తెలంగాణ చేరుకుంటున్న వివిధ దేశాల ప్రతినిధులు..

తెలంగాణ రైజింగ్ గ్లోబల్ సమ్మిట్-2025ను రాష్ట్ర ప్రభుత్వం ప్రతిష్టాత్మకంగా నిర్వహిస్తోంది. రాష్ట్రానికి పెట్టబడులు, పరిశ్రమలను ఆకర్షించడమే లక్ష్యంగా ఈ సదస్సును నిర్వహిస్తున్నారు. సీఎం రేవంత్ రెడ్డి ఆధ్వర్యంలో జరుగుతునన ఈ సదస్సుకు పలు దేశాలకు సంబంధించి ప్రముఖ సంస్థల ప్రతినిధులు, పలు దేశాల ప్రతినిధులు హాజరుకానున్నారు. అంతేకాకుండా ప్రధాని నరేంద్ర మోదీ, పలువురు కేంద్రమంత్రులు, ఇతర రాష్ట్రాల ముఖ్యమంత్రులకు కూడా తెలంగాణ ప్రభుత్వం ఆహ్వానాలు అందించింది. డిసెంబర్ 8,9 తేదీల్లో జరగనున్న ఈ సదస్సుకు హాజరుకావడానికి ఇప్పటికే పలు దేశాల ప్రతినిధుల బృందాలు, పారిశ్రామిక వేత్తల బృందాలు తెలంగాణ ఫ్యూచర్ సిటీకి చేరకుంటున్నాయి.

తెలంగాణ రైజింగ్‌ గ్లోబల్‌ సమిట్‌’ సోమవారం మధ్యాహ్నం 1 గంటకు ఆరంభం కానుంది. రంగారెడ్డి జిల్లా కందుకూరు ఫ్యూచర్‌ సిటీలో ఏర్పాటు చేసిన ఈ సమిట్‌ను రాష్ట్ర గవర్నర్‌ జిష్ణుదేవ్‌ వర్మ ప్రారంభించనున్నారు. 100 ఎకరాల విస్తీర్ణంలో జరుగుతున్న ఈ రెండు రోజుల సదస్సుకు 44 దేశాల నుంచి 154 మంది ప్రతినిధులు, అలాగే దాదాపు 2,000 మంది దేశ–విదేశీ అతిథులు హాజరుకానున్నారు. ఇందుకు అనుగుణంగా సమిట్‌ ప్రాంగణం, అతిథుల బస ప్రాంతాల్లో భద్రతా చర్యలు కట్టుదిట్టం చేశారు. హోటళ్ల వద్ద భారీ బందోబస్తు, కమాండ్‌ కంట్రోల్‌ నుంచి ప్రత్యేక లైజనింగ్‌ అధికారులు, వీవీఐపీలకు డీఎస్పీ ర్యాంకు అధికారుల భద్రత వంటి ఏర్పాట్లు చేపట్టారు.

మధ్యాహ్నం 2.30 గంటలకు ముఖ్యమంత్రి రేవంత్‌ రెడ్డి సమిట్‌లో ప్రసంగించనున్నారు. ఆయన తెలంగాణలో ప్రజాపాలన, పెట్టుబడుల అవకాశాలు, ప్రభుత్వం అందించే సహకారం, ‘విజన్‌ 2047’ లక్ష్యాలు, భారత్‌ ఫ్యూచర్‌ సిటీ ప్రణాళికలపై వివరించనున్నట్లు అధికారులు తెలిపారు. సమిట్‌లో పాల్గొనే వీవీఐపీ అతిథులు, సీనియర్ ఐఏఎస్ అధికారులకు ప్రత్యేక యాక్సెస్ పాస్‌లు ఇచ్చారు. ప్రధాన హాలులో 2,000 మంది కూర్చునేలా సదుపాయాలు కల్పించారు. అలాగే, శాఖలవారీగా విదేశీ ప్రతినిధులతో సమావేశాలు నిర్వహించడానికి ప్రత్యేక మీటింగ్ హాల్స్‌ను సిద్ధం చేశారు. వీటి అనంతరం పలు కీలక ఒప్పందాలు కుదిరే అవకాశముంది. ఈ గ్లోబల్‌ సమిట్‌కు పరిశ్రమలతో పాటు సినీ, క్రీడా, విద్య రంగాల ప్రముఖులు కూడా హాజరుకానున్నారు. తెలంగాణ అభివృద్ధి దిశగా ఇది మరొక మైలురాయిగా నిలుస్తుందని అధికారులు భావిస్తున్నారు.