మచిలీపట్నం బీచ్ లో ‘మసుల‘ సందడి

మసుల బీచ్ ఫెస్టివల్ 2025, ఆంధ్రప్రదేశ్ టూరిజం శాఖ, కృష్ణా జిల్లా అడ్మినిస్ట్రేషన్, ఇతర శాఖల సమన్వయంతో రూ. 8 కోట్ల బడ్జెట్‌తో నిర్వహిస్తోంది. ముఖ ద్వారం నుంచి బీచ్ వద్దకు వెళ్లేందుకు రెండు ద్వారాలు ఏర్పాటు చేశారు. ఒక ద్వారం నుంచి స్వాగతం పలుకుతుండగా మరో ద్వారం నుంచి వీడ్కోలు చెబుతున్నారు. రాజధాని అమరావతి లో ఏర్పాటు కానున్న అమరావతి ముఖద్వారం ఎలా ఉంటుందో అలాగే మసుల బీచ్ ఫెస్టివల్ కు వచ్చే దర్శందర్శకులను ఆకట్టుకునేలా ఏర్పాటు చేశారు. దేశంలోనే మొదటి సారిగా ఏ తీరంలో లేని విధంగా వంద అడుగుల ఎత్తు జాతీయ జెండాను ఏర్పాటు చేశారు. ఈ బీచ్ లో రూ. 1,500 కోట్ల పెట్టుబడులు పెట్టేందుకు వ్యాపారులు కొందరు ముందుకొస్తున్నారని మంత్రి కొల్లు రవీంద్ర తెలిపారు.

క్రీడా కార్యక్రమాలు

జాతీయ స్థాయిలో 23 రాష్ట్రాల నుంచి 1,016 మంది క్రీడాకారులు బీచ్ కబడ్డీ, వాలీబాల్, సీ కయాకింగ్‌లో పాల్గొన్నారు. ఈ పోటీలు యువతను ఆకర్షించడంలో కీలక పాత్ర పోషించాయి.

వాటర్ స్పోర్ట్స్, సాహస క్రీడలు: హెలికాఫ్టర్ రైడ్ (రూ. 2,500), పారాసైలింగ్, జెట్ స్కీ, స్పీడ్ బోట్, కైట్ సర్ఫింగ్, పారాచూట్ రైడింగ్ వంటి సాహస కార్యక్రమాలు సందర్శకులకు థ్రిల్లింగ్ అనుభవాన్ని అందించాయి.

సాంస్కృతిక కార్యక్రమాలు

ఆంధ్రప్రదేశ్, తెలంగాణ సంస్కృతిని ప్రతిబింబించే కళారూపాలు, కుచిపూడి నృత్య ప్రదర్శనలు, సినీ నటీనటుల డ్యాన్స్ కార్యక్రమాలు ఫెస్టివల్‌కు రంగురంగుల వాతావరణాన్ని అందించాయి.

జబర్‌దస్త్ హాస్య కార్యక్రమాలు

జబర్‌దస్త్ టీమ్ నుంచి ప్రముఖ హాస్య నటులు ప్రత్యేక కార్యక్రమాలతో సందర్శకులను అలరించారు. ఇది కుటుంబ సభ్యులందరికీ ఆనందాన్ని అందించింది. ప్రత్యేకించి శుక్రవారం రాత్రి నిర్వహించిన కార్యక్రమాల్లో జబర్దస్త్ నటులు బుల్లెట్ భాస్కర్, జితేంద్ర, నూకరాజు, ఫైమా పాల్గొన్నారు. వీరు ప్రదర్శించిన స్కిట్ లు నవ్వులు పూయించాయి. ఢీ డ్యాన్సర్ అక్షా ఖాన్ బృందం ప్రదర్శించిన నృత్య ప్రదర్శన అలరించింది. గీత మాధురి పాడిన పాటలకు యువత డ్యాన్స్ లు వేశారు. యాంకర్ ఉదయభాను మాటల చలోక్తులు పలువురిని ఆకట్టుకున్నాయి.

హరిహర వీరమల్లు బృందం సందరడి
హరిహర వీరమల్లు సినీ బృదం బీచ్ లో సందడి చేసింది. మొదట సినిమా ట్రైలర్ ను ప్రదర్శించారు. చిత్ర కథా నాయిక నిధి అగర్వాల్ స్టెప్పులు వేయడంతో యువత స్టేజీ కింద డ్యాన్స్ లు వేశారు. హెలికాప్టర్ రైడ్ ను మంత్రి కొల్లు రవీంద్ర, కలెక్టర్ బాలాజీలు ప్రారంభించారు. హరిహర వీరమల్లు చిత్ర దర్శకుడు జ్యోతి కృష్ణ మాట్లాడుతూ మచిలీపట్నం పోర్టుకు సంబంధించి సినిమాలో కొన్ని సన్నివేశాలు, సినీ హీరో, ఉప ముఖ్యమంత్రి పవన్ కల్యాణ్ తీసిన కొన్ని సన్నివేశాలను వివరించారు.

ప్రత్యే ఆకర్షణగా ఆహార స్టాళ్లు

వివిధ ప్రాంతాలకు చెందిన ప్రత్యేక వంటకాలు, సముద్ర చేపల వంటకాలు, ఫుడ్ కోర్టులు, ఫాస్ట్ ఫుడ్స్, బిర్యానీ స్టాల్స్ ఆహార ప్రియులను విశేషంగా ఆకర్షించాయి. ఈ స్టాళ్లు సందర్శకులకు రుచికరమైన అనుభవాన్ని అందించాయి.

ప్రత్యేక స్థాలులో బందరు లడ్డు

ప్రపంచవ్యాప్తంగా ప్రసిద్ధి చెందిన బందరు కు ప్రత్యేక గుర్తింపు తెచ్చిన బందరు లడ్డు, బందర్ హల్వా రుచులు ఆస్వాదించేందుకు ప్రత్యేక స్థాలు కేటాయించగా బీచ్ ఫెస్టివల్ కు విచ్చేసిన అశేష జనవాహిని బందరు లడ్డు రుచులు ఆస్వాదిస్తున్నారు. అనకాపల్లి జిల్లాకు చెందిన మాడుగుల హల్వా, గోదావరి జిల్లాలకు చెందిన ప్రత్యేక వంటకాలు స్టాల్స్ ఏర్పాటు చేశారు.

పరిశ్రమల శాఖ ఆధ్వర్యంలో..

జిల్లా పరిశ్రమల శాఖ ఆధ్వర్యంలో ఇమిటేషన్ జ్యువెలరీ మైక్రో ప్లేటింగ్ నగలు, ఆభరణాలు, బేవరేజెస్, ఫ్రూట్ పల్ప్, కోసియార్ కాజు వంటి స్టాల్స్ ఏర్పాటుతోపాటు ALEAP ( Association of Lady Entrepreneurs of AP) ఆధ్వర్యంలో స్టాల్స్ ఏర్పాటు చేశారు. గోదావరి జిల్లాల ప్రత్యేక వంటకాలు, లేసుల అమ్మకాలు ప్రత్యేక ఆకర్షణగా నిలిచాయి.

చేనేత జౌళి శాఖ ఆధ్వర్యంలో..

జిల్లా చేనేత జౌళి శాఖ ఆధ్వర్యంలో రాష్ట్రంలో వివిధ ప్రాంతాల్లో ప్రసిద్ధి చెందిన చేనేత వస్త్రాల ప్రదర్శన, అమ్మకాలు, ఏర్పాటు చేశారు. ఆప్కో వస్త్రాల ప్రత్యేక స్టాల్ ఏర్పాటు చేశారు.

విజువల్ ఆకర్షణలు

సముద్ర జీవుల బొమ్మలు, జాతీయ జెండా: ముఖ ద్వారం నుంచి బీచ్ వరకు సముద్ర జీవుల ఆకారంలో ఏర్పాటు చేసిన బొమ్మలు, జాతీయ జెండా, వాటర్‌ఫాల్స్ సందర్శకులను ఆకట్టుకున్నాయి. సాయంత్రం 5 గంటల నుంచి రాత్రి 11 గంటల వరకు జనం ఎక్కువగా హాజరయ్యే సమయంలో, రాత్రి సమయంలో సందర్శకుల సౌలభ్యం కోసం అద్భుతమైన లైటింగ్ ఏర్పాటు చేశారు.

పిల్లల కోసం బొమ్మలు, ఫొటో జోన్‌లు: పిల్లలు, పెద్దలు ఫొటోలు తీసుకునేందుకు పలు రకాల బొమ్మలు, ఆకర్షణీయమైన సెటప్‌లు ఏర్పాటు చేశారు. ఇవి కుటుంబ సభ్యులను ఎక్కువగా ఆకర్షించాయి. ఏ బొమ్మ వద్ద చూసినా కుటుంబ సభ్యలు, వ్యక్తులు, యువతీ యువకులు ప్రత్యేకంగా ఫొటోలు తీయించుకుంటూ కనిపించారు. ప్రతి ఒక్కరి చేతిలోని సెల్ ఫోన్ ఫొటోలు తీసుకునేందుకు ఉపయోగించారు.

ట్రాఫిక్, భద్రతా ఏర్పాట్లు

ఫెస్టివల్ సమయంలో ట్రాఫిక్ జామ్‌ను నివారించేందుకు ప్రత్యేక ట్రాఫిక్ డైవర్షన్‌లు, పార్కింగ్ స్టాండ్‌లను ఏర్పాటు చేశారు. కార్లు, బైక్‌ల కోసం ప్రత్యేక పార్కింగ్ సౌకర్యాలు సందర్శకులకు సౌలభ్యాన్ని అందించాయి.

సూపరింటెండెంట్ ఆఫ్ పోలీస్ ఆర్ గంగాధర్ రావు నేతృత్వంలో వాచ్ టవర్లు, నిపుణులైన ఈతగాళ్లు, హెచ్చరిక సైన్ బోర్డులతో కూడిన భద్రతా ఏర్పాట్లు చేశారు. వీఐపీ లాంజ్‌లు, హెలిప్యాడ్‌ వద్ద అదనపు భద్రతను కల్పించారు.

బీచ్ ప్రాంతంలో చెత్తను తక్షణమే తొలగించడం ద్వారా నిర్వాహకులు శుభ్రమైన వాతావరణాన్ని కల్పించారు. ఇది సందర్శకులకు ఆహ్లాదకరమైన అనుభవాన్ని అందించింది.

మంగినపూడి బీచ్, దాని నల్లటి నేల, బంగాళాఖాతం సుందరమైన దృశ్యాలతో, ఇప్పటికే పర్యాటకులకు ఒక ప్రముఖ గమ్యస్థానంగా ఉంది. మసుల బీచ్ ఫెస్టివల్ ఈ బీచ్‌ను ఒక అంతర్జాతీయ పర్యాటక గమ్యస్థానంగా మార్చే దిశలో ఇదో ముందడుగా చెప్పొచ్చు.

తెలంగాణ, కర్ణాటక, ఆంధ్రప్రదేశ్‌లోని వివిధ ప్రాంతాల నుంచి లక్షలాది మంది సందర్శకులు ఈ ఫెస్టివల్‌కు హాజరవుతున్నారు. హైదరాబాద్ నుంచి 351 కిమీ దూరంలో ఉన్న ఈ బీచ్, తెలంగాణ పర్యాటకులకు సమీప గమ్యస్థానంగా ఉంది.

ఈ ఫెస్టివల్ స్థానిక ఆర్థిక వ్యవస్థను బలోపేతం చేస్తోంది. ఆహార స్టాళ్లు, స్థానిక వ్యాపారులు, రవాణా సేవలు ఈ ఫెస్టివల్ ద్వారా గణనీయమైన ఆదాయాన్ని ఆర్జిస్తున్నాయి.

బ్లూ ఫ్లాగ్ సర్టిఫికేషన్

మంగినపూడి బీచ్‌ను బ్లూ ఫ్లాగ్ సర్టిఫికేషన్ కోసం అభివృద్ధి చేసే ప్రణాళికలు ఉన్నాయి. ఇది బీచ్ పరిశుభ్రత, నీటి నాణ్యత, పర్యావరణ నిర్వహణను మరింత మెరుగుపరుస్తుంది.

సమస్యలు

గతంలో మంగినపూడి బీచ్‌లో డ్రింకింగ్ వాటర్, టాయిలెట్స్, డ్రెస్ చేంజింగ్ రూమ్‌ల వంటి ప్రాథమిక సౌకర్యాలు లేకపోవడంతో సందర్శకులు ఇబ్బందులు ఎదుర్కొన్నారు. ఈ ఫెస్టివల్ సందర్భంగా ఈ సమస్యలను పరిష్కరించినప్పటికీ, దీర్ఘకాలికంగా ఈ సౌకర్యాలను మరింత మెరుగుపరచాలి. ఫెస్టివల్ సమయంలో వేడి, తేమతో కూడిన వాతావరణం సందర్శకులకు అసౌకర్యాన్ని కలిగిస్తోంది. శీతాకాలంలో ఈ ఫెస్టివల్‌ను నిర్వహించడం ద్వారా సందర్శకుల సౌకర్యాన్ని మరింత మెరుగుపరచవచ్చు.

మసుల బీచ్ ఫెస్టివల్ 2025 మంగినపూడి బీచ్‌ను ఒక సాంస్కృతిక, పర్యాటక కేంద్రంగా మార్చడంలో కీలక పాత్ర పోషిస్తోంది. జాతీయ స్థాయి క్రీడలు, సాంస్కృతిక కార్యక్రమాలు, సాహస క్రీడలు, మరియు ఆహార స్టాళ్లు సందర్శకులకు అద్భుతమైన అనుభవాన్ని అందించాయి. ట్రాఫిక్ నిర్వహణ, భద్రత, పరిశుభ్రతపై నిర్వాహకులు చూపిన శ్రద్ధ ఈ ఫెస్టివల్‌ను విజయవంతం చేసింది. దీర్ఘకాలంలో ఈ ఫెస్టివల్ మంగినపూడి బీచ్‌ను ఒక అంతర్జాతీయ పర్యాటక గమ్యస్థానంగా స్థాపించడంతో పాటు, స్థానిక ఆర్థిక వ్యవస్థను బలోపేతం చేసే సామర్థ్యాన్ని కలిగి ఉంది. ఈ ఉత్సవం ఆంధ్రప్రదేశ్ సాంస్కృతిక వైభవాన్ని, పర్యాటక ఆకర్షణను ప్రపంచానికి చాటిచెప్పే ఒక సంగమంగా నిలిచింది.