తెలంగాణ బీసీలు ఇప్పుడు ఏం చేయాలి

-పాపని నాగరాజు 

వెనుకబడిన తరగతులు (బీసీలు) తెలుగు సమాజంలో సంఖ్యాబలం కలిగిన శక్తి వంతులు. లక్షలాది హృదయాలు, కష్టజీవుల ఆశలు, భవిష్యత్తు ఇవన్నీ బీసీ సముదాయంలో ఉన్నాయి. కానీ, ఈ శక్తి రాజకీయ, సామాజిక, ఆర్థిక న్యాయాన్ని ఎందుకు సాధించలేకపోతోంది? కుల వివక్ష, అసమానతలు, ఆధిపత్య కులాల ఆధిక్యం బీసీలను వెనక్కి నెట్టుతున్నాయి. ఇటువంటి సమయంలో, బీసీలు తమ భవిష్యత్తును ఎలా రపుదిద్దుకోవాలి? ఈ దృష్టిలో ఆలోచనాత్మకంగా, పోరాట ఉత్సాహంతో, త్యాగ భావనను రేకెత్తించే శైలిలో మార్గం ఆలోచన చేయాలి. ఇది కేవలం ఆలోచనల సమాహారం కాదు ఇది ఒక విప్లవ జెండా, బీసీల స్థానాన్ని సమాజంలో బలోపేతం చేసేందు పోరాట పిలుపు.

సవాళ్ల నిజాన్ని అంగికరించు!: బీసీలు ఎదుర్కొంటున్న సవాళ్లు ఇనుము కోటల్లాంటివి. చారిత్రకంగా, దళితులకు ఉన్న తీవ్రమైన కుల వివక్ష లేక పోయిన, వారికి అసమానత ఉంది, ఆర్థిక వెనుకబాటుతనం వారి ఆశలను కుదించింది, విద్యా అవకాశాల కొరత వారి భవిష్యత్తును పరిమితం చేసింది. నేడు, ఈ సవాళ్లు రూపం మార్చినా, తీవ్రత తగ్గలేదు. ఈ కుల వ్యవస్థ ఈ దేశంలో అన్ని అణగారిన కులాల్లో కొతకత రూపంగా అవతరిస్తుంది. రాజకీయంగా, బీసీలు ఓటు బ్యాంకుగా గుర్తింప బడుతున్నారు, కానీ నిజమైన అధికారం వారి చేతిలో లేదు. ఆదిపత్య కులాల రాజకీయ పార్టీలు హామీలతో బీసీలను ఆకర్షిస్తాయి, కానీ నాయకత్వ స్థానాలు ఆధిపత్య కులాల వద్దే ఉంటాయి. బీసీ కులాలలో ఏ కులానికి ఆ కులం జనాధిక్యత గల వారే విడివిడిగా ఏర్పాడుతారే కానీ, వీరికి ఉమ్మడి ఐక్యత లోపించడం ఒక పెద్ద కారణం. పద్మశాలి, గొల్ల ` కురుమ, గౌడ, ముదిరాజు, మున్నూరు కాపు వంటి జనాధిక్యత గల కులాలు విడివిడిగా వీరి జనాభా ఎంత ఉంటె అంత ప్రాతినిధ్యం లేదని, వీరితో మిగితా బక్కపల్చని సామాజిక చైతన్యం తక్కువ ఉన్న వారిని వీరితో కలుపుకొని పోరాడుతూ, ఒక బలమైన శక్తిగా ఏకం కాలేకపోతున్నాయి. ఆర్థికంగా, బీసీలు వ్యవసాయం, చేతి`సేవ`వినొధం కలిగించే వృత్తులు, అసంఘటిత రంగంలో చిక్కుకున్నారు. ఐటీ, డిజిటల్‌ రంగాలు వేగంగా వృద్ధి చెందుతున్నాయి, కానీ ఈ అవకాశాలు బీసీలకు దూరం. గ్రామీణ ప్రాంతాల్లో నాణ్యమైన విద్య లేకపోవడం, ఉన్నత విద్యా సంస్థల్లో అవకాశాల కొరత వారిని వెనుకకు నెట్టుతోంది. సామాజికంగా, కుల వివక్ష బీసీల స్వీయగౌరవాన్ని దెబ్బతీస్తోంది. గ్రామీణ ప్రాంతాల్లో అతి తక్కువ జనాభాగల వారితో ఆలయ ప్రవేశం, వివిధ సహాపంక్తి బోజనాలతో పాటు అనే సామాజిక కార్యక్రమాల్లో ఆంక్షలు కొనసాగుతున్నాయి. అంతర్గతంగా, బీసీ ఉపకులాల మధ్య ఈ వివక్ష సమస్య జటిలం చేస్తోంది. ఈ సవాళ్లను ఎదుర్కోవడానికి కొంతలో కొంత అభివృద్ధి చెందిన బీసీలు త్యాగం చేయాలి. విభజనలను వీడి, ఐక్యత కోసం, సమన్యాన్యాయం కోసం పోరాడాలి. ఈ పోరాటం సమాజంలో వారి స్థానాన్ని మార్చే విప్లవంగా అవుతుంది.

రాజకీయ ఐక్యత - ఒక్కటై పోరాడు: బీసీల సంఖ్య బలం పెద్దది. వారు శక్తివంతులు. అయితే ఓటు బ్యాంకుగా పాలకులు చేసారు. కానీ ఈ శక్తి నిజమైన అధికారంగా మారలేదు. ఉపకులాల మధ్య విభజనలు పద్మశాలి, గొల్ల ` కురుమ, గౌడ, మున్నూరు కాపు, ఎంబీసీ, సంచారజాతులు, అసలే గుర్తింపులేని వారు, బీసీల శక్తిని చీల్చివేస్తున్నాయి. ఒక ఉపకులం ఎక్కువ రిజర్వేషన్‌ కోటా కోసం పోరాడితే, మరొకటి బలహీనుల జాబితాలో చేర్చాలంటుంది. ఈ విభజన బీసీలను బలహీనపరుస్తోంది. రాజకీయ ఐక్యత కోసం బీసీలు త్యాగం చేయాలి. వ్యక్తిగత ఆశలను వదులుకొని, సామూహిక లక్ష్యాల కోసం ఎవరికి వారుగా ఉన్నప్పటికి కలిసి నడవాలి. బీసీలు స్వతంత్ర ప్రత్యామ్నాయ రాజకీయ శక్తిగా ఎదగాలి. బీసీలు ఆధిపత్య కులాల రాజకీయ పార్టీల ఆధీనంలో ఉండకుండా, స్వంత గొంతుగా రూపొందించాలి. గ్రామీణ స్థాయి నుండి రాష్ట్ర స్థాయి వరకు త్యాగనీరతి గల నాయకత్వాన్ని పెంచడం అవసరం. బీసీ నాయకులు సంక్షోభంలో ఉన్న వ్యవసాయ రంగం - చేతివృత్తుల అభివృద్ధి పట్ల ఆధునిత టెక్నాలజి మేలవింప చేసే దృష్టితో స్థానిక సమస్యలను చూడాలి. అందుకు పరిష్కరించే రాష్ట్ర విధానాలను ప్రభావితం చేసే స్థాయికి ఎదగాలి. ఈ లక్ష్యం కోసం, బీసీ సంఘాలు సామాజిక, ఆర్థిక, రాజకీయ, సాంస్కృతిక అవగాహన కార్యక్రమాలు నిర్వహించాలి. యువతను ప్రత్యామ్నాయ రాజకీయ నాయకత్వంలోకి తీసుకురావడానికి శిక్షణ కార్యక్రమాలు, వర్క్‌షాప్‌లు అవసరం. ఈ త్యాగం కోరుతుంది, సమయం, శ్రమ, వనరులను వెచ్చించి, బీసీలు తమ శక్తిని బలోపేతం చేయాలి. ఈ పోరాటం ఒక విప్లవం. ఐక్యంగా నిలబడితే, రాజకీయ అధికారం వారి చేతిలోకి వస్తుంది.

ఆర్థిక ఉన్నతి మొదలు కావాలి! : ఆర్థిక బలం లేకుండా సామాజిక, సాంస్కృతికంగా అభివృద్ధి కాకుండా రాజకీయ గౌరవం సాధ్యం కాదు. బీసీలు వ్యవసాయం, చేతి వృత్తులను, పారిశ్రామికరంగం, అసంఘటిత రంగంలో చిక్కుకున్నారు. గ్రామీణ ప్రాంతాల్లో నాణ్యమైన విద్య లేకపోవడం, ఉన్నత విద్య, ఉద్యోగరంగంలో అవకాశాల తీవ్రకొరత వారిని వెనుకకు నెట్టుతోంది. సాంప్రదాయ కుల వృత్తులను వీడి, చేతి వృత్తులతో కొత్త రంగాల్లోకి అడుగు పెట్టాలి. బీసీ యువత ఐటీ, సైన్స్‌ వంటి రంగాల్లో నైపుణ్యాలను సొంతం చేసుకోవాలి. ప్రభుత్వమే కాదు పెద్దపెద్ద కార్పొరేట్‌ ప్రైవేటు సంస్థలు బీసీల కోసం సిఎస్‌ఆర్‌ ఫండ్‌ ద్వారా శిక్షణ కేంద్రాలను ఏర్పాటు చేయాలి. గ్రామీణ ప్రాంతాల్లో శిక్షణ కేంద్రాలు, స్కిల్‌ డెవలప్‌మెంట్‌ ప్రోగ్రామ్‌లు బీసీ యువతను ఆధునిక రంగాల్లోకి తీసుకొస్తాయి. వ్యవసాయం బీసీల ఆర్థిక స్థితికి మూలస్తంభం. కానీ నూతన వ్యవసాయ రంగ పద్దతులతో మెజారిటీ ప్రజలను భాగస్వాములను చేసే విధంగా కృషిచేయాలి. ఇదే లాభదాయకం. ఆధునిక వ్యవసాయ పద్ధతులు, సేంద్రీయ వ్యవసాయం, అగ్రో-ఆధారిత పరిశ్రమల్లో పెట్టుబడులు అవసరం. బీసీ రైతులు తమ ఉత్పత్తులను నేరుగా మార్కెట్‌కు చేర్చే వ్యవస్థలను అభివృద్ధి చేయాలి. స్థానిక సహకార సంఘాల ద్వారా బీసీ రైతులు తమ ఉత్పత్తులను అంతర్జాతీయ మార్కెట్‌లోకి తీసుకెళ్లవచ్చు. వ్యాపార రంగంలో, బీసీలు ఎదగడానికి ప్రభుత్వం తక్కువ వడ్డీ రుణాలు, స్టార్టప్‌ సబ్సిడీలు అందించాలి. బీసీ వ్యాపారవేత్తలు చిన్న తరహా పరిశ్రమలు, స్థానిక వ్యాపారాలను ప్రారంభించడం ద్వారా ఆర్థిక స్వావలంబన సాధించవచ్చు. ఇందో కూడ అనేక కులాల ప్రజలను ఆగస్తులే చేస్తేనే దేశ అభివృద్ధి. ఈ మార్గంలో, బీసీలు తమ సౌలభ్యాన్ని త్యాగం చేసి, ఆర్థిక స్వాతంత్య్రం కోసం పోరాడాలి.

సామాజిక సాధికారత - కుల వివక్ష తొలగింపుతో విజయం! : సామాజిక గౌరవం లేకుండా, రాజకీయ, సాంస్కృతిక, ఆర్థిక విజయాలు అసంపూర్ణం. బీసీలు సామాజికంగా గౌరవం సాధించాలంటే, అంతర్గత మరియు బాహ్య కుల వివక్షను తొలగించుకోవాలి. ఇదొక బృహత్తర కార్యం కావాలి. అయితే ఈ పోరాటం సులభం కాదు. దీనికి ఐక్యత, త్యాగం, విప్లవాత్మక దృక్పథం అవసరం. అంతర్గత కుల వివక్ష ఐక్యతకు శత్రువు. బీసీలలో ఉపకులాల మధ్య వివక్ష ఐక్యతను ఛిన్నాభిన్నం చేస్తోంది. పద్మశాలి, గొల్ల, కురుమ, గౌడ, ముదిరాజు, మున్నూరు కాపు వంటి కులాలు ఒకరినొకరు తక్కువగా చూడటం, రిజర్వేషన్ల కోసం విడిపోయి పోట్లాడటం బీసీల శక్తిని క్షీణింపజేస్తోంది. ఈ అంతర్గత వివక్షను తొలగించడానికి, బీసీలు తమ ఉపకుల గుర్తింపులను త్యాగం విసర్జించాల్సిందే. ఒక సామూహిక బీసీ గుర్తింపును రూపొందించాలి. ఈ లక్ష్యం కోసం, బీసీ సంఘాలు సమావేశాలు, సాంస్కృతిక కార్యక్రమాలు నిర్వహించాలి. ఈ సమావేశాలు, సాంస్కృతిక ఉత్సవాలు ఉపకులాల మధ్య అవగాహనను పెంచుతాయి. యువతలో కుల తత్వ మనస్తత్వాన్ని తొలగించడానికి విద్యా సంస్థల్లో వర్క్‌షాప్‌లు, చర్చలు, అవగహానలు నిర్వహించాలి. శ్రామిక దృక్పందం గల కులాల సంస్కృతిని ప్రదర్శించడం ద్వారా సోదరభావం కలిగించాలి, గౌరవభావం కలిగించాలి. ఉదాహరణకు, బీసీ యువతను ఒక సామూహిక లక్ష్యం కోసం ఏకం చేసే కార్యక్రమాలు, కుల వివక్షను వ్యతిరేకించే సామాజిక ఉద్యమాలు, ఐక్యతను బలోపేతం చేస్తాయి. ఇది త్యాగం కోరుతుంది. వ్యక్తిగత గుర్తింపులను వదిలేసి, సమష్టి గౌరవం కోసం పోరాడాలి.

బాహ్యంగా ప్రదర్శించే కుల అసమానత లేద వివక్షతో ప్రత్యేక సమరం చేయాలి. ఆధిపత్య కులాల నుండి బీసీలు ఎదుర్కొంటున్న వివక్ష గ్రామీణ ప్రాంతాల్లో ఇంకా ఉంది. ఆలయ ప్రవేశం, సామాజిక కార్యక్రమాల్లో ఆంక్షలు ఇంకా కొనసాగుతున్నాయి. ఈ వివక్షను తొలగించడానికి, బీసీలు చట్టపరమైన, సామాజిక, విద్యాత్మక మార్గాలను అనుసరించాలి. ఇందులో చట్టపరమైన శక్తిని కలిగించేది భారత రాజ్యాంగం కుల వివక్షను నిషేధిస్తుంది. కానీ గ్రామీణ స్థాయిలో దాని అమలు బలహీనంగా ఉంది. ఎస్సీ, ఎస్టీ అట్రాసిటీస్‌ చట్టం వంటి చట్టాలు ఉన్నప్పటికి అవి అరకొరగానే అమలు అవుతున్నాయి. అయినా చట్టం కొంత ఉపశమనం. దళితులపట్ల బీసీలు కుల వివక్షత, అంటరానితనంను ప్రదర్శన చేయకుంటే మంచిది. ఈ దృష్టి ఉంటే బీసీలలోని కులాలపై లేద మరేదైన కులాలపై వివక్షత అనేది ఉందడు, రాదు. బీసీ సముదాయంలో అవగాహన పెంచాలి. అభివృద్ది చెందిన కులాల నుండి కుల వివక్షత, ఆధిపత్యం, దాడులు, బహిష్కరణల నుండి కాపాడుకోవడం కొసం బీసీ సామజిక రక్షణ చట్టం కోసం పోరాడాలి. గ్రామీణ స్థాయిలో చట్టం అమలును బలోపేతం చేయడానికి బీసీ సంఘాలు ఒత్తిడి తెచ్చే కార్యక్రమాలు నిర్వహించాలి. సామాజిక ఉద్యమం మరో కీలక మార్గం. సినిమా, సాహిత్యం, మీడియా ద్వారా సమానత్వ సందేశాలను ప్రచారం చేయాలి. బీసీ కళాకారులు, రచయితలు, ఫిల్మ్‌ మేకర్స్‌ ఈ బాధ్యతను తీసుకోవాలి. కుల వివక్షను వ్యతిరేకించే సినిమాలు, నాటకాలు, సాహిత్య రచనలు సమాజ దృక్పథాన్ని కొంతలో కొంత మార్చగలవు. విద్య ఒక విప్లవాత్మక ఆయుధం. పాఠశాలలు, కాలేజీలలో సమానత్వం, కుల వివక్షను వ్యతిరేకించే పాఠ్యాంశాలను చేర్చాలి. బీసీ విద్యార్థులకు స్కాలర్‌షిప్‌లు, మెంటర్‌షిప్‌ ప్రోగ్రామ్‌లు అందించడం ద్వారా వారి స్వీయవిశ్వాసం పెంచవచ్చు. సోషల్‌ మీడియాలో అన్ని కులాల సమానత్వంకు క్యాంపెయిన్‌తో గళం విప్పాలి. బీసీలు తమ సామాజిక గుర్తింపును బలోపేతం చేయడానికి, తమ సంస్కృతి, సాంప్రదాయ వృత్తులను గౌరవించే కార్యక్రమాలను నిర్వహించాలి. బీసీ చేనేత కార్మికులు, కళాకారులను గౌరవించే ఉత్సవాలు స్వయంగౌరవాన్ని పెంచుతాయి. ఈ పోరాటం కోసం, బీసీలు తమ వ్యక్తిగత ప్రయోజనాలను, కుల గుర్తింపులను త్యాగం చేయాలి. ఇది ఒక విప్లవ జెండా. ప్రతి వ్యక్తి ఈ ఉద్యమంలో భాగమవ్వాలి.

బిసిలంతా పాల్గొనాలి: బీసీల భవిష్యత్తు సవాళ్లతో నిండినది, కానీ అది దీపం. రాజకీయ ఐక్యత, ఆర్థిక బలం, సామాజిక గౌరవం, ఈ లక్ష్యాలను సాధించడానికి, బీసీలు ఒక విప్లవ అగ్రకుల పాలకుల పార్టీల దారిని వీడి స్వతంత్ర ప్రత్యామ్నాయ దారిన అనుసరించాలి. అది రాజకీయంగా, బీసీలు స్వతంత్ర శక్తిగా ఎదగడం ద్వారానే సాధ్యం. గ్రామీణ స్థాయి నుండి రాష్ట్ర స్థాయి వరకు నాయకత్వాన్ని పెంచడం అవసరం. విద్య ఒక ఆయుధం. బీసీ యువత ఆధునిక విద్య, నైపుణ్యాలను సొంతం చేసుకోవాలి. నాయకత్వం గ్రామీణ, పట్టణ స్థాయిలో బలోపేతం కావాలి. ఈ పోరాటం కోసం, బీసీలు తమ సౌలభ్యాన్ని త్యాగం చేసి, సమాజం కోసం పోరాడాలి.. ప్రతి బీసీ వ్యక్తి ఈ ఉద్యమంలో భాగమై, సమాజంలో తమ స్థానాన్ని సాధించాలి.