అమ్మ వాడే భాషే అమర భాష

           డాక్టర్ కొవ్వలి గోపాలకృష్ణ

అన్నీ మనకి అందుబాటులో ఉంటే వాటి విలువ మనకి తెలియదు కదా ! కూటి కోసం, ఉన్నత విద్య, ఆశయాలు నెరవేర్చుకోవడం కోసం ఎంతో మంది గత మూడు, నాలుగు దశాబ్దాలుగా భారత దేశం దాటి వేరువేరు దేశాలకు వలస వెళ్ళడం ఒక చారిత్రక పరిణామం. ఏదో కోల్పోతున్నామెమో అనే బాధ, ఆతృతతోనూ, సహజమైన భాషా సంస్కృతుల పట్ల ఉన్న ప్రేమ, మక్కువ కారణంగా కొంతమంది నాయకత్వంలో తెలుగు సంఘాలు ఏర్పడి, తెలుగు వారు వారి ఆహార వ్యవహారాలని మరవకుండా, పండగలకీ, పబ్బాలకీ కలుస్తూ బాషా సంస్కృతులను పరిరక్షించుకునే ప్రయత్నం చేయడం అభినందనీయం. ఇళ్లలోనో, గుళ్ళలోనో నడిపే తెలుగు బడులకి వారాంతంలో వానలో, ఎండలో, మంచులో, మైళ్ల కొద్దీ ప్రయాణించి పిల్లలని తెసుకువెళ్ళి తెలుగు నేర్పించే ప్రయత్నం చేసిన తెలుగు ప్రవాసులు ఎందరో ఉన్నారు.