జనంబాట సరే సర్పంచ్ ఎన్నికల మాటేమిటి ?

బీఆర్ఎస్ లో సస్పెండైన దగ్గర నుండి కల్వకుంట్ల కవిత ప్రతిరోజు వార్తల్లో వ్యక్తిగా నిలుస్తునే ఉన్నారు. ఇపుడు విషయం ఏమిటంటే పంచాయితీ ఎన్నికలు ఊపందుకున్నాయి. మొదటిదశలో 4,236 పంచాయితీ సర్పంచులతో పాటు పంచాయితీల్లోని 37,440 వార్డులకు నామినేషన్ల ఘట్టం ముగిసింది. రెండోదశలో ఎన్నికలు జరగాల్సిన పంచాయితీలకు, వార్డులకు ఆదివారం నుండి నామినేషన్ల ప్రక్రియ మొదలైంది.

సర్పంచ్ పదవులకు, వార్డు మెంబర్లకు వేలాది నామినేషన్లు దాఖలయ్యాయి. సర్పంచ్ ఎన్నిక పార్టీ రహితంగా జరుగుతుందని అందరికీ తెలిసిందే. పార్టీ రహితంగా జరుగుతుందే కాని పార్టీల అఫిలియేషన్ మాత్రం ఉంటుంది. ఎందుకంటే పోటీ చేయాలని అనుకునే వారందరు ఏదో ఒక పార్టీలో పనిచేస్తున్న నేతలే అయ్యుంటారు కాబట్టి అఫిలియేషన్లు తప్పవు. తమనేతలతో నామినేషన్లు వేయించటం, గెలుపుకు అవసరమైన వ్యూహాలు పన్నటంలో పార్టీలు కాంగ్రెస్, బీఆర్ఎస్, బీజేపీ అగ్రనేతలు చాలా బిజీగా ఉన్నారు. పై పార్టీలంతా కాకపోయినా వామపక్షాల నేతలు కూడా హడావుడిగానే కనబడుతున్నారు. ఎలాంటి హడావుడి కనబడనిది ఒక్క జాగృతిలో మాత్రమే. ఏ పార్టీకి అయినా పునాది పంచాయితీలే అనటంలో సందేహంలేదు.

బీఆర్ఎస్ నుండి సస్పెండ్ అయిన కవిత పార్టీతో పాటు ఎంఎల్సీ పదవికి కూడా రాజీనామా చేసిన విషయం తెలిసిందే. కొంతకాలం సైలెంటుగా ఉన్న కవిత జాగృతి పేరుమీదే రాజకీయాలు మొదలుపెట్టారు. తెలంగాణ జాగృతి పేరుమీదే పార్టీ పెట్టే అవకాశాలు కూడా కనబడుతున్నాయి. జాగృతిని బలోపేతంచేయటంలో భాగంగా వివిధ సామాజికవర్గాలకు చెందిన నేతలను ముఖ్యంగా యువతను జాగృతిలో చేర్చుకుంటున్నారు. జనాల్లోకి వెళ్ళటంలో భాగంగా కొద్దిరోజుల క్రిందట ‘జనంబాట’ మొదలుపెట్టారు. ఇప్పటికే పదిజిల్లాల్లో పాదయాత్ర పూర్తిచేశారు. క్షేత్రస్ధాయిలో జనాలతో మమేకం అవటంతో పాటు వివిధ అంశాల్లో మేథావులు, యువత, నిపుణులను కలిసి సూచనలు, సలహాలు తీసుకునేందుకే తాను జనంబాట మొదలుపెట్టినట్లు అప్పట్లో కవిత చెప్పారు.

అంతా బాగానే ఉందికాని పంచాయితీ ఎన్నికలో జాగృతి తరపున కవిత అభ్యర్దులను పెడుతున్నారా లేదా అన్నదే అర్ధంకావటంలేదు. నామినేషన్లలో జాగృతి అని ఎక్కడా ఉండదు కాని నామినేషన్లు దాఖలుచేసే వారికి జాగృతి మద్దతు అయితే ఉంటుంది. అలాగే తనసంస్ధను కవిత గ్రామస్ధాయిలో బాగా ప్రచారం చేసుకోవచ్చు, బలోపేతం చేసుకోవచ్చు. జాగృతిని గ్రామస్ధాయిలో బలోపేతం చేసుకోవాలన్నా, తన సత్తా ఏమిటో తెలుసుకోవాలన్నా కవితకు ఇంతకుమించిన అవకాశం మరోటి ఉండదు, రాదు.

అలాంటిది మొదటిదశ నామినేషన్లు వేసిన వారితరపున పార్టీల హడావుడి కనబడుతోంది కాని జాగృతి తరపున హడావుడి టార్చ్ లైట్ వేసి చూసినా ఎక్కడా కనబడటంలేదు. దాంతో పంచాయితీఎన్నికల్లో జాగృతి తరపున ఎవరైనా పోటీచేస్తున్నారా లేదా అన్నదే అర్ధంకావటంలేదు. రాజకీయాల్లో జాగృతి చాలా కీలకమైన పాత్ర పోషించబోతోందని, కాంగ్రెస్ ప్రభుత్వానికి అసలైన ప్రతిపక్షంగా జాగృతి మాత్రమే నిలుస్తోందని కవిత పదేపదే చెప్పుకోవటమే కాని చేతల్లో మాత్రం చూపించటంలేదు. కవిత చెబుతున్నదే నిజమైతే పంచాయితి ఎన్నికల్లో జాగృతి జాడ కనబడాలి కదా ? ఎక్కడా కనబడటంలేదే.

ఆమధ్య జరిగిన సింగరేణి గుర్తింపుసంఘం ఎన్నికల్లో జాగృతి పోటీచేయలేదు. ఈమధ్యనే జరిగిన జూబ్లీహిల్స్ అసెంబ్లీ ఉపఎన్నికలకు కూడా కవిత దూరంగానే ఉండిపోయారు. జరిగిన రెండుఎన్నికలకు దూరంగా ఉన్నారంటే అర్ధంచేసుకోవచ్చు. మరిపుడు మొదలైన పంచాయితీ సమరానికి కూడా దూరంగా ఉండటంలో అర్ధమేంటి ? అన్నదే అర్ధంకావటంలేదు. పోటీచేసినా గెలుపు అవకాశాలు ఉండవని అనుకున్నారా ? లేకపోతే జాగృతి మద్దతుతో పోటీచేయటానికి నేతలెవరూ ముందుకు రావటంలేదా ?