మొంథా తుపాన్ : తెలంగాణలో రికార్డు స్థాయిలో వర్షాలు

మొంథా తుపాన్ ప్రభావం వల్ల వరంగల్, హన్మకొండ, కరీంనగర్, మహబూబాబాద్, జనగామ, సిద్ధిపేట జిల్లాల్లోని 30 ప్రాంతాల్లో అతి భారీవర్షాలు కురిశాయి. 204.50 మిల్లీమీటర్ల కంటే అధికంగా వర్షాలు కురిశాయని ఐఎండీ హైదరాబాద్ సీనియర్ శాస్త్రవేత్త డాక్టర్ ఎ ధర్మరాజు గురువారం ఉదయం ‘ఫెడరల్ తెలంగాణ’కు చెప్పారు. హన్మకొండ, వరంగల్, జనగామ జిల్లాల్లో అతి భారీవర్షాలు కురిశాయని ఆయన తెలిపారు. హన్మకొండ జిల్లాలో 50 శాతం ప్రాంతాల్లో అతి భారీవర్షం కురిసింది. వరంగల్ జిల్లాల్లో 42.9 శాతం, జనగామ జిల్లాలో 40 శాతం అతి భారీ వర్షాలు కురిశాయని ఆయన వివరించారు.

తెలంగాణలోని 14 మండలాల్లో అతి భారీవర్షాలు కురిశాయని హైదరాబాద్ వాతావరణశాఖ గురువారం విడుదల చేసిన గణాంకాలు చెబుతున్నాయి. 14 ప్రాంతాల్లో 204.5 మిల్లీమీటర్ల వర్షం కురిసింది. మరో 30 మండలాల్లో 115.6 నుంచి 204.4 మిల్లీమీటర్ల వర్షపాతం నమోదైంది. మరో 46 మండలాల్లో 64.5 నుంచి 115.5 మిల్లీమీటర్ల వర్షం కురిసింది. 123 మండలాల్లో 15.6 నుంచి 64.4 మిల్లీమీటర్ల వర్షపాతం రికార్డు అయింది. 81 స్టేషన్లలో 01 నుంచి 15.5 మిల్లీమీటర్ల వర్షపాతం నమోదైందని ఎ ధర్మరాజు చెప్పారు. తెలంగాణ వ్యాప్తంగా 368 ప్రాంతాల్లో వర్షాలు కురిశాయని ఆయన వివరించారు.

హన్మకొండ జిల్లా భీమదేవరపల్లి మండలంలో అత్యధికంగా 422.0 మిల్లీమీటర్ల వర్షం కురిసిందని ఐఎండీ అధికారులు చెప్పారు.కరవు పీడిత మండలంగా పేరొందిన భీమదేవరపల్లిలో కరవు తీరా వర్షాలు కురిశాయి. వంగర చెరువు గండి పడే ముప్పు ఏర్పడటంతో పోలీసులు అడ్డుగా ఉన్న చెత్తను తొలగించి నీటిని దిగువకు వదలడంతో ప్రమాదం తప్పింది. పర్వతగిరి మండలం కల్లెడలో 415.5 మిల్లీమీటర్లు, నెక్కొండ మండలం రెడ్లవాడలో 358.5 మిల్లీమీటర్లు, ఖిలా వరంగల్ ఉర్సులో 347.3 మిల్లీమీటర్లు, ధర్మసాగర్ లో 332.8 మిల్లీమీటర్లు, సంగెం మండలం కాపులకనపర్తిలో 332.8 మిల్లీమీటర్లు, వర్దన్నపేట మండలం వర్థన్నపేటలో 324.0 మిల్లీమీటర్లు, సంగెంలో 310.5మిల్లీమీటర్లు,సిద్ధిపేట జిల్లా హుస్నాబాద్ లో 304.3 మిల్లీమీటర్లు, జనగామలో 294.8 మిల్లీమీటర్ల వర్షపాతం నమోదైందని ఐఎండీ అధికారులు వెల్లడించారు. అతి భారీవర్షాల వల్ల వరదలు వెల్లువెత్తాయి. పలు జనవాసాలు, కాలనీలను వరద నీరు ముంచెత్తింది.