Revanth Reddy | అమీన్‌పుర్‌కు అరుదైన అతిథి.. సీఎం రియాక్షన్ ఇదే..
అమీన్‌పురు చాలా కాలం తర్వాత అరుదైన అతిథి విచ్చేశారు. ఆయన రాకను ప్రజలు, పర్యాటకులతో పాటు ప్రభుత్వం కూడా ఎంతో గొప్పగా భావిస్తోంది.;
అమీన్‌పురు చాలా కాలం తర్వాత అరుదైన అతిథి విచ్చేశారు. ఆయన రాకను ప్రజలు, పర్యాటకులతో పాటు ప్రభుత్వం కూడా ఎంతో గొప్పగా భావిస్తోంది. ఆ అతిథి ఎవరో కాదు.. అరుదుగా కనిపించే ‘రెడ్ బ్రెస్ట్‌డ్ ఫ్లైక్యాచర్’(Red-breasted Flycatcher) అనే పక్షి. ఈ పక్షి అమీన్పుర్(Ameenpur)లో గతంలో కనిపించేది. కానీ ఇటీవల అమీన్‌పుర సరస్సులో చాలా కాలంగా ఈ పక్షి కనిపించిన జాడ లేదు. 12 సెంటీమీటర్లు ఉండే ఈ పక్షి ఇటీవల మళ్ళీ దర్శనమిచ్చింది. గ్రేటర్ పరిధిలో హైడ్రా(HYDRAA) చేపట్టిన ఫలితంగానే ‘రెడ్ బ్రెస్ట్‌డ్ ఫ్లైక్యాచర్’ వంటి అరుదైన పక్షి అమీన్‌పుర్‌కు తిరిగొచ్చిందని ప్రజలు, ప్రభుత్వం భావిస్తోంది. అమీన్పుర్ సరస్సు దగ్గర జరిగిన ఆక్రమణలను హైడ్రా కూకటివేళ్లతో పెకలించేసింది.
సరస్సును పునరుద్ధరించింది. దీంతో మళ్ళీ అమీన్‌పుర సరస్సు మరోసారి అరుదైన పక్షులతో కళకళలాడుతోంది. ఈ అరుదైన పక్షులను తిలకించడం కోసం ప్రకృతి ప్రేమికులు, పర్యాటకులు అమిత ఆసక్తి చూపుతున్నారు. అమీన్‌పుర్‌లో అరుదైన పక్షులు కనిపించడం చాలా సంతోషంగా ఉందని, ఇలాంటి రోజులు వస్తుందని మొన్నటి వరకు కలలో కూడా అనుకోలేదంటూ హైడ్రా చేపట్టిన పనులను కొనియాడుతున్నారు. అంతేకాకుండా గ్రేటర్ పరిధిలో చెరువులు, కుంటలను కాపాడటం కోసం సీఎం రేవంత్ రెడ్డి(Revanth Reddy) నేతృత్వంలోని ప్రభుత్వం తీసుకున్న హైడ్రా స్థాపన నిర్ణయానికి కృతజ్ఞతలు తెలుపుతున్నారు. ఈ సందర్భంగా ‘రెడ్ బ్రెస్ట్‌డ్ ఫ్లైక్యాచర్’ వంటి అరుదైన పక్షి కనిపించిన అంశంపై సీఎం రేవంత్ రెడ్డి కూడా స్పందించారు. హైడ్రాపై ప్రశంసల వర్షం కురిపించారు.
శభాష్ హైడ్రా: రేవంత్
‘‘ప్రకృతిని మనం కాపాడితే.. మనల్ని ప్రకృతి కాపాడుతుందని నేను ఎల్లప్పుడు నమ్మాను. ఇది ఒక రైతు జ్ఞానం. ఏళ్ల తరబడి ఆక్రమణలు, కలుషిత నీరుతో వినాశనానికి గురైన మన జలవనరులను కాపాడాలని నిశ్చయించుకున్నాం. చెరువులు, కుంటలను ఆక్రమణలను అడ్డుకున్నాం. కొన్ని నెలల్లోనే మన పర్యావరణ సంపద, వారసత్వాన్ని విజవంతంగా పెంపొందించాం. అతి తక్కువ సమయంలోనే ప్రకృతి మనకు రివార్డ్ కూడా ఇచ్చేసింది. హైడ్రా పునరుద్దరించిన సరస్సులో 12 సెంటిమీటర్ల రెడ్-బ్రెస్ట్‌డ్ ఫ్లైక్యాచర్ తిరిగి కనిపించింది. ఇది ఆ దేవుడి బహుమతి, మనకు ఆయన ఇచ్చిన ఆమోదంగా భావిస్తున్నా’’ అని సీఎం రేవంత్ రెడ్డి తన ఎక్స్(ట్విట్టర్) వేదికగా పోస్ట్ పెట్టారు.
ఈ పక్షి విశేషాలివే..
12 సెంటిమీటర్లు ఉండే ఈ పక్షి సాధారణంగా తూర్పు ఐరోపా నుంచి మైగ్రేట్ అవుతాయి. తూర్పు ఐరోపాలో ఏర్పడే అత్యధిక చలి నుంచి కాపాడుకోవడం కోసం ఆహారం పుష్కలంగా లభిస్తూ.. మోస్తరు ఉష్ణోగ్రతలు ఉండే దక్షిణ ఆసియా వంటి ప్రాంతాలకు ఇవి వలసలు వెళ్తుంటాయి. దీంతో ఈ పక్షులకు హైదరబాద్ అమీన్పుర్ ఆవాసమవుతోంది. అయితే అమీన్పుర్ సరస్సు అనేక అరుదైన పక్షులకు ఆవాసంగా ఉండేది. ఇక్కడకు ఫ్లెమింగోస్ సైతం వలసవచ్చేవి. కానీ పలు కారణాల కారణంగా సరస్సు పరిసరాలు మారిపోవడంతో ఈ పక్షులు ఇక్కడకు వలస రావడం మానేశాయి. అటువంటి హైదరాబాద్ డిసాస్టర్ రెస్పాన్స్ అండ్ అసెట్ ప్రొటెక్టింగ్ ఏజెన్సీ(HYDRAA) ఈ సరస్సును అతి తక్కువ సమయంలోనే పునరుద్దరించడంతో ఈ పక్షులు మళ్ళీ అమీన్పుర్ బాట పట్టాయి.