Say No To Drugs | మాదక ద్రవ్యాలకు వ్యతిరేకంగా సర్వమత గురువుల సందేశం

సనాతన ధర్మం నుంచి దూరంగా ఉన్న వారే సురాపానం, గంజాయి, పొగాకు, మాదకద్రవ్యాల మత్తులో జోగుతున్నారని చిలుకూరు బాలాజీ దేవాలయ పూజారి లక్ష్మీ నరసింహం చెప్పారు. సనాతన ధర్మాన్ని తూచా తప్పకుండా పాటించే వారు మద్యానికి, మాదకద్రవ్యాలకు, మత్తుకు దూరంగా ఉంటారని చెప్పారు. మత్తులో జోగుతున్న యువత మాదకద్రవ్యాల బారి నుంచి దూరంగా ఉండాలని ఆయన సూచించారు.మాదకద్రవ్యాలకు దూరంగా ఉండాలనేది అన్ని మతాలు చెబుతున్న, యువత చెడుమార్గం పడుతుందని ఆయన పేర్కొన్నారు. మాదక ద్రవ్యాలకు వ్యతిరేకంగా తాము ఐదంచెల పోరాటం సాగిస్తామని లక్ష్మీ నరసింహం వివరించారు.

పిల్లలకు, తల్లిదండ్రులకు మధ్య దూరం పెరిగిందని, తల్లిదండ్రులు పిల్లలను పట్టించుకోవడం లేదని, దీనివల్ల పిల్లలు మద్యం, మాదకద్రవ్యాలకు అలవాటు పడి మత్తులో జోగుతున్నారని జైన మత ప్రతినిధి ఖుషీ జైన్ చెప్పారు. పిల్లలపై తల్లిదండ్రుల పర్యవేక్షణ కొరవడటం, ఒత్తిడికి లోనవడం వల్ల వారు మత్తుకు బానిసలవుతున్నారని ఆమె చెప్పారు. పిల్లలతో తల్లిదండ్రులు అనుబంధం పెంచుకొని వారిని వ్యసనాల బారిన పడకుండా చూడాలని ఖుషీ జైన్ సూచించారు.

మద్యం, మాదకద్రవ్యాలు, గంజాయి, మత్తు పదార్థాల వ్యసనాలకు బానిసలుగా మారొద్దని సిఖ్ విలేజ్ కేథలిక్ చర్చ్ ఫాదర్ అంతయ్య కోరారు. మనిషి శరీరం అంటే అది దేవుని నివాసమని బైబిల్ చెబుతుందని, అలాంటి దేవుడు నివాసమున్న శరీరంలోకి మత్తు పదార్థాలు తీసుకోవడం చాలా పెద్ద తప్పు అని అంతయ్య వ్యాఖ్యానించారు. డ్రగ్స్ పెడ్లర్లపై చర్యలు తీసుకొన మాదకద్రవ్యాలను పూర్తిగా నిర్మూలించాలని అంతయ్య సూచించారు.

నేడు సమాజంలో పెచ్చరిల్లిపోయిన మాదకద్రవ్యాల వినియోగానికి వ్యతిరేకంగా అన్ని మతాల గురువులు, మత పెద్దలు కలిసికట్టుగా ఏకతా సందేశం ఇవ్వాలని ఢిల్లీకి చెందిన ధార్మిక జనమోర్చా కన్వీనర్ ముహ్మద్ సలీం ఇంజినీర్ కోరారు. సమాజ హితం కోసం పనిచేసేలా అన్ని మతాల ధర్మగురువులతో కలిసి ధార్మిక జనమోర్చాను 2001లో ఢిల్లీలో ప్రారంభించామని ఆయన చెప్పారు. దేశం కోసం సమాజం కోసం తామంతా కలిసి పనిచేయాల్సిన సమయం ఆసన్నమైందన్నారు. మత్తు పదార్థాలకు వ్యతిరేకంగా, మానవత్వం, నైతిక విలువలను పెంపొందేలా అన్యాయాలు, అత్యాచారాలకు వ్యతిరేకంగా తామంతా కలిసి పోరాడుతామని సలీం ఇంజినీర్ చెప్పారు. మతాలు వేరైనా ఎలాంటి అనుమానాలు లేకుండా ఒకరినొకరు గౌరవించుకునేలా డ్రగ్స్ కు వ్యతిరేకంగా కలిసి పోరాడుదామని ఆయన పిలుపునిచ్చారు. మద్యం, మాదకద్రవ్యాల వల్ల ఏటా లక్షలాదిమంది ఆత్మహత్యలు చేసుకుంటున్నారని ఆయన ఆందోళన వ్యక్తం చేశారు.

తెలంగాణలో డ్రగ్స్ ను సమూలంగా నిర్మూలించేందుకు అందరూ కలిసి రావాలని తెలంగాణ యాంటీ నార్కొటిక్స్ బ్యూరో డీఎస్పీ సుబ్బరామిరెడ్డి కోరారు. పిల్లలపై తల్లిదండ్రుల పర్యవేక్షణ కొరవడటం, ఒత్తిడి, ఒంటరితనం, ప్రేమ వైఫల్యం, క్రమిశిక్షణ లోపించడం వల్ల యువత డ్రగ్స్ కు బానిసలుగా మారుతున్నారని ఆయన చెప్పారు. ధూమపానం, గంజాయి, సింథటిక్ డ్రగ్స్ తీసుకుంటూ యువత మత్తులో జోగుతున్నారని ఆయన పేర్కొన్నారు. డ్రగ్ కల్చర్ హైదరాబాద్ నుంచి గ్రామాలకు కూడా పాకుతుందన్నారు. డ్రగ్స్ నిరోధానికి తాము పాఠశాలలు, కళాశాలల్లో యాంటీ డ్రగ్స్ కమిటీలను ఏర్పాటు చేశామని చెప్పారు.

హిందూ, ముస్లిం, క్రైస్తవ, జైన మతాలు అన్నీ కూడా మాదక ద్రవ్యాలకు వ్యతిరేకమేనని ఇస్లామిక్ కాలమిస్ట్ ముహ్మద్ ముజాహిద్ చెప్పారు. దేవాలయాలు, మసీదులు, చర్చ్ లు, జైన మందిరాల్లో ఆథ్యాతిక బోధనలే కాకుండా సమాజాన్ని సన్మార్గంలో నడిపేందుకు కావాల్సిన సూచనలు, సలహాలను యువతకు అందించాలని ఆయన కోరారు.

డ్రగ్స్ తీసుకోవడం వల్ల ఓ యువకుడు మృత్యువాత పడి, తల్లిదండ్రులకు కడుపుకోత మిగిల్చిన వైనంపై వీడియో చిత్రాన్ని తెలంగాణ యాంటీ నార్కొటిక్స్ బ్యూరో ప్రదర్శించింది. డ్రగ్స్ మహమ్మారి బారిన పడి యువత ఏ విధంగా నష్టపోతుందనే విషయంపై వీడియోలో ప్రదర్శించారు.