హెచ్ సి ఏ స్కాం కేసులో రిమాండ్ ఖైదీలు కస్టడీలోకి ..

ఈ స్కాంలో అరెస్టైన నలుగురు చర్లపల్లి జైలులో రిమాండ్ ఖైదీలుగా ఉంటే శ్రీచక్ర క్లబ్ అధ్యక్షురాలు కవిత చంచల్ గూడ మహిళా జైలులో రిమాండ్ లో ఉన్నారు. ఈ ఐదుగురిని కస్టడీలో తీసుకుంటే గానీ పూర్తి సమాచారం బయటకు వచ్చే అవకాశం లేదు. గౌలిపురా క్రికెట్ క్లబ్ ప్రెసిడెంట్ సి. కృష్ణాయాదవ్ సంతకాన్ని శ్రీచక్ర క్లబ్ అధ్యక్షురాలు కవిత, రాజేందర్ యాదవ్ , జగన్ మోహన్ రావులు ఫోర్జరీ చేశారు. ఈ క్లబ్ ఏర్పాటుకు సి. కృష్ణాయాదవ్ సంతకాన్ని ఫోర్జరీ చేసినట్టు ఆధారాలు బయటపడ్డాయి.ఫోర్జరీ డాక్యుమెంట్ల ఆధారంగా కేసులు నమోదయ్యాయి. ఫోర్జరీ డాక్యుమెంట్లతో జగన్ మోహన్ రావు హైద్రాబాద్ క్రికెట్ అసోసియేషన్ అధ్యక్షుడయ్యారు. కస్టడీ పిటిషన్ శుక్రవారం దాఖలు చేసే అవకాశం ఉంది. ఈ కేసులో హెచ్ సి ఏ కోశాధికారి శ్రీనివాసరావు, సీఈవో సునీల్ కూడా ఉన్నప్పటికీ శ్రీ చక్ర క్లబ్ నిర్వాహకుల పాత్ర కీలకంగా మారడంతో సిఐడి సీరియస్ గా ఉంది. పూర్తి ఆధారాలు సేకరించి చార్జ్ షీట్ ఫైల్ చేయనుంది.

కాగా ఈ ఐదుగురు నిందితులు బెయిల్ పిటిషన్ దాఖలు చేసే అవకాశం ఉండటంతో వారికి బెయిల్ రాకుండా సిఐడి ప్రయత్నాలు ప్రారంభించింది.