కుప్ప కూలిన రాజమండ్రి ఎయిర్ పోర్ట్ టెర్మినల్‌
నిర్మాణ పనుల్లో నాణ్యత లేదనే విమర్శలు వినిపిస్తున్నాయి. గత ఏడాది డిసెంబరులో దీనిని మొదలు పెట్టారు.;
ఆంధ్రప్రదేశ్ తూర్పు గోదావరి జిల్లా రాజమండ్రి ఎయిర్ పోర్టులో నూతనంగా నిర్మిస్తున్న భారీ టెర్మినల్‌ నిర్మానం ఒక్క సారిగా కుప్పకూలింది. టెర్మినల్‌ కూలిన సమయంలో కూలీలు లేక పోవడంతో పెను ప్రమాదం తప్పింది. అయితే ఒక కూలీలకు స్వల్ప గాయాలైనట్లు సమాచారం. అతన్ని రాజమండ్రిలోని ఓ ప్రైవేటు ఆసుపత్రికి తరలించి చికిత్సలు అందిస్తున్నారు. రాజమండ్రి విమానాశ్రయంలో ప్రస్తుతం ఉన్న టెర్మినల్‌కు ఆనుకొని భారీ స్థాయిలో మరో నూతన టెర్మినల్‌ను నిర్మిస్తున్నారు. గోదావరి పుష్కరాలు త్వరలో జరగనున్న నేపథ్యంలో రాజమండ్రి విమానాశ్రయాన్ని డెవలప్‌ చేసి అందుబాటులోకి తీసుకొని రావాలని నిర్ణయించారు. దీంతో పనులు శరవేగంగా జరుగుతున్నాయి. వేలాది మంది కూలీలు ఈ నిర్మాణాల పనులు చేస్తున్నారు. అయితే ఒక్క సారిగా టెర్మినల్‌ నిర్మాణం కుప్పకూలడంతో వాటిని క్రేన్ల సహాయంతో తొలగించేందుకు కూలీలు శ్రమిస్తున్నారు. టెర్మినల్‌ కూలిపోవడంతో నిర్మాణ పనులు తాత్కాలికంగా నిలిచిపోయాయి.