కిలో ఉల్లికి రూపాయి కూడా ఇవ్వరా? రోడ్డెక్కిన రైతులు

ఆంధ్రప్రదేశ్ లో ఉల్లి రైతు కంట కన్నీరు వొలుకుతోంది. కర్నూలు, నంద్యాల, అనంతపురం, కడప జిల్లాల్లో విస్తారంగా సాగు చేసిన ఉల్లి పంట ఇప్పుడు రైతుల గుండెల్లో మంట రేపుతోంది. ధరలు దారుణంగా పడిపోవడానికి తోడు వ్యాపారులు సిండికేట్ కావడంతో ఈ పరిస్థితి ఏర్పడింది. నిన్న మొన్నటి వరకు క్వింటాల్ ఉల్లి 4 నుంచి 5 వేల రూపాయల వరకు పలికితే ఇప్పుడది అమాంతం రూ.100 పడిపోయింది. పోనీ ఆ ధరకైనా అమ్ముకుందామా అంటే సిండికేట్ అయిన వ్యాపారులు ముందుకు రావడం లేదని రైతులు ఆరోపిస్తున్నారు. కర్నూలు మార్కెట్లోనైతే రైతులు రోడ్డెక్కి ఆందోళనలు కూడా చేశారు.

ఆంధ్రప్రదేశ్ లో సుమారు 38.32 వేల హెక్టార్లలో ఉల్లి సాగవుతుంది. అంటే దాదాపు లక్ష ఎకరాలు . 5.13 లక్షల టన్నులు (టన్ను అంటే 10 క్వింటాళ్లు) దిగుబడి వస్తుందని అంచనా. నిజానికి 2023లో 9.56 లక్షల టన్నుల వచ్చింది. ఇప్పుడది పడిపోయింది. 5.13 లక్ష టన్నుల దిగుబడి అంటే హెక్టార్ కి 13.4 టన్నులు. అంటే హెక్టార్ కి 134 క్వింటాళ్లు.

ఉత్పత్తి అంతకన్నా తక్కువగానే ఉన్నా రైతులకు మాత్రం గిట్టుబాటు ధర రావడం లేదు.

గత ఏడాది కర్నూలు మార్కెట్‌లో క్వింటాలుకు ₹2,500–₹3,000 మధ్య ఉంది. అదే గిరాకీ ఉన్న సమయంలోనైతే క్వింటాల్ ఉల్లి రూ.5,000 వరకు పలికిన సందర్భమూ లేకపోలేదు.

కానీ ఈ ఏడాది సీజన్ మొదట్లోనే ధరలు లేకుండా పోయాయి. బయటి మార్కెట్ లో కిలో ఉల్లి రూ.25,30 విక్రయిస్తున్నా రైతుకు మాత్రం రూ.1 ఇవ్వడానికీ వ్యాపారులు ఇష్టపడడం లేదు. ఎకరా ఉల్లి సాగుకి రూ.1.20 లక్ష ఖర్చు పెడుతుంటే చేతికి వచ్చేది అందులో నాలుగో వంతు కూడా లేకపోవడం గమనార్హం.

రైతుల ఆవేదన ఇలా...

వారం రోజులుగా మార్కెట్‌లో పంటను తెచ్చిపెట్టామని, వ్యాపారులు, దళారులు నామమాత్రపు రేటు చెబుతున్నారని, కొనేవారు లేక రోజుల తరబడి మార్కెట్‌లోనే పడిగాపులు కాస్తున్నామంటూ రైతులు ఆవేదన వ్యక్తం చేస్తున్నారు. రైతులకు వైసీపీ మద్దతుగా నిలిచింది.

రైతులు చెబుతున్న లెక్కల ప్రకారం...

ఎకరాకు సగటు పెట్టుబడి: ₹1.20 లక్షలు (విత్తనం, ఎరువులు, కూలి, రవాణా).

ఎకరాకు సగటు దిగుబడి: 100 క్వింటాళ్లు.

గతంలో నాణ్యమైన పంట క్వింటా ధర ₹3,000–₹5,000,

తక్కువ నాణ్యత క్వింటా కూడా కనీసం ₹1,800–₹2,000 పలికేది.

కానీ ఈ సీజన్‌లో వ్యాపారులు క్వింటాకు ₹100 కూడా ఇవ్వడం లేదు.

ఇలా, రైతు లక్షకు పైబడి పెట్టుబడి పెట్టినా ఫలితం లేకుండా పోతోంది. దీంతో వారం రోజులుగా రైతులు మార్కెట్ యార్డుల వద్ద ఆందోళన చేస్తున్నారు.

“పంటను తెచ్చిపెట్టాం, కానీ వ్యాపారులు నామమాత్రపు రేటే చెబుతున్నారు. రోజులు గడుస్తున్నా అమ్మకాలు లేవు. అప్పులు చేసి సాగు చేశాం. ఇక ఆత్మహత్యే దారి అనిపిస్తోంది” అని నంద్యాలకు చెందిన రైతు రామచంద్రయ్య వాపోయాడు.

మార్కెట్‌లో ట్రేడర్లు, దళారులు సిండికేట్ గా ఏర్పడి సిండికేట్‌గా వ్యవహరిస్తున్నారని రైతులు ఆరోపిస్తున్నారు. బయట మార్కెట్‌లో ఉల్లిపాయ కిలో ధర ₹30 పలుకుతుండగా, రైతుల వద్ద నుంచి మాత్రం క్వింటాకు ₹100కే కొనుగోలు చేస్తున్నారు.

కర్నూలు మార్కెట్ యార్డ్‌ను సందర్శించిన వైఎస్సార్‌సీపీ జిల్లా అధ్యక్షుడు ఎస్వీ మోహన్‌రెడ్డి మాట్లాడుతూ – “ఉల్లి పంటకు కనీస మద్దతు ధర కల్పించడంలో చంద్రబాబు నేతృత్వంలోని కూటమి సర్కార్ ఘోరంగా విఫలమైంది. గతంలో వైఎస్ జగన్ సీఎం‌గా ఉన్నప్పుడు గిట్టుబాటు ధరకు పంట కొనుగోలు జరిగేది. కానీ ఇప్పుడు రైతుల గోడు వినేవారు లేరు” అని అన్నారు.

ఆంధ్రప్రదేశ్‌లో ఉల్లి రైతుల కష్టం కేవలం ఆర్థిక సమస్య కాదు, అది ఒక సామాజిక–రాజకీయ సంక్షోభం. పెట్టుబడి–దిగుబడి మధ్య వ్యత్యాసం భయంకరంగా పెరగడంతో రైతులు లక్షల్లో నష్టపోతున్నారు. ఈ పరిస్థితిలో ప్రభుత్వం తక్షణమే కనీస మద్దతు ధర ప్రకటించి కొనుగోలు చేయకపోతే, రైతుల ఆత్మహత్యల ఊపిరి గాలిలోనే వినిపిస్తోందని ఆంధ్రప్రదేశ్ రైతు సంఘం ప్రధాన కార్యదర్శి కేవీవీ ప్రసాద్ అన్నారు.