మంత్రుల ఇన్ కం టాక్స్ కూడా ప్రభుత్వమే చెల్లించాలా?

మంత్రుల ఆదాయపు పన్ను చెల్లింపులకు ప్రజాధనం వెచ్చింపు

2015వ సంవత్సరంలో అప్పటి సీఎం కేసీఆర్, ఇతర మంత్రులు, కేబినెట్ ర్యాంకు ప్రజాప్రతినిధులకు రూ.22.51 లక్షలను ఆదాయపు పన్నును తెలంగాణ రాష్ట్ర ప్రభుత్వమే చెల్లించింది. ఈ మేర 2015మార్చి 25వతేదీన జీఓఆర్టీ నంబరు 917 తో ఉత్తర్వులు జారీ చేశారు. 2015వ సంవత్సరం మార్చి 25వతేదీన అప్పటి ప్రభుత్వ ప్రిన్సిపల్ సెక్రటరీ అజయ్ మిశ్రా జారీ చేసిన ఉత్తర్వుల్లో 2014-15 ఆర్థిక సంవత్సరానికి గాను సీఎం కేసీఆర్ కు రూ.15.39 లక్షల ఆదాయపు పన్నును ప్రభుత్వమే చెల్లించింది. సలహాదారులైన ఆర్ విద్యాసాగర్, ఏకే గోయల్, ఎం రామలక్ష్మణ్, బీవీ పాపారావు,డాక్టర్ కేవీ రమణాచారి, జీఆర్ రెడ్డి, అల్లం నారాయణ, పార్లమెంటరీ సెక్రటరీలు జలగం వెంకట్రావు, వినయ్ భాస్కర్ ల ఆదాయపు పన్ను చెల్లించారు.

కేబినెట్ ర్యాంకు ప్రజాప్రతినిధులకు భారీగా జీతాల పెంపు

ఉమ్మడి ఆంధ్రప్రదేశ్ రాష్ట్రంలోనే అప్పటి ముఖ్యమంత్రి నల్లారి కిరణ్ కుమార్ రెడ్డి మంత్రులు, కేబినెట్ ర్యాంకు ప్రజాప్రతినిధుల జీతాలను భారీగా పెంచారు. ఆంధ్రప్రదేశ్ యాక్ట్ 1954 ప్రకారం ముఖ్యమంత్రి, డిప్యూటీ సీఎం, మంత్రుుల, కేబినెట్ ర్యాంకు డిప్యూటీ, స్టేట్ మంత్రులు, చీఫ్ విప్, విప్, ప్రతిపక్ష నాయకుల జీతభత్యాలను పెంచారు. అప్పట్లో తమిళనాడు, కర్ణాటక, కేరళ, మహారాష్ట్ర లను సంప్రదించి పెరిగిన జీవన వ్యయానికి అనుగుణంగా జీతభత్యాలను పెంచామని అప్పటి ప్రభుత్వం సమర్ధించుకుంది. 2012 మార్చి 16వతేదీన ప్రజాప్రతినిధుల జీతభత్యాలు పెంచుతూ ఉమ్మడి రాష్ట్రంలోనే గెజిట్ నోటిఫికేషన్ జారీ చేశారు.

జీతాలే కాదు అలవెన్సులూ అధికమే...

ప్రజాప్రతినిధులకు జీతాలే కాకుండా అలవెన్సులు కూడా అధికంగానే చెల్లిస్తున్నారు. ప్రజాప్రతినిధికి నియోజకవర్గ అలవెన్సు కింద నెలకు 83వేలరూపాయలు, హౌస్ రెంట్ అలవెన్సు కింద రూ.50వేలు ప్రభుత్వం చెల్లిస్తోంది. దీంతోపాటు ప్రజాప్రతినిధికి సొంత కారు ఉంటే దానికి గాను కారు అలవెన్సు కింద నెలకు రూ.30వేలు, ఇంధన ఖర్చుల కోసం రూ.15వేలు, సెక్యూరిటీ కారు అలవెన్స్ రూ.30వేలు ఇస్తున్నారు. దీంతోపాుట క్యాంపు కార్యాలయం అలవెన్స్ రూ.10వేలు, స్పెషల్ అలవెన్స్ రూ.8వేలు, ఇతర అలవెన్స్ కింద రూ.7వేలు చెల్లిస్తున్నారు.