ఒక మఖ్దూమ్ మొహియుద్దీన్ కవిత
ఈ రోజు, స్వాతంత్య్ర సమర యోధుడు, ఉర్దూ కవి, కార్మిక నాయకుడు, హైదరాబాద్ సంస్థానంలో కమ్యూనిస్టు ఉద్యమ నిర్మాత మఖ్దూమ్ మొహియుద్దీన్ పుట్టినరోజు.
ఇది యుద్ధం...స్వాతంత్య్ర సమరం !
-మఖ్ధూమ్ మొహియుద్దీన్
(‘ఏ జంగ్ హై ..జంగ్ ఏ ఆజాది’ కి అనుసృజన: గీతాంజలి)
******
అవును ఇది యుద్ధం… ఇది సమరం! స్వాతంత్య్రపు జండా నీడలో జరుగుతున్న యుద్ధం !
మేం భారత దేశ ప్రజలం
నిరంకుశ పాలనలో నలిగిపోయే నిస్సహాయులం..
స్వాతంత్య్ర కాంక్షాపరులం
ఇరుకిరుకు ఊపిరాడని అద్దె ఇళ్లల్లో..దారిద్య్రంలో మగ్గిపోతున్నవాళ్ళం !
ఇది యుద్ధం.. స్వాతంత్య్రం కోసం జరుగుతున్న యుద్ధం !
ఈ భూగోళం అంతా మాదే ..
తూర్పు పడమర,ఉత్తరం, దక్షిణం…అన్ని దిక్కులు మావే !
మేం ఆఫ్రికన్లం..అమెరికన్లం...చైనీయులమూ మేమే !
మేం భారత దేశపౌరులం.. సాహసవంతులం.. మాదేశంలోనే అణిచివేయబడుతున్న సైనికులం !
మేం...దృఢమైన ఉక్కు శరీరపు ముడుతలం !
అవునిది మా యుద్ధం! స్వాతంత్ర్యపు జండా నీడలో జరుగుతున్న యుద్ధం !
అసలు యుద్ధం పేరుతో జరిగిన యుద్ధం...
ఒక యుద్ధమేనా ?
శాంతినివ్వని యుద్ధం ?
శత్రువుని ఆకాశంలో నక్షత్రం గా చూపని యుద్ధం ఒక యుధ్ధమేనా అసలు ?
పౌరులకు స్వరాజ్యమే లేని స్వరాజ్యం ఏమిటి...ఎందుకు ?
కార్మికుడు రాజ్య పాలన చేయలేని స్వాతంత్య్రం ఎందుకు?
అందుకే ఇది మా యుద్ధం...స్వాతంత్య్రం కోసం జరిగే యుద్ధం !
మాకు తెలుసు, ఏదో ఒక రోజు అరుణోదయం తప్పక వస్తుంది ! ఇక అప్పుడు వినండి ..
స్వాతంత్య్రమే స్వతంత్య్ర గీతం పాడుతుంది !
ఎర్రెర్రని స్వాతంత్య్రపు జెండా రెప రెప లాడుతుంది !
కళ్లారా చూడండి ..
ఈ స్వాతంత్య్రపు ..స్వాతంత్య్రాన్ని !!
అవును .. మాదే నిజమైన యుద్ధం !
స్వాతంత్య్రపు జండా నీడలో..
స్వాతంత్య్రం కోసం జరిగే యుద్ధం !
(ఈ రోజు, స్వాతంత్య్ర సమర యోధుడు,ఉర్దూ కవి,కార్మిక నాయకుడు,హైదరాబాద్ సంస్థానంలో కమ్యూనిస్టు ఉద్యమ నిర్మాత మగ్దుమ్ మొహియుద్దీన్ పుట్టినరోజు. మఖ్దూమ్ ఫిబ్రవరి 4,1908 లో తెలంగాణా రాష్ట్రం మెదక్ జిల్లాలో పుట్టారు. బతుకు తెరువు కోసం పెయింటింగ్స్ అమ్మడం..పత్రికలు అమ్మడం చేసినా తరువాత ఎం.ఏ చేశారు.యవ్వనంలో కార్మిక ఉద్యమాల వైపు,సాహిత్య సృజన వైపు ఆకర్షితులైనారు.