యాబుల కొనుగోలు, కంటెంట్‌ కొనుగోలు విషయంలో భారీ కుంభకోణం చోటు చేసుకుంది. దీనిపై లోతైన విచారణ జరిపిందచాల్సిన అవసరం వుంది. ప్రభుత్వ నిధులు ఈ విధంగా దుర్వినియోగం అయ్యాయి. ఈ నిధులు ఎవరి జేబుల్లోకి వెళ్లాయో విచారణ జరిపితే తేలుతుంది. కొనుగోలు ధరలు కళ్లకు కనిపిస్తుంటే ఇంతకంటే ఆధారం ఏమి కావాలి. రూ. 1,250 కోట్ల ప్రజా ధనం దోపిడీకి గురైంది.