‘నదీ జలాల విషయంలో తెలంగాణకు అన్యాయం’

అభివృద్ధిలో ముందున్న రాష్ట్రాలకు అన్యాయం జరుగుతోందని బీఆర్ఎస్ ఎంపీ కేఆర్ సురేశ్ రెడ్డి అన్నారు. నష్టపోయిన రైతులకు న్యాయం జరిగేలా చట్టాల్లో మార్పులు తీసుకురావాల్సిన అవసరం కూడా ఉందని ఆయన పేర్కొన్నారు. నదీ జలాల విషయంలో తెలంగాణకు తీవ్ర అన్యాయం జరుగుతోందని ఆక్షన్ అన్నారు. తెలంగాణలో బీఆర్ఎస్ అధికారం కోల్పోయిన తర్వాత రాష్ట్ర హక్కులు దెబ్బతింటున్నట్లు కనిపిస్తున్నాయని ఆరోపించారు. నదీ జలాల విషయంలో తెలంగాణకు అన్యాయం జరుగుతోందని, ఈ అంశంపై కూడా పార్లమెంట్ వేదికగా తమ పోరాటం కొనసాగుతుందని ఎంపీ సురేశ్‌రెడ్డి స్పష్టం చేశారు.

రాష్ట్రాలకు కేంద్రం ఇచ్చే నిధుల వాటాపై సమగ్ర చర్చను పార్లమెంట్‌లో నిర్వహించాలని బీఆర్‌ఎస్ ఎంపీ కేఆర్ సురేశ్‌రెడ్డి కోరారు. ఢిల్లీలో రక్షణ మంత్రి రాజ్‌నాథ్ సింగ్ అధ్యక్షతన ఆదివారం జరిగిన అఖిలపక్ష సమావేశంలో ఆయన పాల్గొన్నారు. నాలుగు ముఖ్య అంశాలపై పార్లమెంట్ చర్చ అవసరమని సమావేశంలో తమ పార్టీ డిమాండ్ చేసిందని తెలిపారు. ఖరీఫ్ సీజన్‌లో తెలంగాణలో జరిగిన పంట నష్టానికి కేంద్ర, రాష్ట్ర ప్రభుత్వాల నుంచి వచ్చిన సహాయం చాలా తక్కువగా ఉందని, రైతులకు తగిన న్యాయం జరుగలేదని పేర్కొన్నారు.

దేశవ్యాప్తంగా పంట నష్టపోయిన రైతులకు సముచిత రక్షణ లభించేలా చట్టాల్లో మార్పులు చేయాలని అఖిలపక్ష సమావేశంలో విజ్ఞప్తి చేశామని సురేశ్‌రెడ్డి వివరించారు. “ఫసల్ బీమా యోజన పత్రాలపైనే నడుస్తోంది. నిజంగా రైతులకు లాభం చేకూరడం లేదు” అని వ్యాఖ్యానించారు.

16వ ఫైనాన్స్ కమిషన్ నివేదికను పార్లమెంట్‌లో చర్చించాలని డిమాండ్ చేసిన ఆయన, “కేంద్రం రాష్ట్రం నుంచి ఒక రూపాయి తీసుకుంటే దాని ప్రతిఫలంగా 48 పైసలు మాత్రమే తిరిగి వస్తున్నాయి, ఇది న్యాయం కాదు” అని స్పష్టం చేశారు. అభివృద్ధిలో ముందున్న దక్షిణాది రాష్ట్రాలకు నష్టం జరిగే విధంగా నిర్ణయాలు తీసుకోవద్దని సూచించారు. డిలిమిటేషన్ ప్రక్రియలో దక్షిణాది రాష్ట్రాలకు పార్లమెంటరీ సీట్లు తగ్గే అవకాశం ఉండటంపై ప్రజల్లో ఆందోళన నెలకొన్నట్లు పేర్కొన్నారు. రాష్ట్రాల పెండింగ్ డిమాండ్లను కూడా పార్లమెంట్ చర్చకు తీసుకురావాలని సమావేశంలో కోరినట్లు తెలిపారు.