పొల్యూషన్ కంట్రోల్ బోర్డులో ఇన్ని అక్రమాలా: హైకోర్ట్ ఛార్జ్ అవాక్కు

తెలంగాణ రాష్ట్రంలో కాలుష్యాన్ని నియంత్రించాల్సిన కాలుష్య నియంత్రణ మండలి (పీసీబీ)లో అవినీతి, అక్రమాలు, విధి నిర్వహణలో అధికారుల నిర్లక్ష్యం, లొసుగులు వెలుగుచూశాయి. గత కొంత కాలంగా తెలంగాణలో వాయు, జల, శబ్ధ కాలుష్యం పెచ్చుపెరిగిపోతున్నా, దీన్ని నివారించడంలో పీసీబీ అధికారులు విఫలమయ్యారు. పెచ్చుపెరిగిపోతున్న కాలుష్యాన్ని అరికట్టాలని ప్రజలు పీసీబీకి ఫిర్యాదులు చేస్తున్నా అధికారులు మాత్రం సకాలంలో చర్యలు తీసుకోవడం లేదు. గత ఏడు నెలలుగా పీసీబీపై దాఖలైన కేసులను పరిశీలించిన తెలంగాణ హైకోర్టు అధికారుల పనితీరును తప్పుబట్టింది. పీసీబీ అధికారులు ఇంజినీరింగ్ కాలేజీల నుంచి పొందిన శిక్షణపైనే హైకోర్టు అనుమానాలు వ్యక్తం చేసింది. పీసీబీని ప్రక్షాళన చేసి అసమర్ధ అధికారులను సాగనంపాలని హైకోర్టు ఆదేశించింది. పీసీబీ అధికారులు కార్యాలయాల్లో కూర్చొని ఉండటం కాదని, ప్రజల హక్కులను రక్షించాల్సిన బాధ్యత వారిపై ఉందని హైకోర్టు జడ్జీలు తీవ్ర వ్యాఖ్యలు చేశారు.