ఇక సెలవు అంటున్న ఉత్తరాల ఎర్ర డబ్బా
సెప్టెంబర్ 1 నుంచి లెటర్స్ రెడ్ బాక్స్ ఉండదన్న వార్త తెలిశాక కలిగిన దుఃఖం అంతా ఇంత కాదంటున్నారు ఓ ఉత్తరాల ప్రేమికుడు వలేటి గోపీచంద్;
By : The Federal
Update: 2025-08-14 05:41 GMT
(వలేటీ గోపీచంద్)
దశాబ్దాలుగా నిస్వార్థంగా, నిశ్శబ్దంగా, నిశ్చలంగా విశ్వసనీయ సేవలు అందించిన భావోద్వేగాల నేస్తం ఇక కనిపించదు. మన ముత్తాతలు, తాతలు, నాన్నల కాలం నాటి నుంచి మన ఇళ్లకు దగ్గరలోనో, వీధి చివర్ల లోనో, పోస్ట్ ఆఫీస్ దగ్గరో అభిమానం తో ఎదురు చూసిన నెచ్చెలి. ప్రేమలు, ఆత్మీయతలు, అనుబంధాలు, సుఖాలు, దుఃఖాలు మోసుకొచ్చిన సంధాన కర్తగా, సేవలు అందించిన స్నేహశీలి ఈ ఉత్తరాల పెట్టె.. ఆశల కబుర్లు మోసుకు వచ్చి మనస్సుల్లో సంతోషాల పంచిన మిత్రుడు 'నేను ఇక కనిపించను' అంటే ఎలా ఉంటుందో ఊహించటం కష్టం. అది తెలియని, చెప్పలేని బాధ.
ఒకటా, రెండా చెప్పటానికి...
సుదూర తీరాలలో ఉన్న బంధువులు, మిత్రులకు మన ఇంటిల్లిపాది విషయాలను మోసుకు వెళ్ళింది.అలాగే తీసుకు వచ్చింది. శుభ వార్తలు, పెళ్లి శుభలేఖలు, పరీక్షా ఫలితాలు, ఉద్యోగ అవకాశాలు, ఉద్యోగం వచ్చిందనే తియ్యని కబురు ఇలా ఎన్నో మోసిన సమ్మోహన పెట్ట ..ఎర్ర డబ్బా..కాదు కాదు.. మన జీవనం కు లింకు లంకె కదా...ప్రేమికులకు హృదయ స్పందన... సరిహద్దు సైనికులకు తమ వారి నుంచి వచ్చే ఒక శ్వాస అయింది కదా. అప్పుడప్పుడు కన్నీటి వార్తలను కూడా దిగమింగి చేర్చింది. ఒక్కసారి చేతి ముని వేళ్ళతో తనలో జార విడిచిన తరువాత , తిరుగు సమాధానం వచ్చే వరకు వేచి చూడని వారు ఉండరు కదా
బాబూ వీధి మూలన ఉన్న డబ్బాలో ఈ ఉత్తరం కాస్త వేసి రామ్మా ..అల్లుడు దగ్గర నుంచి ఉత్తరం ఏమైనా వచ్చిందా...అబ్బాయి ఏమన్నా ఉత్తరం రాశాడా..ఈ మాటలు పాత సినిమాల్లోనే వినిపిస్తాయి. కనిపిస్తాయి. అంతే కదా.
ఇక ఆకాశవాణి, దూరదర్శన్, దిన, వార పత్రికలు అన్నీ తమ శ్రోతలు, ప్రేక్షకులు, పాఠకులకు కూడా జాబులు.. జవాబులు కార్యక్రమాలు,, శ్రోతల ఉత్తరాలు వంటి శీర్షికలు కు పేర్లు మార్చుకోక తప్పదు మరి..
కాలం మారి కార్డు, ఇన్లాండ్ లెటర్ ,కవర్ అన్నీ మాయం. ఇవి లేక పోతే ఇక అవి వేసే ఎర్ర డబ్బా అవసరం పోయింది. అంతే ఇప్పుడు ఈ డబ్బా మాయం. మనము మరచి పోవటం కష్టమే. ఎందుకంటే ఇది మన హృదయ స్పందన గా ఉండేది కదా...లోహపు పెట్టే కానీ మనిషి తనం నింపుకున్నది. పైగా అందరి కష్టసుఖాలు, సంతోషాలు , అభిప్రాయాలు అత్యంత గోప్యంగా మోసిన పెట్టె . మామూలిది కాదు.. కవుల కలాల్లో , సినిమాల్లో , సాహిత్యం లో భాగమైంది కదా. ఇక అన్నీ పోస్ట్ చేయని ఉత్తరాలే . జీవన ప్రయాణం లో భాగమైన పెట్టే కదా...ఎలా మరచి పోగలం..సాధ్యమా.. సెప్టెంబర్ ఒకటి నుంచి కంటికి కనిపించక పోవచ్చు కానీ మన తరం జీవించి నంతా కాలం మన హృదయాల్లో మాత్రం పదిలం కదా.
ఏ సృజన శీలి సృష్టించా రో తెలియదు కానీ...చుక్క నీరు లోపలికి పోదు. గాలివాన కదపలేదు. కుంభవృష్టి అయినా, జోరు వర్షం అయినా , ముసురు పట్టినా, కొద్దిచెమ్మ కూడా తగల నివ్వదు. తల్లి సంకన చంటిపిల్లలు ను పెట్టుకుని కాపాడినట్లు చూస్తుంది. గాలికి బెదరదు. ఎగరదు. దానిలో కార్డు, ఇన్లాండ్ లెటర్, కవర్ వేయటం ఒక సరదా. వాటిని తీస్తున్నప్పుడు చూడటం అదో సరదా.
(రచయిత- ఆకాశవాణి సీనియర్ ప్రోగ్రామ్ ఎగ్జిక్యూటివ్ (రిటైర్డ్), ఆచార్య ఎన్జీరంగా వ్యవసాయ విశ్వవిద్యాలయం పూర్వవిద్యార్థుల సంఘం కన్వీనర్)