కడప టీడీపీలో భగ్గుమన్న వర్గ పోరు..రెచ్చిపోయిన బీటెక్‌ రవి అనుచరులు
ఇసుక టెండర్ల విషయంలో హంగామా సృష్టించిన రవి అనుచరులు రేషన్‌ దుకాణం కోసం పరీక్ష రాసేందుకు వచ్చిన ప్రకాష్‌పై దాడికి దిగారు.;
కూటమి అధికారంలోకి వచ్చిన తర్వాత టీడీపీ శ్రేణులు రెచ్చి పోతున్నాయి. దీంతో పాటుగా తెలుగుదేశం పార్టీలో ఆధిపత్యం నెగ్గించుకునేందుకు వర్గ పోరు ఘటనలు కూడా పెరిగి పోయాయి. ఈ నేపథ్యంలో కడప జిల్లాలో వర్గ పోరు బహిర్గతమైంది. గ్రూపుల మధ్య విభేదాలు బగ్గు మన్నాయి. టీడీపీ నేత బీటెక్‌ రవి, టీడీపీ ఎమ్మెల్సీ రాంగోపాల్‌రెడ్డి మధ్య ఆధిపత్య పోరు పతాక స్థాయికి చేరింది. అందులో భాగంగా ఎమ్మెల్సీ రాంగోపాల్‌రెడ్డి అనుచరుడు వేంపల్లికి చెందిన ప్రకాష్‌ను బీటెక్‌ రవి అనుచరులు చితక బాదారు. దీంతో ఎమ్మెల్సీ రాంగోపాల్‌రెడ్డి భార్య ఉమాదేవి రంగంలోకి దిగారు. ప్రకాష్‌ను విడిచి పెట్టాలని ఏకంగా ధర్నాకు దిగారు. ఈ నేపథ్యంలో ఇరు వర్గాలు బాహా బాహికి దిగారు. దీంతో ఆ ప్రాంతంలో ఉద్రిక్తతలు చోటు చేసుకున్నాయి. చివరికి పోలీసులు జోక్యం చేసుకోవలసి వచ్చింది. రంగంలోకి దిగిన పోలీసులు ఇరు వర్గాలను శాంతింప చేశారు. పోలీసుల జోక్యంతో ప్రకాష్‌ను వదిలిపెట్టారు.