బీర్ తాగి పడుకోకుండా వచ్చి ఓటేయండి: నిర్మాత అల్లు అరవింద్

తెలంగాణ రాష్ట్ర అసెంబ్లీ ఎన్నిక‌ల పోలింగ్ లో అక్క‌డ‌క్క‌డ స్వ‌ల్ప ఘ‌ర్ష‌ణ‌లు జ‌రిగినా, ప్ర‌శాంతంగా కొన‌సాగుతోంది.

మ‌ధ్యాహ్నం 3 గంట‌ల వ‌ర‌కూ జ‌రిగిన పోలింగ్ స‌ర‌ళిని ప‌రిశీలిస్తే దాదాపుగా 60 శాతం ఓట‌ర్లు త‌మ ఓటు హ‌క్కును వినియోగించుకున్నట్లు రాష్ట్ర ఎన్నిక‌ల సంఘం అధికారులు ప్ర‌క‌టించారు. హైదరాబాద్లో పోలింగ్ ప్రక్రియ సజావుగా సాగుతోంది.

సినీ తారలు ఉత్సాహంగా పోలింగ్ పాల్గొంటున్నారు. జూబ్లిహిల్స్ లోని ప‌లు కేంద్రాల్లో సినీతారులు ఓటు వేయ‌డంతో పాటు ప్ర‌తీ ఒక్క‌రూ బాధ్య‌త‌గా త‌మ ఓటు హ‌క్కును విన‌యోగించుకోవాల‌ని రాష్ట్ర ప్ర‌జ‌ల‌కు పిలుపునిచ్చారు. ఓటు హక్కును వినియోగించుకున్న తర్వాత నిర్మాత అల్లు అరవింద్ ఇంట్రెస్టింగ్ వ్యాఖ్యలు చేశారు.

"ఇంట్లో కూర్చున్న వారికి ఓ విజ్ఞప్తి. ఓటేయకపోతే ప్రభుత్వం అది చేయలేదు.. ఇది చేయలేదని అడిగే హక్కు మీకు ఉండదు. అలా ఉండొద్దు అనుకుంటే మీరు వచ్చి ఓటేయండి. ఇవాళ హాలిడే కదా అని బీరు తాగి పడుకోకుండా వచ్చి ఓటు హక్కును వినియోగించుకోవాల‌ి," అని పిలుపునిచ్చారు.

 కుటుంబ సభ్యులతో కలిసి జూబ్లీహిల్స్ క్లబ్లో ఓటు వేసేందుకు మెగాస్టార్ చిరంజీవి  వచ్చారు. భార్య సురేఖ, కూతురు శ్రీజతో కలిసి తన ఓటు హక్కును వినియోగించుకున్నారు. మరోవైపు విక్టరీ వెంకటేశ్ కూడా ఓటు వేశారు. షేక్ పేట ఇంటర్నేషనల్ స్కూల్లో దర్శకుడు రాజమౌళి ఓటు హక్కును వినియోగించుకున్నారు. అలాగే నటులు రాజేంద్ర ప్రసాద్, కళ్యాణ్ రామ్, శివాజీ రాజా, యాంకర్ ఝాన్సీ, సింగర్ సునీత తమ ఓటు హక్కును వినియోగించుకున్నారు. రాజ్యాంగం ప్రసాదించిన ఓటు హక్కును ప్రతీ ఒక్కరూ సద్వినియోగం చేసుకోవాలని రాజేంద్రప్రసాద్ కోరారు. సాయంత్రం 5 గంటలలోగా భారత పౌరుడిగా ప్రతి ఒక్కరూ ఓటు వేయాలని విజ్ఞప్తి చేశారు.