హైదరాబాద్‌లో కోవిడ్ పాజిటివ్ కేసు, గాంధీలో 30 పడకల ప్రత్యేక వార్డు

ముందు జాగ్రత్త చర్యగా గాంధీ ఆసుపత్రిలో 30 పడకల కోవిడ్ వార్డును ఏర్పాటు చేశారు. ఈ వైరస్ చాలా బలహీనంగా ఉన్నందున ప్రమాదం తక్కువగా ఉందని గాంధీ ఆసుపత్రి వైద్యులు చెప్పారు.ఈ వైరస్ పట్ల ప్రజలు భయపడవద్దని అధికారి కోరారు. ఆరోగ్య అధికారులు అత్యవసర సమావేశం ఏర్పాటు చేశారు. తెలంగాణ కోవిడ్-19 పాజిటివ్ కేసును నిర్ధారించింది.ఈ సంవత్సరం కోవిడ్ మరణాలు మరియు తీవ్రమైన అనారోగ్యాలకు కారణమైన దాని మునుపటి వైవిధ్యాలకు సమానం కాదని తెలంగాణ ప్రజారోగ్య డైరెక్టర్ డాక్టర్ రవీందర్ నాయక్ చెప్పారు.

హైదరాబాద్ నగరంలోని కూకట్‌పల్లిలో ఓ వైద్యుడికి కోవిడ్-19 పాజిటివ్ నిర్ధారణ అయింది.తెలంగాణ రాష్ట్ర ప్రజారోగ్య అధికారులు శుక్రవారం కోవిడ్-19 పాజిటివ్ కేసును నిర్ధారించారు. దేశంలోని బహుళ రాష్ట్రాలు, సింగపూర్, థాయిలాండ్ దేశాల్లో ఇటీవల కోవిడ్ కేసులు క్రమంగా పెరుగుతున్నాయి.ప్రస్తుత కోవిడ్ ఇన్ఫెక్షన్లు ప్రాణాంతకమని చెప్పడానికి ఎలాంటి ఆధారాలు లేవని తెలంగాణ రాష్ట్ర ప్రజారోగ్య డైరెక్టర్ డాక్టర్ రవీందర్ నాయక్ ‘ఫెడరల్ తెలంగాణ’కు చెప్పారు. ఈ కోవిడ్ సాధారణ జలుబును పోలి ఉంటుందని, ప్రజలు భయపడకూడదని డాక్టర్ రవీందర్ నాయక్ కోరారు.

మేడ్చల్-మల్కాజ్‌గిరి జిల్లా వైద్య, ఆరోగ్య అధికారి డాక్టర్ సి.ఉమా గౌరి కోవిడ్-19 పాజిటివ్ కేసు నమోదును నిర్ధారించారు. కోవిడ్ పాజిటివ్ వచ్చిన వ్యక్తి కూకట్‌పల్లిలోని వివేకానంద నగర్‌లో నివసిస్తున్న పల్మోనాలజిస్ట్ అని గుర్తించారు.ఐదు రోజులుగా కోవిడ్ ఐసోలేషన్ ప్రోటోకాల్‌లను అనుసరించారని వైద్యులు చెప్పారు. కాంటాక్ట్ ట్రేసింగ్ పూర్తయిందని, ఇప్పటివరకు, వారి కుటుంబ సభ్యులు లేదా ఇతరుల్లో ఎలాంటి కోవిడ్ లక్షణాలు కనిపించలేదు. ప్రస్తుతం కోవిడ్ నుంచి రోగి పూర్తిగా కోలుకున్నాడని వైద్యులు వివరించారు. కోవిడ్ లక్షణాలు కనిపిస్తే సమీపంలోని పీహెచ్‌సీ,యూపీహెచ్ సీ, బస్తీ దవాఖానా లేదా పల్లె దవాఖానాలను సందర్శించాలని ప్రజలకు వైద్యులు సూచించారు.

కోవిడ్ -19 భద్రతా ప్రోటోకాల్‌లను పాటించాలని, మాస్క్‌లు ధరించడం, సామాజిక దూరాన్ని పాటించడం,చేతుల పరిశుభ్రతను పాటించాలని ప్రజలకు సలహాలు జారీ చేశారు.జ్వరం, తలనొప్పి, గొంతు నొప్పి, పొడి దగ్గు, అలసట, కొన్నిసార్లు విరోచనాలు వంటి మునుపటి వెర్షన్‌ల మాదిరిగానే కోవిడ్ లక్షణాలు ఉన్నాయని వైద్యులు చెప్పారు. ప్రాథమిక పరిశుభ్రత పాటించాలని, రద్దీగా ఉండే ఇండోర్ ప్రదేశాల్లో తిరగడం నివారించాలని కోరారు.

దేశ రాజధాని నగరమైన ఢిల్లీలో కోవిడ్-19 కేసులు పెరుగుతుండటంతో కేంద్ర వైద్య ఆరోగ్య శాఖ అధికారులు అప్రమత్తమయ్యారు. దేశంలో కోవిడ్ వ్యాప్తిపై వైద్యాధికారులు అత్యవసర సమావేశం ఏర్పాటు చేశారు.ఢిల్లీలో కోవిడ్-19 కేసులు అకస్మాత్తుగా పెరిగాయని, ఒకే రోజులో 23 కొత్త ఇన్ఫెక్షన్లు నమోదయ్యాయని ఆందోళన వ్యక్తం చేశారు.దేశవ్యాప్తంగా మొత్తం 257 యాక్టివ్ కేసులు నమోదయ్యాయి. కేరళ, మహారాష్ట్ర, తమిళనాడు , ఆంధ్రప్రదేశ్, తెలంగాణ రాష్ట్రాల్లో కొత్త కేసులు వెలుగుచూశాయి.కరోనా వైరస్ తిరిగి పుంజుకునే అవకాశం ఉందని వైద్యులు ఆందోళన వ్యక్తం చేశారు.

భారతదేశం అంతటా కోవిడ్-19 కేసులు క్రమంగా పెరుగుతుండటం అందరినీ ఆందోళనకు గురిచేస్తోంది. అన్ని రాష్ట్రాలలోకెల్లా కేరళలో అత్యధిక కేసులు వెలుగుచూశాయి. తరువాత మహారాష్ట్ర, తమిళనాడు రాష్ట్రాల్లో అధిక కోవిడ్ కేసులు నమోదయ్యాయి.మే నెలలో ఇప్పటివరకు కేరళలో 182 కేసులు వెలుగుచూశాయి. కొట్టాయంలో 57, ఎర్నాకులంలో 34, తిరువనంతపురంలో 30 కోవిడ్ కేసులు నమోదయ్యాయి.