కెసిఆర్ కు డబల్ బెడ్ రూం ఇల్లు కట్టిస్తానన్న రేవంత్. ఎక్కడ, ఎందుకు?

కాంగ్రెస్ జనజాతర సభలో ముఖ్యమంత్రి రేవంత్ రెడ్డి ఇటీవల మాజీ ముఖ్య మంత్రి బిఆర్ ఎస్ అధినేత కుల్వకుంట్ల చంద్రశేఖర్ రావు  చేస్తున్న విమర్శలకు ఘాటైన సమాధానం చెప్పారు. ముఖ్యంగా కెసిఆర్ వాడుతున్న అసభ్య పదజాలానికి ఘాటైన జవాబు చెప్పారు. మరీ ముఖ్యంగ మూడు రోజుల కిందట కరీంనగర్ లో ఏర్పాటు చేసిన సభలో ప్రసంగిస్తూ కేసిఆర్ చాలా అభ్యంతరకరమయిన పదజాలం వాడి కాంగ్రెస్ ను, తనపి దూషించిన విషయం రేవంత్ ప్రస్తావించారు. రేవంత్ ఇలా ప్రసంగం ప్రారంభించారు...

‘‘ఓ నక్క మొన్న సూర్యాపేటకు నిన్న కరీంనగర్ కు పోయింది,అక్కడ వెంట్రుక కూడా పీకలేరని అనింది. పదేళ్లపాటు తెలంగాణను పీడించి దోచుకొని రాష్ట్రాన్ని సర్వనాశనం చేశారు. మేం కొంతకాలం సంయమనం పాటించాం, మర్యాదపూర్వకంగా మాట్లాడాం, కానీ కేసీఆర్ మాటలకు లుంగీ లాగి చర్లపల్లిలో చిప్పకూడు తినిపిస్తా’’ అని రేవంత్ హెచ్చరించారు.

‘‘పదేళ్లలో నీవు పేదలకు డబుల్ బెడ్రూంలు  కట్టిస్తానన్నావు. కట్టించలేదు.   నీకు డబుల్ బెడ్రూం ఇల్లు కట్టిస్తా. నీకూతరు అల్లుడు వస్తే ఉండటానికి వీలుగా, నీ కొడుకు కోడలు వస్తే ఉండటానికి వీలుగా డబల్ బెడ్ రూం కట్టిస్తా. ఎక్కడ, చర్లపల్లి జైలులో ’’ అని సీఎం అన్నారు.

పదేళ్ల అధికారంలో కేసీఆర్ వందేళ్ల విధ్వంసం సృష్టించాడని రేవంత్ ఆరోపించారు. ‘‘మోదీ రైల్వే కోచ్ ఫ్యాక్టరీ ఇవ్వలేదు, కాంగ్రెస్ పార్టీ ఇచ్చిన హామీలను అమలు చేయలేదు. బీజేపీని బొంద పెట్టే వరకు నిద్రపోకూడదు’’ అని రేవంత్ చెప్పారు.