సీఎంఆర్‌ఎఫ్ అప్లికేషన్ డేట్ విడుదల... ఎలా అప్లై చేయాలంటే?

సీఎం రిలీఫ్ ఫండ్ (సీఎంఆర్‌ఎఫ్) కోసం జూలై 15 నుంచి ఆన్లైన్‌ లో దరఖాస్తులను స్వీకరించనున్నట్లు తెలంగాణ ప్రభుత్వం ప్రకటించింది. సీఎం రేవంత్‌ రెడ్డి ఆదేశాల మేరకు నిధులను పారదర్శకంగా వినియోగించేలా సీఎంఆర్‌ఎఫ్‌ దరఖాస్తులను ఆన్లైన్‌ లో స్వీకరించేందుకు ప్రభుత్వం నిర్ణయం తీసుకుంది. ఇందుకోసం సెంటర్ ఫర్ గుడ్ గవర్నెన్స్ అధికారిక వెబ్సైట్‌ ను రూపొందించగా, మంగళవారం సచివాలయంలో ముఖ్యమంత్రి వెబ్సైట్‌ ను ప్రారంభించారు. గత రాష్ట్ర ప్రభుత్వ హయాంలో సీఎంఆర్‌ఎఫ్ నిధులు మళ్లించారనే ఆరోపణల నేపథ్యంలో కాంగ్రెస్ ప్రభుత్వం కొత్త విధానాన్ని రూపొందించింది.

ఎలా అప్లై చేయాలి...?

ఇక నుంచి సీఎంఆర్‌ఎఫ్ దరఖాస్తులను అధికారిక వెబ్సైట్‌ లో అప్‌లోడ్ చేయాలని సీఎం కార్యాలయం (సీఎంఓ) తెలిపింది. ఎమ్మెల్యేలు, ఎమ్మెల్సీలు కూడా సీఎంఆర్‌ఎఫ్ దరఖాస్తుదారుల వివరాలను జతచేసి వారి సిఫార్సు లేఖను అప్లోడ్ చేయాలి. దరఖాస్తుదారు ఆన్లైన్‌ దరఖాస్తులో బ్యాంక్ ఖాతా వివరాలను కూడా పేర్కొనాలి. సీఎంఆర్‌ఎఫ్ వెబ్సైట్ లో అప్లికేషన్ అప్లోడ్ చేసిన తర్వాత దరఖాస్తుదారు కోడ్‌ ని అందుకుంటారు. కోడ్ ఆధారంగా, దరఖాస్తుదారు ఒరిజినల్ మెడికల్ బిల్లులను సెక్రటేరియట్‌ కు సమర్పించాలి.

ధ్రువీకరణ కోసం ఆన్లైన్‌ దరఖాస్తులు కూడా సంబంధిత ఆసుపత్రులకు పంపబడతాయి. సీఎంఆర్‌ఎఫ్ దరఖాస్తు ఆమోదించబడి, వివరాలు ధృవీకరించబడి, సరైనవిగా నిరూపించబడిన తర్వాత మాత్రమే చెక్కులు సిద్ధం చేయబడతాయి. చెక్కుపై దరఖాస్తుదారుడి బ్యాంక్ ఖాతా నంబర్ ముద్రించబడుతుంది. ఆ తర్వాత ప్రజాప్రతినిధులు స్వయంగా దరఖాస్తుదారులకు చెక్కులను అందజేస్తారు. ఈ కొత్త విధానం చెక్కు దుర్వినియోగాన్ని నిరోధించవచ్చు అని అధికారులు చెబుతున్నారు. సీఎంఆర్‌ఎఫ్ వెబ్సైట్ లింక్ ఇదే - https://cmrf.telangana.gov.in/