నది (కవిత)

నదికి నాకు మధ్య

నిత్య సంభాషణ

చాలాసార్లు నది నాతో

ముచ్చట్లాడుతుంది

నదిలో నేనూ నాలో నది

మునకలేస్తూ వుంటాం

నది నిశ్శబ్దంగా కళ్లలోంచి పెల్లుబికి

పాదాలను తడిపేస్తుంది

నా నదిలో మరెవరూ మునగటానికి

ఇష్టముండదు నాకు

చాలాసార్లు నా నదిలో నేనే

ఒంటరిగా ఈదుతూ వుంటాను

కొన్నిసార్లే నది తగ్గుముఖం పడుతుంది

అనేకసార్లు ఉధృతమవుతుంది

గుండె గోడల్ని ఒరుసుకుంటూ ప్రవహించే

నాలోని నదికి

నలుగురిని పచ్చగా బతికించటమే తెలుసు

ప్రవహించినంత మేర

పచ్చదనాన్ని మొలకెత్తించటమే తెలుసు

నాలో శుభ్రపరుచుకుంటున్న అనేక మలినాల్ని

తేటగా మెరిపించటమే తెలుసు

నది మీద పూలలాంటి పడవలతోపాటూ

ముళ్ల కంపల్నీ తీరం చేర్చుతుంది నది

నదిలేనిదెవరికి?

నదికానివాళ్లెవరు?

నదిని వెంటేసుకునే పుడతాం

నలుగురిని నదిలా మార్చే

చివరికి వెళ్లిపోతాం

- చిత్తలూరి