అసెంబ్లీలో పవన్‌ కల్యాణ్ ముసి ముసి నవ్వులు
10 ఏళ్ల క్రితం పార్టీ పెట్టినా ఎన్నికల్లో గెలిచింది లేదు. తొలి సారి జనసేనకు అసెంబ్లీలో ప్రాతినిద్యం వచ్చింది. ఒకే సారి 21 ఎమ్మెల్యేలు గెలిచి అసెంబ్లీలో అడుగు పెట్టారు. అసెంబ్లీ వాతావరణం ఎంజాయ్‌ చేస్తున్నారు.
జనసేన పార్టీ అధినేత, ఆంధ్రప్రదేశ్ ఉప ముఖ్యమంత్రి పవన్‌ కల్యాణ్ అసెంబ్లీ సమావేశాల్లో ముసి ముసి నవ్వులు నవ్వుకుంటూ సభలో అందరి దృష్టిని ఆకర్షిస్తున్నారు. సమావేశాల్లో తన పార్టీ ఎమ్మెల్యేలు భాగస్వాములు అవుతున్న విధానంపై పవన్‌ కల్యాణ్ తనలో తాను నవ్వుకుంటూ ఎంజాయ్‌ చేస్తున్నారు. ప్రశ్నోత్తరాలు, లఘు చర్చలు, జీరో అవర్‌ వంటి వాటిల్లో తన పార్టీ ఎమ్మెల్యేలు మాట్లాడుతున్న తీరును క్షుణ్ణంగా పరిశీలించుకుంటున్నారు. ఆయా అంశాలపై లేవనెత్తుతున్న పాయింట్లు, భయం, బెరుకు లేకుండా ప్రసంగిస్తున్న తీరు, సమస్యలపై వారికి ఉన్న అవగాహన వంటి అంశాలపైన ఆశ్చర్యాన్ని వ్యక్తం చేస్తూ, పర్వాలేదు తమ పార్టీ ఎమ్మెల్యేలు సభలో బాగానే మాట్లాడుతున్నారని తనలో తాను ముసి ముసి నవ్వులు నవ్వుకుంటూ మురిసి పోతున్నారు. ఒకే సారి తనతో పాటు 21 మంది జనసేన పార్టీ ఎమ్మెల్యేలు అసెంబ్లీలో అడుగు పెట్టడంతో పవన్‌ కల్యాణ్ ఉబ్బితబ్బుబ్బైపోతున్నారు.