లిక్కర్ స్కాంలో సజ్జల రామకృష్ణారెడ్డి కొడుక్కి బిగుస్తున్న ఉచ్చు

లిక్కర్ స్కాంలో నిందితుడైన చెవిరెడ్డి మోహిత్‌రెడ్డి (ఏ-39), అనుమానితుడైన చంద్రపతి ప్రద్యుమ్నతో కలిసి భీమ్‌ స్పేసెస్‌ ఎల్‌ఎల్‌పీ అనే సంస్థలో సజ్జల భార్గవరెడ్డి డైరెక్టర్‌గా ఉన్నట్లు సిట్‌ తేల్చింది. వైసీపీ హయాంలో 2021 డిసెంబరులో ఈ కంపెనీని ఏర్పాటు చేసినట్టు గుర్తించారు. నగదు రూపంలో తీసుకున్న మద్యం ముడుపుల్ని వేర్వేరు చోట్లకు పంపినట్టు సిట్ ఆరోపిస్తోంది. నల్లధనాన్ని వైట్‌లోకి మార్చడానికి ఈ కంపెనీని వినియోగించారని సిట్‌ ఆరోపించింది. మద్యం కుంభకోణం కేసు దర్యాప్తులో భాగంగా చెవిరెడ్డి భాస్కరరెడ్డి (ఏ-38), చెవిరెడ్డి మోహిత్‌రెడ్డి (ఏ-39)ల కంపెనీలు, సంస్థల్లో సిట్‌ అధికారులు బుధవారం సోదాలు చేశారు. చిత్తూరు, తిరుపతి హైదరాబాద్‌లలోని 12 కంపెనీల్లో ఏకకాలంలో ఈ తనిఖీలు జరిగాయి.