ఒడిశా షాడో సీఎం భార్యపై వేటు పడింది!

ఒడిశాలో షాడో ముఖ్యమంత్రి అని ఓ ఐఎఎస్ అధికారి ఉండేవారు గుర్తుందిగా.. ఆయన వీకే పాండియన్. ఆయన భార్య సుజాత ఆర్. కార్తికేయన్. ఈమే ఒడిశా ముఖ్యమంత్రి నవీన్ పట్నాయక్ ప్రభుత్వానికి అనుకూలంగా పని చేసేవారని పేరుంది. ఆమె భర్త పాండియన్ ఇటీవలే ఐఎఎస్ ఉద్యోగానికి రాజీనామా చేసి నవీన్ పట్నాయక్ టీమ్ లో చేరి బీజేడీ పార్టీలో కీలకంగా వ్యవహరిస్తున్నారు. భర్త అడుగుజాడల్లో నడవాలనుకున్నారో ఏమో కాని సుజాత కూడా బీజేడీ ప్రభుత్వానికి వంత పాడుతున్నారని నవీన్ పట్నాయక్ తో పొత్తులో ఉన్న బీజేపీ భావించింది. ఎక్కడ తేడా వచ్చిందో గాని సరిగ్గా ఎన్నికల సమయంలో ఆమెపై ఒడిశా బీజేపీ రాష్ట్ర శాఖ ఫిర్యాదు చేసింది. ఇక అంతే ఆమెను ఆఘమేఘాల మీద బదిలీ చేసి కేంద్ర ఎన్నికల సంఘం తన 'నిష్పాక్షికత'ను నిరూపించుకుంది.

ప్రభుత్వ ఉన్నతస్థాయి అధికారిణి సుజాత ఆర్‌.కార్తికేయన్‌ను బదిలీ చేస్తూ ఎన్నికల సంఘం ఓ నిర్ణయం తీసుకుంది. ప్రభుత్వ కార్యాలయాన్ని దుర్వినియోగం చేస్తున్నారంటూ బీజేపీ ఆమెపై ఫిర్యాదు చేసింది. ఈ ఫిర్యాదు అందిన గంటల వ్యవధిలోనే.. ప్రజా వ్యవహారాలకు సంబంధం లేని విభాగానికి తక్షణం బదిలీ చేస్తూ ఆదేశాలు ఇచ్చింది. ఒడిశా ముఖ్యమంత్రి, బీజేడీ అధినేత నవీన్‌ పట్నాయక్ సన్నిహితుడైన వీకే పాండియన్ సతీమణి సుజాతను బదిలీ చేయడం ప్రస్తుతం ఒడిశాలో హాట్ టాపిక్ గా మారింది.