‘కొండా విశ్వేశ్వర్ రెడ్డి చేసిన తప్పే రంజిత్ రెడ్డి కూడా తప్పు చేస్తున్నారు’
రంజిత్ రెడ్డిపై బీఆర్ఎస్ నేత సబిత ఇంద్రారెడ్డి సంచలన వ్యాఖ్యలు చేశారు. లోక్‌సభ ఎన్నికల్లో రంజిత్ ఓడిపోతారంటూ జోస్యం చెప్పారు.
కొన్ని రోజుల క్రితమే చేవెళ్ల సిట్టింగ్ ఎంపీ రంజిత్ రెడ్డి.. బీఆర్ఎస్‌కు రాజీనామా చేసి గంటల వ్యవధిలోనే కాంగ్రెస్ కండువా కప్పుకున్నారు. రానున్న లోక్‌సభ ఎన్నికల్లో చేవెళ్ల టికెట్‌ను తనకు ఇవ్వకపోవడంతోనే ఆయన పార్టీ మారారు. అయితే తాజాగా చేవెళ్ల ఎంపీ టికెట్‌ను కాంగ్రెస్ రంజిత్ రెడ్డికే ఖరారు చేసింది. ఈ నేపథ్యంలో తాజాగా ఆయనపై మాజీ మంత్రి, బీఆర్ఎస్ నేత సబిత ఇంద్రారెడ్డి సంచలన వ్యాఖ్యలు చేశారు. గతంలో కొండ విశ్వేశ్వర్ రెడ్డి చేసిన తప్పే ఇప్పుడు రంజిత్ రెడ్డి కూడా చేస్తున్నారని గుర్తు చేశారు. ‘‘కొండా విశ్వేశ్వర్ రెడ్డిని బీఆర్ఎస్ తరపున ఎన్నికల బరిలో నిలిపి కేసీఆర్ గెలిపించారు. ఆ తర్వాత ఆయన పార్టీ వీడి కాంగ్రెస్ తీర్థం పుచ్చుకున్నారు. ఆ తర్వాత కాంగ్రెస్ తరపున ఎంపీగా పోటీ చేసి పరాభవాన్ని మూటగట్టుకున్నారు. ఇప్పుడు రంజిత్ కూడా అదే పోకడ పోతున్నారు. రానున్న ఎన్నికల్లో రంజిత్‌కు కూడా అదే గతి పడుతుంది’’ అని కీలక వ్యాఖ్యలు చేశారు.