తెలంగాణలో నూతన వధూవరులకు సర్కారు శుభవార్త

నూతన పౌర సేవల ప్రారంభం, మీ సేవ కార్యక్రమాల పనితీరును శ్రీధర్ బాబు సచివాలయంలో సోమవారం సమీక్షించారు.ఈ కొత్త సేవలు ప్రజలకు మరింత పారదర్శకతతో కూడిన, వేగవంతమైన సేవలుగా మారనున్నాయి. భూమి, అపార్టుమెంట్ విలువల అంచనాలను 24 గంటల్లోపు ఆమోదించేలా చర్యలు చేపడుతున్నారు. మ్యారేజ్ రెజిస్ట్రేషన్ ప్రక్రియ కూడా ఇకపై సమర్థవంతంగా జరుగనుంది.

మీసేవలో నూతన వధూవరులు మ్యారేజీ రిజిస్ట్రేషన్ కోసం స్లాట్ బుకింగ్ చేసుకోవచ్చు. దరఖాస్తుదారులు పెళ్లి ఫొటోలు, చిరునామా రుజువు, వయస్సు ధృవీకరణ పత్రాలను సమర్పించాలి. ఆమోదం అనంతరం సర్టిఫికెట్‌ను ప్రత్యక్షంగా సబ్-రెజిస్టార్ ఆఫీసు నుంచి జారీ చేస్తారు.

ఈ సేవల ద్వారా ప్రజలు అనవసరంగా కార్యాలయాల చుట్టూ తిరగాల్సిన అవసరం లేకుండా, నిర్మాణ రంగం, స్థిరాస్తి కొనుగోళ్లు చేయాలనుకునే వారికి ఎంతో ఉపయోగపడనుంది.మీ సేవ సెంటర్‌ లేదా ఆన్‌లైన్‌లో జిల్లా, గ్రామం వంటి వివరాలను సమర్పించి భూమికి సంబంధించిన తాజా మార్కెట్ విలువను పొందవచ్చు. ఈ దరఖాస్తులను సంబంధిత సబ్-రిజిస్ట్రార్ కార్యాలయం త్వరితగతిన పరిశీలించి నిర్ణయిస్తుంది.తాజా సేవలు అందుబాటులోకి తీసుకురావడం, రాష్ట్ర డిజిటల్ గవర్నెన్స్ దిశగా మరో కీలక అడుగు. ఇప్పటికే మీ సేవలో ఆర్టీఏ, పాన్, ఇసుక బుకింగ్ వంటి సేవలు మిళితమయ్యాయి. ఇకపై టీ-ఫైబర్, అదనపు కియాస్క్‌లు కూడా రాష్ట్రవ్యాప్తంగా ఏర్పాటు చేసి ప్రభుత్వ సేవలను ప్రజలకు మరింత దగ్గర చేస్తామని మంత్రి శ్రీధర్ బాబు తెలిపారు.