ఇప్పటికైనా స్పెషల్ స్టేటస్ ఇవ్వండని డిమాండ్ చేసిన జాతీయ పార్టీ..
ఏపీ పున: వ్యవస్థీకరణ చట్టంలో పేర్కొన్నట్లుగా ఆంధ్రప్రదేశ్ కు ప్రత్యేక హోదా కల్పించాలని కాంగ్రెస్ పార్టీ ప్రధాన కార్యదర్శి జైరాం రమేష్..
By : The Federal
Update: 2024-06-12 07:47 GMT
ఆంధ్రప్రదేశ్‌కు ప్రత్యేక హోదాపై స్పష్టత ఇవ్వాలని ప్రధాని నరేంద్ర మోదీని కాంగ్రెస్ పార్టీ బుధవారం కోరింది. AP పునర్వ్యవస్థీకరణ చట్టం 2014 హామీని నెరవేర్చడంలో మోదీ ప్రభుత్వం వైఫల్యం గురించి కాంగ్రెస్ ప్రధాన కార్యదర్శి జైరాం రమేష్ ఏడేళ్ల క్రితం రాజ్యసభలో చేసిన తన ప్రసంగాన్ని సామాజిక మాధ్యమం ఎక్స్ లో పోస్ట్ చేశారు.
"2014 నాటి ఏపీ పునర్వ్యవస్థీకరణ చట్టం వాగ్దానాన్ని నెరవేర్చడంలో మోదీ ప్రభుత్వం వైఫల్యం గురించి నేను ఏడేళ్ల క్రితం రాజ్యసభలో ఈ ప్రసంగం చేశాను. దురదృష్టవశాత్తు, అది నేటికీ నిజమైంది" అని ఆయన అన్నారు.
"(చంద్రబాబు) నాయుడు గారు ఈ సమస్యను దూకుడుగా తీసుకుంటే తప్ప, ఈ ప్రధాన మంత్రి పనిచేస్తారనే ఆశ చాలా తక్కువ" అని రమేష్ అన్నారు. ఐదు విస్తృత అంశాలపై ప్రధాని స్పష్టత ఇవ్వాలని ఆయన డిమాండ్ చేశారు.
2014 మార్చిలో పవిత్ర నగరమైన తిరుపతిలో ప్రధాని హామీ ఇచ్చినట్లుగా ఆంధ్రప్రదేశ్‌కు ప్రత్యేక హోదా కల్పిస్తారా అని ఆయన ప్రశ్నించారు. "పోలవరం మల్టీపర్పస్ ఇరిగేషన్ ప్రాజెక్ట్‌కు పెండింగ్‌లో ఉన్న నిధులను విడుదల చేస్తారా? తన ప్రభుత్వం ప్రారంభించిన విశాఖపట్నం స్టీల్ ప్లాంట్ ప్రైవేటీకరణను ఆపివేస్తారా?" రమేష్ అన్నారు. ఆంధ్రప్రదేశ్‌లో ప్రధాన కార్యాలయంగా ఉండాల్సిన కొత్త సౌత్ కోస్ట్ రైల్వే జోన్‌ను ప్రధానమంత్రి అమలు చేస్తారా అని రమేష్ ప్రశ్నించారు.
కడప స్టీల్ ప్లాంట్, దుగ్గిరాజపట్నం పోర్టు, కాకినాడ పెట్రో కాంప్లెక్స్‌, రాష్ట్రానికి వ్యవసాయ విశ్వవిద్యాలయం సహా ఏపీ పునర్వ్యవస్థీకరణ చట్టంలోని పలు హామీలను పదేళ్లుగా కాలయాపన చేసిన బీజేపీ ప్రభుత్వం కనీసం ఇప్పుడైన అమలు చేస్తుందా? అని కాంగ్రెస్ కార్యదర్శి ఎక్స్ లో ప్రశ్నించారు.
ఆంధ్రప్రదేశ్ ముఖ్యమంత్రిగా చంద్రబాబు నాయుడు ప్రమాణ స్వీకారోత్సవం రోజున రమేష్ ఈ వ్యాఖ్యలు చేయడం గమనార్హం. ప్రస్తుతం టీడీపీ ఎన్డీఏ ప్రభుత్వంలో భాగస్వామిగా ఉంది.