కర్ణాటక నుంచి ఉత్తర కర్ణాటక విడిపోతుందా ?

ఇటీవల బెలగావిలో జరిగిన శాసనసభ సమావేశంలో ఈ ప్రాంతంపై జరిగిన ప్రత్యేక చర్చలో ఈ ప్రాంతానికి చెందిన ఎమ్మెల్యేలు, పార్టీలకతీతంగా ఉత్తర కర్ణాటక సమస్యల గురించి మాట్లాడారు.

ఉత్తర కర్ణాటకకు ప్రత్యేక రాష్ట్ర ఏర్పాటు కోసం శాసనసభలో పిలుపు వచ్చే అవకాశం ఉందని తెర్డాల్ బీజేపీ ఎమ్మెల్యే సిద్దూ సవాడి హెచ్చరించారు. ఎగువ కృష్ణా ప్రాజెక్టు (యుకెపి)కి సంబంధించిన సమస్యలను మీరు పరిష్కరించకపోతే, ఉత్తర కర్ణాటకకు ప్రత్యేక రాష్ట్ర హోదా కోసం డిమాండ్లు వస్తాయని సవాడీ హెచ్చరించారు.

మరోవైపు, ఆర్టికల్ 371 (జె) ప్రకారం కళ్యాణ కర్ణాటకకు ప్రత్యేక హోదా ఇవ్వాలని నవలగుండ్ కాంగ్రెస్ ఎమ్మెల్యే ఎన్‌హెచ్ కోనారెడ్డి కోరారు. “ కిత్తూరు కర్ణాటక అభివృద్ధి చెందిందనే ఊహ ఉందో లేదో నాకు తెలియదు. వాస్తవమేమిటంటే కిత్తూరు కర్ణాటక ప్రాంతం అత్యంత వెనుకబడిన ప్రాంతం’’ అని ఆయన అన్నారు.

బసవకల్యాణ్ ఎమ్మెల్యే శరణు సాలగర్ మాట్లాడుతూ.. వడియార్లు మైసూరు నగరాన్ని, కృష్ణ రాజసాగర్ డ్యామ్‌ను అభివృద్ధి చేసినప్పుడు ఉత్తర కర్ణాటకలో ఉన్నత పాఠశాలలు కూడా లేవు. మైసూరు, బెంగళూరు, తుమకూరు తరహాలో కలబురగి, యాద్గిర్, రాయచూర్‌లను అభివృద్ధి చేయడంలో ఈ ప్రభుత్వాలు ఎందుకు ఉదాసీనంగా వ్యవహరిస్తున్నాయి? కావేరికి ఉన్న ప్రాధాన్యత కృష్ణానదికి ఎందుకు లేదు? సాలగర్ డిమాండ్ చేశారు.

ఉత్తర కర్ణాటకకు చెందిన 91 మంది ఎమ్మెల్యేలు ఉన్నప్పటికీ ఉత్తర కర్ణాటక సమస్యలపై చర్చకు కేవలం రెండు రోజులు మాత్రమే కేటాయించారని ఫిర్యాదు చేశారు.

శరణగౌడ కందకూర్, శైలేంద్ర బెల్దాలే, చన్నారెడ్డి పాటిల్ తున్నూరు, మణప్ప వజ్జల్, అల్లమప్రభు పాటిల్, శ్రీనివాస మానె, నేమిరాజ్ నాయక్‌లతో సహా ఈ ప్రాంతానికి చెందిన ఎమ్మెల్యేలందరూ ఉత్తర కర్ణాటకను పీడిస్తున్న సమస్యలన్నింటినీ బెళగావి సమావేశంలో లేవనెత్తడం అసాధ్యమని అంగీకరించారు. ఎందుకంటే ఈ ప్రాంతం ఇతర ప్రాంతాల ఎమ్మెల్యేలకు ఓ రెండు వారాల పర్యటన మాత్రమే అని ఇక్కడి ప్రజాప్రతినిధులు, ప్రజల భావన. ఈ అంశంపై ఒక అడుగు ముందుకేసి, ఈ ప్రాంత ప్రజాప్రతినిధులందరూ ఆందోళనకు దిగాలని కాంగ్రెస్ ఎమ్మెల్యే ప్రకాష్ కోలివాడ్ పిలుపునిచ్చారు.

దక్షిణ కర్ణాటక ప్రాంతంలో ఏ ప్రాజెక్ట్ లు ప్రారంభించిన రోజుల్లో పూర్తవుతాయితాయని, అదే ఉత్తర కర్ణాటక ప్రాంతంలోని కలసా బండూరి ప్రాజెక్ట్ క్లియర్ చేయడంలో మాత్రం జాప్యం చేస్తున్నారని విమర్శలు వస్తున్నాయి. రాష్ట్రంలో ఉన్న బీజేపీకి చెందిన ఎంపీలు, ఎమ్మెల్యేలు కేంద్రం నుంచి క్లియర్ లెన్స్ తీసుకురావాలని కాంగ్రెస్ ఎమ్మెల్యేలు అంటున్నారు.

“ఇప్పుడు కూడా ఆలస్యం కాలేదు. ఉత్తర కర్ణాటకకు ఈ లైఫ్‌లైన్ ప్రాజెక్ట్‌ను అమలు చేయాల్సిన అవసరాన్ని గురించి బీజేపీ శాసనసభ్యులు - ఎంపీలు కేంద్రాన్ని ఒప్పించాలి” అని షిగ్గావ్ నుంచి కొత్తగా ఎన్నికైన కాంగ్రెస్ ఎమ్మెల్యే యాసిర్ అహ్మద్ పఠాన్ అన్నారు. ఉత్తర కర్ణాటక ప్రాంత అభివృద్ధికి సమగ్ర పారిశ్రామిక విధానాన్ని రూపొందించాలని బీజేపీకి చెందిన మహేశ్ టెంగింకై డిమాండ్ చేశారు.

‘ఫెడరల్’‌కి అందుబాటులో ఉన్న సమాచారం ప్రకారం, ఉత్తర కర్ణాటక పారిశ్రామిక అభివృద్ధికి ప్రతిపాదనలు పుష్కలంగా ఉన్నాయి. బెలగావి, బళ్లారి, ధార్వాడ్, కలబురగి, విజయపుర, యాద్గిర్‌లలో రూ. 1.49 లక్షల కోట్ల విలువైన 119 పారిశ్రామిక ప్రాజెక్టులు ప్రతిపాదించారు. కానీ ఏవీ అమలు కాలేదు.

“ఎస్ఆర్ బొమ్మై (బీజేపీ మాజీ ముఖ్యమంత్రి బసవరాజ్ బొమ్మై తండ్రి) పరిశ్రమల మంత్రిగా ఉన్న సమయంలో కర్ణాటక ఇండస్ట్రియల్ ఏరియా డెవలప్‌మెంట్ బోర్డ్ (కేఐఏడీబీ) ద్వారా భూమిని సేకరించి ఈ ప్రాంతంలో పరిశ్రమల కోసం ల్యాండ్ బ్యాంక్ సృష్టించారు.

యాద్గిర్ జిల్లాలోని కడేచూర్-బాడియాల్ వద్ద కేఐఏడీబీ సేకరించిన 1,580 ఎకరాలు పెట్టుబడిదారుల కోసం ఇంకా అలాగే ఉన్నాయి. అదీకాక మరో 6,000 ఎకరాల భూమి నిరుపయోగంగా పడి ఉంది ”అని కర్ణాటక చాంబర్ ఆఫ్ కామర్స్ అండ్ ఇండస్ట్రీస్ మాజీ అధ్యక్షుడు వినయ్ జవలి చెబుతున్న మాట.

ఉత్తర కర్ణాటక ప్రాంత వాసుల ఆరోపణలను జాగ్రత్తగా పరిశీలిస్తే కొంత వాస్తవం ఉన్నట్లు కనిపిస్తుంది. 2006 నుంచి బెలగావిలో శీతాకాల అసెంబ్లీ సమావేశాలు నిర్వహించడం ఉద్దేశ్యం కూడా అదే. రాష్ట్రంలో రాజకీయంగా ఎటువంటి వివక్ష చూపించడం లేదని సందేశం స్థానికుల్లో నెలకొల్పడమే.

బెలగావి కర్ణాటకలో అంతర్భాగమని పొరుగున ఉన్న మహారాష్ట్రకు సందేశం పంపడానికి కూడా బెలగావిలోని సువర్ణ విధాన సౌధను 400 కోట్ల రూపాయలతో నిర్మించారు. అయితే, ఇటీవలి సంవత్సరాలలో బెలగావిలో శీతాకాల అసెంబ్లీ సమావేశాలను నిర్వహించే లక్ష్యం దారి తప్పినట్లు కనిపిస్తోంది.

అందుబాటులో ఉన్న సమాచారం ప్రకారం, బెలగావిలో ఇప్పటివరకు 13 శాసనసభ సమావేశాలను నిర్వహించడానికి ప్రభుత్వం రూ.154.30 కోట్లకు పైగా ఖర్చు చేసింది. 2006లో మొదటి సెషన్‌కు రూ.5 కోట్లు ఖర్చు చేయగా, 2024 సెషన్ కోసం ప్రభుత్వం రూ.19.30 కోట్లు ఖర్చు చేసింది. బెలగావిలో సెషన్ల నిర్వహణకు అయ్యే ఖర్చు సంవత్సరానికి పెరుగుతోంది. కానీ ఆ రెండు వారాల సమావేశాలు ఉత్తర కర్ణాటక ప్రాంతానికి ఏ విధంగానూ ఉపయోగపడలేదు.

తాను చేసిన వాగ్దానాలను నెరవేర్చే విషయంలో సీఎం సిద్ధరామయ్య భారీ సవాళ్లను ఎదుర్కొన్నారని చాలామంది కాంగ్రెస్ ఎమ్మెల్యేలు ఫెడరల్ కు పేరు చెప్పకుండా చెప్పారు. మౌలిక సదుపాయాల నిర్వహణ - అభివృద్ధి పనుల కోసం సుమారు రూ. 10,000 కోట్లు కేటాయించాలని లక్ష్యంగా పెట్టుకున్నందున, "సిద్దరామయ్య అనేక ఆర్థిక సవాళ్లను ఎదుర్కొంటున్నారు. ఉత్తర కర్ణాటకలో మౌలిక సదుపాయాల అభివృద్ధికి రూ. 4 వేల కోట్లు కేటాయిస్తారని ఆ ప్రాంతానికి చెందిన సీనియర్ కాంగ్రెస్ నాయకుడు అన్నారు.

రాష్ట్రం తన పేరు మార్చుకుని స్వర్ణోత్సవాలు జరుపుకుంటున్న తరుణంలో (మైసూర్ నుంచి) ప్రాంతీయ అసమతుల్యత సమస్య కాంగ్రెస్ ప్రభుత్వాన్ని వెంటాడుతోంది.

డిఎం నంజుండప్ప నేతృత్వంలోని ప్రాంతీయ అసమతుల్యత పరిష్కారానికి హై-పవర్ కమిటీ సిఫారసుల ఆధారంగా బెళగావి - కలబురగి డివిజన్‌లలోని 14 జిల్లాల మొత్తం అభివృద్ధి కోసం కాంగ్రెస్ ప్రభుత్వం రూ. 17,850 కోట్లు ఖర్చు చేసిందని సిద్ధరామయ్య సెషన్‌లో అంగీకరించారు.

“ఉత్తర కర్ణాటక ప్రాంతం అభివృద్ధి చెందకపోవడంపై సర్వత్రా అసంతృప్తి ఉంది. నంజుండప్ప కమిటీ సిఫార్సుల అమలు వల్ల తలెత్తే ప్రాంతీయ అసమానతలను పరిష్కరించడానికి ఏర్పాటు చేసిన గోవిందరావు కమిటీ నివేదిక అందిన వెంటనే ప్రభుత్వం ఉత్తర కర్ణాటక సమగ్రాభివృద్ధికి అవసరమైన చర్యలు తీసుకుంటుంది' అని సిద్ధరామయ్య ప్రత్యేక సచివాలయాన్ని ప్రకటించారు.