కొండాయి గ్రామస్థుల అవస్థలు

జంపన్నవాగు వరద ఉధృతి పెరగడంతో ములుగు జిల్లా ఏటూరునాగారం మండలం కొండాయి గ్రామస్థులు ఆందోళన చెందుతున్నారు. ఇంతటి కష్టకాలంలో కూడా తమకు సహాయం అందించడానికి ప్రభుత్వం ముందుకు రాకపోవడంతో వాళ్లు విన్నూత్న నిరసన చేపట్టారు.  2023 లో జంపన్నవాగుకు వచ్చిన భారీ వరద వల్ల ఎనిమిది మంది మృత్యువాతపడ్డారు. మళ్ళీ ఈ ఏడాది జంపన్నవాగు ఉధృతంగా ప్రవహిస్తుండటంతో గ్రామస్థుల్లో ఆందోళ పెరుగిపోతోంది. ఎనిమిది మంది ప్రాణాలు పోయినా సరే తమకు ప్రభుత్వం నుంచి ఇప్పటి వరకు ఎటువంటి ఆసరా, భరోసా అందకపోవడంతో ఇప్పుడు కొండాయి గ్రామస్థులు నిరసన బాటపట్టారు. వినూత్న నిరసనలో భాగంగా అడవి బాట పట్టారు. గ్రామంలో మొదట వరద ముంపునకు గురయ్యే ఎస్సీకాలనీకి చెందిన 30 కుటుంబాలు..  దొడ్ల గ్రామ సమీపంలోని అభయారణ్యంలో గుడారాలు వేసుకున్నారు. కుటుంబ సభ్యులతో సహా అక్కడికి చేరుకున్నారు.

విషయం తెలుసుకున్న రెవెన్యూ, అటవీ శాఖల అధికారులు, కాంగ్రెస్‌ నాయకులు గుడారాల వద్దకు వెళ్లారు. అక్కడ కుటుంబాలతో మాట్లాడారు. కాగా రెండేళ్ల క్రితం వరదల సమయంలో తమను పునరావాస ప్రాంతానికి తరలించి నిర్లక్ష్యంగా వదిలేశారని, ఈసారి మళ్లీ వరదలొస్తే తమ పరిస్థితి ఏమిటని ఈ సందర్భంగా బాధితులు.. అధికారులను అడిగారు. దాంతో స్పందించిన అధికారులు, నాయకులు... అడవిలో కాకుండా సాధారణ ప్రాంతంలో సర్వే చేసి స్థలాలతోపాటు ఇళ్లను ఇవ్వడానికి మంత్రి సీతక్కతో మాట్లాడి చర్యలు తీసుకుంటామని హామీ ఇచ్చారు. దాంతో బాధితులు గుడారాలు తొలగించుకుని వెళ్లిపోయారు. ఇదే సమయంలో దొడ్ల గ్రామ ప్రజలు సైతం తమ సమస్యను విన్నవించడంతో వారికి కూడా ఇళ్లపై హామీ ఇచ్చారు.