లిక్కర్ స్కాంలో ముదురుతున్న కవిత కష్టాలు

కవిత నివాసంలో తాము సోదాలు చేస్తున్న సమయంలో తమకు మేక శరణ్ ఫోన్ లభ్యమైందని, అప్పుడు అతడు కూడా అదే ఇంట్లో ఉన్నారని ఈడీ తెలిపింది. ఈ కుంభకోణంలో కవిత మేనల్లుడు మేక శరణ్ హస్తం కూడా ఉందని, అతని వ్యాపారాల వివరాలు చెప్పాలని కోరితే తనకు తెలియదని కవిత చెప్తున్నారని ఈడీ న్యాయస్థానానికి వివరించింది. నేరపూరిత సొమ్మును కవిత తన మేనల్లుడి వ్యాపారాల ద్వారా వినియోగించుకున్నారన్న విషయంలో సమీర్ మహేంద్రుతో కలిసి విచారణ చేయడానికి అప్లికేషన్ దాఖలు చేశామని వారు వెల్లడించారు. వారి కోరిక మేరకు ధర్మాసనం కవిత కస్టడీని మూడు రోజులు పొడిగించింది. అయితే ఈ కేసులో కవిత బంధువులు ఇంకెంతమంది ఉన్నారన్న అంశంపై కూడా దృష్టి పెట్టినట్లు ఈడీ వర్గాలు తెలిపాయి. ఢిల్లీలో కవిత కేసు విచారణ జరుగుతున్న సమయంలో హైదరాబాద్‌లో ఆమె బంధువుల నివాసాల్లో సోదాలు జరుగుతున్నట్లు ఈడీ తెలిపింది.

ఎన్నికల సమయంలో ఇంత మంది నేతలను అరెస్ట్ చేయడం మన దేశ ప్రజాస్వామ్యానికి ఏమాత్రం మంచిది కాదని బీఆర్ఎస్ నేత కవిత అన్నారు. ఈ విషయంలో ఈసీ జోక్యం చేసుకోవాలని, అరెస్ట్‌లపై దృష్టి సారించాలని ఆమె కోర్టు నుంచి బయటకు వెళ్తున్న సమయంలో అన్నారు. అంతేకాకుండా తన అరెస్ట్ వెనుక రాజకీయ కుట్ర ఉందని, తనపై బనాయించింది తప్పుడు కేసని చెప్పారు కవిత.