దసరా సందర్భంగా వెయ్యికోట్లకు పైగా మద్యాన్ని తాగారు...

ఈ ఏడాది సెప్టెంబరు నెలలో రికార్డు స్థాయిలో మద్యం విక్రయాలు జరిగాయి.సెప్టెంబరు నెలలో 26.71 లక్షల మద్యం కేసులు, 33 లక్షలకు పైగా బీర్లను విక్రయించారు. ఒక్క సెప్టెంబరు నెలలోనే 2,715 కోట్ల ఆదాయం ఎక్సైజ్ శాఖకు వచ్చింది. దసరాకు ముందు సెప్టెంబరు 29వతేదీ ఒక్క రోజే తెలంగాణలో 279 కోట్ల విలువైన మద్యాన్ని విక్రయించారు.సెప్టెంబరు 30వతేదీన రూ.300 కోట్లకు పైగా మద్యాన్ని విక్రయించినట్లు తెలంగాణ ఎక్సైజ్ శాఖ అధికారి ఒకరు చెప్పారు. దసరా పండుగ సెలవులు, స్థానిక ఎన్నికల సమరం ప్రారంభం కావడంతో తెలంగాాణలో విందులు, వినోదాలు జోరందుకున్నాయి. గాంధీ జయంతి సందర్భంగా మాంసం, మద్యం దుకాణాలు బంద్ చేయడంతో దీనికి ముందే మందుబాబులు మద్యాన్ని కొనుగోలు చేసి స్టాక్ పెట్టుకున్నారు.బుధవారం రాత్రి వరకు మద్యం విక్రయాల జోరు సాగింది. బుధవారం ఒక్క రోజే రూ.340 కోట్ల మద్యం విక్రయాలు జరిగాయని ఎక్సైజ్ శాఖ అధికారులు చెప్పారు.

తెలంగాణ రాష్ట్రంలో దసరా పండుగ వచ్చిందంటే చాలు మద్యం విక్రయాలు జోరుగా సాగాయి.ఈ ఏడాది దసరా పర్వదినం రోజే అక్టోబరు 2 గాంధీ జయంతి వచ్చినా, మందుబాబులు దసరా పండుగకు ముందే మద్యాన్ని పెద్ద ఎత్తున కొనుగోలు చేసి దాచుకున్నారు. గత ఏడాది దసరా పండుగ సందర్భంగా పదిరోజుల్లోనే 1,100 కోట్లకు పైగా మద్యాన్ని విక్రయించారు. హైదరాబాద్ నగరంలోని బార్ లు, పబ్ లు, మద్యం దుకాణాల్లో మద్యం విక్రయాలు జోరుగా సాగాయి. మద్యం విక్రయాల్లో హైదరాబాద్, రంగారెడ్డి జిల్లాలు ముందున్నాయి.

తెలంగాణలో సాధారణ రోజుల్లో రోజుకు 60 నుంచి 90 కోట్ల రూపాయల విలువైన మద్యం విక్రయాలు సాగుతుంటాయి. ఈ ఏడాది మద్యం కిక్కు పెరిగింది. ప్రభుత్వ మద్యం డిపోల నుంచి రోజుకు వంద కోట్లరూపాయలకు పైగా మద్యం దుకాణాలకు తరలిపోయినట్లు డిపోల గణాంకాలే చెబుతున్నాయి. దసరా పండుగ సందర్భంగా మద్యం దుకాణాల్లో 40 శాతం అధికంగా మద్యం విక్రయాలు సాగాయని వెల్లడైంది.మద్యానికి డిమాండు పెరగడంతో మద్యం దుకాణాల్లో మద్యం నిల్వలు కూడా పెంచారు.