గద్దర్ సంస్మరణ సభ అక్కడే ఎందుకు జరిగింది?

-రమణాచారి

ఆగస్టు ఆరో తారీఖున గద్దర్ సంస్మరణ సభ ఈ స్థూపం వద్దనే జరపడం ప్రాధాన్యత సంతరించుకున్నది. గద్దర్ వర్ధంతి సభ నిర్వాహణకు అధ్యక్షులుగా కవ్వ లక్ష్మారెడ్డి, కన్వీనర్ గా మేకల వీరన్న యాదవ్ లతో కమిటీ ఏర్పడి హుస్నాబాద్ స్థూపం వద్ద పెరిగిన కంపచెట్లను తొలగించి, సమాంతరంగా చదును చేసి పూర్తిగా శుభ్రం చేసి అక్కడే వర్ధంతి ఘనంగా నిర్వహించారు. మట్టిలో కోరుకుపోయిన క్వింటాళ్ల బరువున్న సుత్తి కొడవలికి ఎర్ర రంగు వేసి నిలబెట్టారు.అనేక ఆటంకాలు, తొలగని భయాందోళన మధ్య సభా వేదిక ఏర్పాటు చేసి గద్దర్ సంస్మరణ సభ నిర్వహించారు. హుస్నాబాద్ అమరుల స్థూప శిథిలాల దగ్గర నిర్వహించిన ఈ సభకు అమరుల కుటుంబ సభ్యులు, అభిమానులు పెద్ద ఎత్తున తరలివచ్చి తమ జ్ఞాపకాలను తలపోసుకున్నారు. రాష్ట్ర మంత్రి పొన్నం ప్రభాకర్ ముఖ్యఅతిథిగా పాల్గొని ప్రసంగించారు. స్థూపాన్ని తిరిగి నిర్మించాలని సభకు వచ్చిన ప్రజలు మంత్రికి వినతి పత్రాలు అందజేశారు. దశాబ్దాల కాలం పాటు, కంపచెట్ల మధ్య కనిపించకుండా ఉండిపోయిన స్మారక స్థూపం జ్ఞాపకాలు, రూపాన్ని ప్రజలు చూసి ఉద్విగ్నతకు లోనయ్యారు. జ్ఞాపకాలను నెమరు వేసుకున్నారు.ఫోటోలు దిగారు. సెల్ఫీలు తీసుకున్నారు. కంటతడి పెట్టుకున్నారు. అయినా వారి ముఖాల్లో ఏదో తెలియని ఆనందంతోణికిసలాడింది. కమ్యూనిస్టుపార్టీలు , విప్లవ పార్టీలు తమ ఉద్యమాల్లో, పోరాటాలలో అమరుల స్మృత్యర్థం స్థూపాలు నిర్మించడం ఆనవాయితీ. ప్రజల హక్కుల కోసం, వనరుల రక్షణ కోసం, స్వేచ్ఛ స్వతంత్రాల కోసం, దోపిడీ పీడనలకు వ్యతిరేక పోరాటంలో అసువులు బాసిన వారి గుర్తులే స్థూపాలు.