షర్మిలమ్మ వెనక సూరీడు కనబడతాడా?

కాంగ్రెస్‌ పార్టీ రాజకీయాల్లో వైఎస్సార్‌ ఆత్మగా చెప్పుకునే కేవీపీ రామచంద్రరావు షర్మిలతో ముందుకు సాగుతున్నారు. ఇక ఎన్‌ రఘువీరారెడ్డి, డాక్టర్‌ ఎన్‌ తులసిరెడ్డి లాంటి సీనియర్‌ నాయకులు షర్మిల వెన్నంటి ఉన్నారు. ఈ నేపథ్యంలో సూరీడు పేరు తెరపైకి వచ్చింది. షర్మిల ఇక రాజీలేని పోరాటం చేసేందుకు సిద్ధమయ్యారు. రేయింబవళ్లు రాష్ట్ర పర్యటనలు చేయాల్సి ఉంటుంది. సూరీడుకు ఎంతో మంది నాయకులతో పరిచయాలు ఉన్నాయి. ఆ పరిచయాలు కూడా ఉపయోగించుకోవాలని షర్మిల భావిస్తే తప్పకుండా అక్కున చేర్చుకునే అవకాశం ఉంది. ఒకవేళ ఇదే జరిగితే సూరీడును చూడగానే వైఎస్సార్‌ పేరు స్మరించని వారు ఉండరంటే ఆశ్చర్యంగానే ఉండవచ్చు కానీ ఇది నిజమేనని పలువురు కాంగ్రెస్‌ నాయకులు చెబుతున్నారు. సూరీడు తనంతట తాను వచ్చిన షర్మిల వెంట కార్యక్రమాల్లో తిరుగుతాడా.. లేక షర్మిల సూరీడును పిలిపించే అవకాశం ఏమైనా ఉందా? అనే చర్చ కూడా సాగుతున్నది.

వైఎస్సార్‌ మరణం తరువాత సూరీడు వైఎస్సార్‌ కుటుంబం నుంచి కనిపించకుండా పోయారు. ఎందుకు ఇలా జరిగిందో ఇప్పటికీ ఎవ్వరికీ అంతుపట్టని విషయం. వైఎస్సార్‌ జీవితంలో సగానికి పైగా సరీడు నీడలా వెన్నంటి ఉండేవాడు. ఎంత మంది ప్రభుత్వ అధికారులు ఉన్నా, అటెండర్లు ఉన్నా, ఏ వేదికపైనైనా సూరీడు వైఎస్సార్‌ వెనక కనిపించేవాడు. వైఎస్సార్‌ మరణంతో ఒక్కసారిగా కనుమరుగయ్యాడు. హైదరాబాద్‌లో నివాసం ఉంటున్నా ఎక్కడా కనిపించడం లేదు. తండ్రిని మించిన తనయగా రాజకీయాల్లో ప్రవేశించిన షర్మిల సూరీడును తిరిగి ఆహ్వానిస్తారా? లేదా? అనేది చూడాల్సిందే.