కులగణన చేసి తీరాలి, తెలుగు రాష్ట్రాల హెచ్ ఆర్ ఎఫ్ డిమాండ్
సామాజికంగా వెనుకబడిన వర్గాలకు న్యాయం జరగాలి. ఇందుకు రిజర్వేషన్లు అమలు చేయాలి. హ్యూమన్ రైట్స్ ఫోరం ( HRF) రెండు రోజుల మహాసభల్లో తీర్మానం.
Byline : SSV Bhaskar Rao
Update: 2024-12-17 08:55 GMT
కేంద్రం ప్రకటించిన నూతన విద్యావిధానం - 2020ని వెంటనే వెనక్కి తీసుకోవాలని విద్యాహక్కు చట్టాన్ని పకడ్బందీగా అమలు చేయాలని ఆంధ్రప్రదేశ్, తెలంగాణ రాష్ట్రాల మానవ హక్కుల వేదిక (Human Rights Forum) డిమాండ్ చేసింది. అనంతపురంలో రెండు రోజులపాటు నిర్మహించిన ఫోరం పదో మహాసభ ఆదివారం ముగిసింది. రెండు తెలుగు రాష్ట్రాల నుంచి హాజరైన 144 ప్రతినిధులు హాజరయ్యారు. ఇందులో బలవంతపు భూసేకరణ, పర్యావరణ విధ్వంసం, రాజ్యహింస, 'ఎన్‌కౌంటర్లు', పారిశ్రామిక ప్రమాదాలు, హిందుత్వ, కులహింస, సమావేశాలు, నిరసనలు, హక్కులపై చర్చించడంతో పాటు రాబోయే రెండేళ్లకు కార్యాచరణ సిద్ధం చేశారు.
ఈ సభలను మాజీ ఎమ్మెల్సీ, సభల రిసెప్షన్ కమిటీ అధ్యక్షుడు ఎం. గేయానంద్ ప్రసంగించారు. కర్నాటకకు చెందిన పీపుల్స్ డెమోక్రటిక్ ఫ్రంట్ (పిడిఎఫ్), ఆంధ్ర ప్రదేశ్ నుంచి ఆర్గనైజేషన్ ఫర్ ది ప్రొటెక్షన్ ఆఫ్ డెమోక్రటిక్ రైట్స్ (OPDR) ఈ సదస్సుకు సంఘీభావం తెలిపాయి.
కమిటీ ఏన్నిక
హెచ్ఆర్ఎఫ్ ఎస్.జీవన్‌కుమార్‌ అధ్యక్షతన జరిగిన ఈ కార్యక్రమంలో దాదాపు 300 మందికి పైగా పాల్గొన్నారు. జనరల్ బాడీ రెండు రాష్ట్రాలకు రాష్ట్ర కమిటీలను ఎన్నుకుంది. ఆంధ్రప్రదేశ్ రాష్ట్ర అధ్యక్షుడిగా శ్రీకాకుళంకు చెందిన కేవీ జగన్నాధరావు, ప్రధాన కార్యదర్శిగా అమలాపురం నుంచి వై రాజేష్ ఎన్నికయ్యారు. తెలంగాణ రాష్ట్ర అధ్యక్షుడిగా ఉట్నూర్‌కు చెందిన ఆత్రం భుజంగరావు, ప్రధాన కార్యదర్శిగా జమ్మికుంటకు చెందిన డాక్టర్ ఎస్. తిరుపతయ్య ఎన్నికయ్యారు. విశాఖపట్నానికి చెందిన కె అనురాధ హెచ్ఆర్ఎఫ్ పబ్లికేషన్స్ ఎడిటర్‌గా ఎన్నికయ్యారు. HRF రెండు తెలుగు రాష్ట్రాల సమన్వయ కమిటీ సభ్యులుగా ఎస్. జీవన్ కుమార్, వి. వసంతలక్ష్మి, ఏ చంద్రశేఖర్, వీఎస్. కృష్ణను సాధారణ సభ ఎన్నుకుంది. సభల ముగింపు సందర్భంగా అనంతపురంలో సాయంత్రం నిర్వహించిన ర్యాలీలో మరణించిన కే. బాలగోపాల్ తో పాటు హక్కుల కార్యకర్తలకు నివాళులర్పించారు. హెచ్ఆర్ఎఫ్ ప్రచురించిన నాలుగు పుస్తకాలను హెచ్ఆర్ఎఫ్ కార్యకర్తలు, వక్తలు విడుదల చేశారు.
1) రాజ్యం కులం మతం (కే. బాలగోపాల్)
2) కమీషన్లు - సామాజిక న్యాయం (కే. బాలగోపాల్ )
3) మానవ హక్కులు - 2024, 18 వ బులెటిన్
4) బస్తర్ లో భద్రత అభద్రతలపై పౌర నివేదిక
ముగింపు మహాసభలో మాజీ రాష్ట్రపతి కేఆర్. నారాయణన్ మాజీ ఓఎస్డీ 'మాకు కుల గణన ఎందుకు కావాలి' అనే అంశంపై ఎస్.ఎన్. సాహు, 'బస్తర్‌లో మానవ హక్కుల ఉల్లంఘన'పై, ప్రీలాన్స్ జర్నలిస్టు మాలినీ సుబ్రమణ్యం , 'ఎన్‌ఈపీ'పై రిటైర్డ్ హిస్టరీ లెక్చరర్ కొప్పర్తి వెంకట రమణమూర్తి ప్రసంగించారు.
తీర్మానాలు
1) దేశంలో కులగణన నిర్వహించాలి. ఆ ప్రకారం రిజర్వేషన్లు అమలు చేయాలి.
2) ఇజ్రాయెల్‌తో కుదుర్చుకున్న అన్ని ఒప్పందాలను భారత్ రద్దు చేయాలి. న్యాయం కోసం పాలస్తీనాలో సాగుతున్న పోరాటానికి HRF సంఘీభావం తెలిపింది.
3) ప్రార్ధనామందిరాల చట్టం, 1991 ప్రకారం మైనారిటీల మతస్థలాలపై దాడులు అరికట్టాలి.
4) మహిళలపై లైంగిక వేధింపులను విచారించే వ్యవస్థలను బలోపేతం చేయాలి.
5) నూతన విద్యావిధానం - 2020ని వెంటనే వెనక్కి తీసుకోవాలి. విద్యాహక్కు చట్టాన్ని పకడ్బందీగా అమలు చేయాలి.
6) న్యాయవ్యవస్థ సభ్యులు రాజ్యాంగం స్ఫూర్తికి కట్టుబడి ఉండాలి.
7) కనీస మద్దతు ధర (MSP), రుణమాఫీ, వ్యవసాయ కూలీల సామాజిక పింఛన్ల కోసం ఢిల్లీ సరిహద్దుల్లో నిరసన తెలియజేస్తున్న రైతులపై లాఠీచార్జిని ఖండించింది. లగచర్ల, దిలావర్‌పూర్, చిత్తనూరు రైతులపై కేసులు ఉపసంహరించుకోవాలి.తెలంగాణలో పోడు సాగుదారులకు భూమిపై హక్కు హామీని తెలంగాణ ప్రభుత్వం నెరవేర్చాలి.
8) గౌతమ్ అదానీ వ్యాపారాలపై జేపీసీ ఏర్పాటు చేయాలి. అదానీ గ్రీన్ ఎనర్జీ లిమిటెడ్‌తో ఏపీ ప్రభుత్వం కుదుర్చుకున్న ఒప్పందాలు రద్దు చేయాలి.
9) బస్తర్‌లో 'ఎన్‌కౌంటర్ల' పేరుతో హత్యలకు పాల్పడుతోంది. ప్రభుత్వం మావోయిస్టు ఉద్యమాన్ని రాజకీయ ఉద్యమంగా గుర్తించాలి.
10) UAPA వంటి అప్రజాస్వామిక చర్యలన్నింటినీ రద్దు చేయాలి. జైళ్లలో మగ్గుతున్న ఖైదీలను విడుదల చేయాలి.
11) సోంపేట ఉద్యమ సమయంలో 723 మందిపై పెట్టిన కేసులు ఉపసంహరించుకోవాలి.
12) ఏపీలోని ఐదో షెడ్యూల్ ప్రాంతంలో పంప్‌ డ్ స్టోరేజీ ప్లాంట్‌లకు ఇచ్చిన అనుమతులను రద్దు చేయాలి. ఏజెన్సీ ప్రాంతాల్లో ఆదివాసీ చట్టాలు సక్రమంగా అమలు చేయాలి. G.O. 3ని పునరుద్ధరించాలి.
13) పర్యాటకంతో సహా పారిశ్రామిక అవసరాల కోసం తీరప్రాంతాలను ధ్వంసం చేయడం ఆపాలి
14) విశాఖపట్నం స్టీల్ ప్లాంట్‌కు క్యాప్టివ్ మైన్స్‌ కేటాయించి ఆదుకోవాలి.
15) జిల్లాల్లో ట్రాన్స్ జెండర్ సంఘాలకు భద్రతా గృహాలు ఏర్పాటు చేయాలి.
16) కాలుష్య నియంత్రణను సమర్థవంతంగా అమలు చేయాలి. ఈజ్ అండ్ స్పీడ్ ఆఫ్ డూయింగ్ బిజినెస్ పేరుతో కాలుష్య నియంత్రణకు సంబంధించిన చట్టాలు మార్చేదుకు ప్రభుత్వాలు చేస్తున్న ప్రయత్నాలను మహాసహ వ్యతిరేకించింది.
17) బంగ్లాదేశ్‌లో మైనారిటీలపై (హిందువులు మరియు ఇతరులు) జరుగుతున్న దాడులను మేము ఖండిస్తున్నాము.
18) మణిపూర్‌లో మెజారిటీ కమ్యూనిటీ, మైనారిటీ గిరిజనుల మధ్య హింసను కేంద్ర ప్రభుత్వం పరిష్కరించాలి.
19) కశ్మీరీల ప్రజాస్వామిక హక్కులను పునరుద్ధరించి, రాజ్యహింసను ఆపాలి. దీనికి భారతదేశం సంతకం చేసిన UN మానవ హక్కుల ప్రకటన మార్గదర్శకాలను ఖచ్చితంగా పాటించాలి.
20) కేంద్ర ప్రభుత్వం వెంటనే జమిలీ ఎన్నికల బిల్లు ఉపసంహరించుకోవాలి. సీఈసీ EVM ఓటింగ్‌పై సందేహాలను నివృత్తి చేయాలి.
21) రాయలసీమలో పశ్చిమ ప్రాంతం నిర్లక్ష్యానికి గురవుతోంది. కృష్ణా మిగులు జలాల్లో 4 టీఎంసీల కేటాయింపు ఉంది. రాజోలిబండ మళ్లింపు పథకం (ఆర్‌డీఎస్‌) పూర్తి చేయాలి.
22) SC-ST ఉప-వర్గీకరణ చట్టబద్ధంగా వీలైనంత త్వరగా అమలు చేయాలి. SC ST (PoA) చట్టం కింద నేరాల దర్యాప్తు అధికారులు (DSP) నిందితులపై పక్షపాతం చూపకూడదు.
23) న్యాయవ్యవస్థలో కేసులను పరిష్కానికి జడ్జీలు, ఉద్యోగులను నియమించాలి.
24) బిజెపి పాలిత రాష్ట్రాల్లో అమలు చేస్తున్న 'బుల్డోజర్ న్యాయాన్ని' ఖండించారు.