అప్పుడే సమరానికి సై అంటున్నారు
వైఎస్సార్‌ కాంగ్రెస్‌ పార్టీ సమరానికి సై అంటోంది. ఇప్పటికే ఎమ్మెల్సీలు, ఎమ్మెల్యేలతో వైఎస్సార్‌సీపీ అధ్యక్షులు వైఎస్‌ జగన్‌ సమీక్ష నిర్వహించారు.
ఆంధ్రప్రదేశ్‌లో ముఖ్యమంత్రిగా చంద్రబాబునాయుడు బాధ్యతలు స్వీకరించి ఒక్క రోజు గడిచింది. ఎన్నికల ఫలితాలు వెలువడి పది రోజులైంది. ఏ ప్రభుత్వమైనా పరిపాలన ప్రారంభించి కనీసం ఆరు నెలలు గడిస్తే పాలన తీరు ఎలా ఉంటుందో చెప్పగలం. అలా కాకుండా పది రోజుల్లోనే ఆందోళనలకు సిద్దం కావాలని ఎమ్మెల్సీలు, ఎమ్మెల్యేలు, ఎంపీలు, రాజ్యసభ సభ్యులు, ఇతర నేతలకు వైఎస్సార్‌సీపీ అధ్యక్షులు వైఎస్‌ జగన్‌ పిలుపు నివ్వడం ఆశ్చర్యాన్ని కలిగిస్తోంది.
ఇందుకు వైఎస్సార్‌సీపీ వారు చెబుతున్న కారణాల్లో ప్రధానమైనది వైఎస్సార్‌సీపీ కార్యకర్తలపై దాడులు. టీడీపీ అధికారంలోకి వచ్చిందని ప్రకటన రాగానే పలువురు మాజీ ఎమ్మెల్యేలు, ఎమ్మెల్సీల ఇండ్ల వద్దకు వెళ్లి రెచ్చగొట్టే విధంగా మాట్లాడటం, పలువురు కార్యకర్తలను బట్టలు విప్పదీసి మోకాళ్లపై కూర్చోబెట్టి దారుణంగా హింసించడం వంటి సంఘటనలు జరిగాయని, జరుగుతున్నాయని, దీనిని ఎదుర్కొనేందుకు వెంటనే సిద్ధం కావాలని జగన్‌ పిలుపు నిచ్చారు. జగన్‌ ఇచ్చిన పిలుపు మేరకు పార్టీలోని నాయకులు, కార్యకర్తలు ఆందోళనలకు సిద్ధమవుతున్నారు. ప్రతి నియోజక వర్గంలోను ఓడి పోయిన మాజీ ఎమ్మెల్యేలు, మాజీ మంత్రులు బాధితులను పరామర్శించి భరోసా ఇచ్చారు. అక్కడే మీడియాతో మాట్లాడుతూ తెలుగుదేశం పార్టీ అరాచకాలను సహించేది లేదని హెచ్చరికలు జారీ చేశారు. మరో పక్క మేధావులు, రాజకీయ విశ్లేషకులు పట్టుమని పది రోజులు కాకుండానే జగన్‌ ఈ విధమైన పిలుపు నివ్వడం సరైంది కాదని వ్యాఖ్యానిస్తున్నారు.
ఇప్పటి వరకు జగన్‌పై ఒక ముద్ర ఉంది. అధికారంలో ఉన్నన్ని రోజులు ప్రజల మధ్యకు వెళ్లలేదు. పైగా ఎమ్మెల్యేలు, మంత్రులకు సకాలంలో అపాయింట్‌మెంట్స్‌ కూడా ఇవ్వలేదు. ఏదైనా సమావేశాలకు వెళ్లాలంటే భారీ బందోబస్తు మధ్య గ్రామాల్లో ప్రజలు ముఖ్యమంత్రిని చూసే అవకాశం కూడా లేకుండా చేయడం ఏమిటనేది ప్రశ్న. ఎన్నికలకు ముందు జరిగిన సభల్లో పలువురు వ్యాదిగ్రస్తులను కలిసి వారికి వైద్య సాయం అందించేందుకు చర్యలు తీసుకున్నారు.