ఇది ‘చంద్రబాబు’ అనాల్సిన మాటేనా?

ఏ రాజకీయ నాయకుడు అయినా ఇప్పుడు ఉన్నా ఖాళీలను వెంటనే భర్తీ చేయాలని, తాము అధికారంలోకి రాగానే మిగిలిన ఖాళీలను గుర్తించి లేదా కొత్త విధానాలతో స్కూళ్ల సంఖ్యను లేదా పోస్టుల సంఖ్యను పెంచి ఖాళీలు సృష్టించి ఉద్యోగాలను భర్తీ చేస్తామని చెబుతారు. కానీ ఇక్కడ మాత్రం విచిత్రంగా ఈ వింత ప్రకటన వచ్చింది. ఓ వైపు ప్రభుత్వం గత పరిపాలన కాలంలో నిరుద్యోగులను మోసం చేసిందని, ఖాళీలను భర్తీ చేయకుండా మోసం చేసిందని ఆరోపిస్తూనే, మరో వైపు అదే ప్రభుత్వం జారీ చేసిన డీఎస్సీని మాత్రం నిలిపివేయాలని చెప్పడం ఏంటో?

ప్రతిపక్షాల ప్రకారమే గత ఐదు సంవత్సరాలుగా నిరుద్యోగులు నష్టపోయారు. ఇప్పుడు అదనంగా మరో మూడు నాలుగు నెలలు ఎందుకు నష్టపోవాలి. ప్రభుత్వ కొలువు సాధించాలంటే ఎన్ని సంవత్సరాలు కష్టపడి చదవాలి. మానసికంగా ఎంత ఒత్తిడి ఉంటుంది. ఇంటి దగ్గర పరిస్థితులు బాలేకుంటే ఓ వైపు పని చేస్తూ మరోవైపు చదువుకునే వాళ్లు ఎంతమంది ఉన్నారో కదా. కొంతమంది అయితే ప్రభుత్వం ఉద్యోగం సాధించాలని రెండు మూడు సంవత్సరాలు కష్టపడి పని చేసి దాచుకున్న సొమ్ముతో ప్రిపేర్ అవుతూ ఉంటారు. వారికి ఒక్కో నెలా చాలా ముఖ్యమైంది. ఓ వైపు మనీ అయిపోతూ ఉంటుంటే.. ఇంకోవైపు ఆత్మవిశ్వాసం తగ్గుతూ వస్తుంది.

చంద్రబాబు నాయుడు కుప్పంలో ప్రచారంలో చెప్పినట్లుగా ఆయన అధికారంలోకి రాగానే మెగా డీఎస్సీని నిర్వహిస్తే మంచిదే. కానీ ఇప్పుడు నిర్వహిస్తున్న డీఎస్సీని వద్దనడం ఎంతవరకూ సబబు. ఒకవేళ బాబుగారు అన్నట్లు ఇప్పుడున్న డీఎస్సీని ఆపేసి, నాయుడుగారు అధికారంలోకి రాగానే జరిగేదేంటీ? మొదట పాత డీఎస్సీని రద్దు చేయాలి.. తరువాత 1.50 ఖాళీలు ఎక్కడ ఉన్నాయో గుర్తించాలి.

తరువాత వాటికి నోటిఫికేషన్ ఇవ్వాలి తరువాత జరిగే తతంగం అంతా మనకు తెలుసు కాబట్టి మరో నాలుగు ఐదు నెలలు సమయం పడుతుంది. పరీక్షకు మరో నాలుగు నెలల సమయం పడుతుంది అనుకున్నా.. మొత్తానికి సంవత్సరం కాలం వృథా అవుతుంది. రాజకీయ నాయకులకి ప్రతి ఐదు సంవత్సరాలకు ఒక పరీక్ష ఉంటుంది. కానీ నిరుద్యోగులకు జీవితకాలంలో ఒకే పరీక్ష ఉంటుంది. ఒకే సమయం ఉంటుంది. అది మిస్ అయితే.. లైఫ్ ఎటు పోతుందో ఎవ్వరు చెప్పలేరు. కాబట్టి రాజకీయ నాయకుల్లారా మీరు మమ్మల్ని వదిలేయండి. మీ రాజకీయాలు మీరే చేసుకోండి.. ప్లీజ్