అమరావతికి అన్ని వైపుల నుంచి కనెక్టివిటీ

రాజధాని అమరావతిని రాష్ట్రంలోని ఇతర ప్రాంతాలు, ఇతర రాష్ట్రాలతో అనుసంధానించే పలు రహదారుల ప్రాజెక్టులకు కేంద్ర ప్రభుత్వం ప్రాథమికంగా ఆమోదం తెలిపింది. వాటిలో 189 కిలోమీటర్ల పొడవైన అమరావతి ఔటర్‌ రింగ్‌రోడ్డు (ఓఆర్‌ఆర్‌) సహా ముఖ్యమైన ప్రాజెక్టులు ఉన్నాయి. ఇవన్నీ 2014–19 మధ్య తెలుగుదేశం పార్టీ ప్రభుత్వం చేపట్టినవే. ఆ తరువాత అధికారంలోకి వచ్చిన వైఎస్‌ జగన్‌ ప్రభుత్వం పట్టించుకోలేదు. ఇవన్నీ విభజన చట్టంలో ఉన్న ప్రాజెక్టులు కావడం విశేషం. ముఖ్యమంత్రి చంద్రబాబు వాటన్నిటినీ మళ్లీ కేంద్రం ముందుంచి ప్రాథమిక ఆమోదం లభించేలా చేశారు. కేంద్ర ఉపరితల రవాణా, జాతీయ రహదారుల మంత్రిత్వ శాఖకు చెందిన స్టాండింగ్‌ ఫైనాన్షియల్‌ కమిటీతో పాటు, ప్రధాన మంత్రి కార్యాలయం ఆమోదం పొందాక అవన్నీ ఆచరణలోకి వస్తాయి. ప్రస్తుతం ప్రాథమిక ఆమోదం పొందినవన్నీ గ్రీన్‌ఫీల్డ్‌ హైవేలు, ఎక్స్‌ప్రెస్‌వేలు. ఈ ప్రాజెక్టుల నిర్మాణాలు పూర్తయితే రాష్ట్ర, అంతరాష్ట్ర ప్రాంతాలతో పూర్తి స్థాయి కనెక్టివిటీ ఏర్పడుతుంది. చంద్రబాబు ముఖ్యమంత్రిగా బాధ్యతలు చేపట్టాక మొదటి సారిగా ఢిల్లీ వెళ్లి పలువురు మంత్రులు, ప్రధాన మంత్రి నరేంద్రమోదీతో భేటీ అయ్యారు. రాష్ట్రానికి కేంద్రం చేయాల్సిన సాయం గురించి వారి ముందుంచారు. కేంద్ర ఉపరితల రవాణా, జాతీయ రహదారులశాఖ మంత్రి నితిన్‌ గడ్కరీతో జరిపిన భేటీలో రహదారులకు సంబంధించిన ప్రాథమిక ఆమోదం లభించింది.