తెలంగాణను తీవ్రమైన చలిగాలులు వణికిస్తున్నాయని వాతావరణశాఖ హైదరాబాద్ కేంద్రం సీనియర్ శాస్త్రవేత్త డాక్టర్ ఎ ధర్మరాజు వెల్లడించారు. డిసెంబర్ 31 నాటికి తెలంగాణాలో చలిగాలులు తీవ్రం కానున్నాయని ఆయన తేలిపారు.ఉత్తర తెలంగాణ జిల్లాల్లో ఉష్ణోగ్రతలు 10డిగ్రీల సెల్సియస్ కంటే తక్కువగా ఉష్ణోగ్రతలు పడిపోయే అవకాశం ఉందని ఆయన పేర్కొన్నారు. దిత్యా తుపాను వల్ల ఆకాశం మేఘావృతమై ఉండటంతో ఉష్ణోగ్రతలో గణనీయమైన తగ్గుదల ఉంటుందని ఐఎండీ తెలిపింది. ఈ ఏడాది డిసెంబర్ 31వతేదీన తెలంగాణ ప్రజలు తీవ్రమైన చలి మధ్య నూతన సంవత్సరాన్ని జరుపుకోనున్నారు. భారత వాతావరణ శాఖ (IMD) అంచనా ప్రకారం డిసెంబర్ చివరి వారంలో ఉష్ణోగ్రతలు గణనీయంగా తగ్గుతాయి. ఈ ఉష్ణోగ్రతలు వచ్చే ఏడాది జనవరి 3 లేదా 4, 2026 వరకు కొనసాగే అవకాశం ఉందని ఐఎండీ అధికారులు చెప్పారు.
చలిగాలుల ప్రభావం
డిసెంబర్ నెలాఖరులో తెలంగాణ రాష్ట్రంలో తీవ్రమైన చలిగాలులు వీచే అవకాశం ఉందని దీని వల్ల ఆదిలాబాద్‌లో 10 డిగ్రీల సెల్సియస్ కంటే తక్కువ ఉష్ణోగ్రతలు నమోదయ్యే అవకాశం ఉందని హైదరాబాద్ ఐఎండీ హెడ్ డాక్టర్ కె.నాగరత్న ‘ఫెడరల్ తెలంగాణ’కు చెప్పారు. తెలంగాణ రాష్ట్రంలో ఉష్ణోగ్రతలు తగ్గాయి. తెలంగాణ డెవలప్‌మెంట్ ప్లానింగ్ సొసైటీ ప్రకారం సంగారెడ్డి జిల్లాలోని కోహిర్‌లో అత్యల్ప కనిష్ఠఉష్ణోగ్రత 7.8 డిగ్రీల సెల్సియస్ నమోదైంది. కుమురం భీమ్ ఆసిఫాబాద్‌లోని సిర్పూర్ లో 8.3, 9.2 భీమ్‌పూర్ లో9.2, ఆదిలాబాద్, వికారాబాద్‌లో 9.5 డిగ్రీల సెల్సియస్ సింగిల్-డిజిట్ ఉష్ణోగ్రతలు నమోదయ్యాయి.
హైదరాబాద్ నగరంలో ఆదివారం తెల్లవారుజామున పొగమంచు కమ్ముకుంది. పొగమంచు ప్రభావం వల్ల రోడ్లపై వాహనాల రాకపోకలకు తీవ్ర అంతరాయం ఏర్పడింది. దిత్వా తుపాన్ ప్రభావం వల్ల తెలంగాణలో చలి గాలుల ప్రభావం పెరిగింది. ఉష్ణోగ్రతలు తగ్గుముఖం పట్టాయి. హైదరాబాద్ నగరంతోపాటు శివారు ప్రాంతాల ప్రజలను చలి వణికించింది. కుత్బుల్లాపూర్, అల్వాల్, ధూలపల్లి, దుండిగల్, కొంపల్లి, డెయిరీ ఫాం రోడ్డు, కౌకూర్, గ్రీన్ హిల్స్, పటాన్ చెరు, బీహెచ్ఈఎల్, సెంట్రల్ యూనివర్శిటీ, తెల్లాపూర్, ఈసీఐఎల్, నారపల్లి ప్రాంతాల్లో ఉష్ణోగ్రతలు పడిపోయాయి. చలిగాలులతో ప్రజలు వణికిపోయారు.
సింగిల్ డిజిట్ కు చేరిన ఉష్ణోగ్రతలు
దిత్వా తుపాన్, చలిగాలుల ప్రభావం వల్ల తెలంగాణలోని పలు ప్రాంతాల్లో ఆదివారం ఉదయం ఉష్ణోగ్రతలు సింగిల్ డిజిట్ కు చేరుకున్నాయని వాతావరణశాఖ సీనియర్ శాస్త్రవేత్త ఎ ధర్మరాజు ‘ఫెడరల్ తెలంగాణ’కు చెప్పారు. ఆదిలాబాద్ లో ఆదివారం 8.2 డిగ్రీల సెల్సియస్ ఉష్ష్రోగత నమోదైంది. కొమురం భీం ఆసిఫాబాద్ జిల్లాలో 8.3 డిగ్రీల సెల్సియస్, వికారాబాద్ లో 9.5, కామారెడ్డిలో 9.7 డిగ్రీల సెల్సియస్ ఉష్ణోగ్రత నమోదైంది.
తేలికపాటి నుంచి మోస్తరు వర్షాలు
దిత్వా తుపాన్ ప్రభావం వల్ల తెలంగాణలోని కొన్ని జిల్లాల్లోద ఆదివారం నుంచి మూడు రోజుల పాటు తేలిక పాటి నుంచి ఓ మోస్తరు వర్షాలు కురుస్తాయని భారత వాతావరణ శాఖ హైదరాబాద్ కేంద్రం సీనియర్ శాస్త్రవేత్త డాక్టర్ ఎ ధర్మరాజు ‘ఫెడరల్ తెలంగాణ’కు చెప్పారు. ఖమ్మం, నల్గొండ, సూర్యాపేట, నాగర్ కర్నూల్ జిల్లాల్లో అక్కడక్కడ వర్షాలు కురిసే అవకాశముందని ఆయన పేర్కొన్నారు. దిత్వా తుపాన్ బలహీనపడింది.ఈ తుపాను వల్ల ఏర్పడిన మేఘాల కారణంగా తెలంగాణ అంతటా ఆదివారం పగటి ఉష్ణోగ్రతలు గణనీయంగా తగ్గాయి.గత కొన్ని సంవత్సరాల్లో ఎన్నడూ లేని విధంగా స్థిరమైన చలి వాతావరణం ఏర్పడింది. ఉత్తరాది ప్రాంతాల నుంచి చలిగాలులు వీస్తున్నాయి. ఖమ్మం, సూర్యాపేట, నల్గొండ, భద్రాద్రి కొత్తగూడెం ప్రాంతాల్లో ఆదివారం నుంచి సోమవారం వరకు అక్కడక్కడ చెదురుమదురు వర్షాలు కురిసే అవకాశం ఉందని తెలంగాణ వెదర్ మ్యాన్ చెప్పారు.
దిత్వా తుపాను ప్రభావం, ఉత్తరాది గాలుల ప్రవాహం కలసి రాష్ట్రంలో అరుదైన శీతల తరంగాన్ని తీసుకొచ్చాయి.ఉష్ణోగ్రతలు రోజురోజుకూ పడిపోతూ ఉండటంతో తెలంగాణ రాష్ట్రం మొత్తం తీవ్రమైన చలి వలయంలోకి జారుతోంది. జనవరి తొలి వారంలోనే ఈ ప్రభావం ఎక్కువగా ఉంటుందని ఐఎండీ శాస్త్రవేత్తల అంచనా. ఈ పరిస్థితుల్లో వృద్ధులు, చిన్నారులు, రాత్రివేళ బయట తిరిగేవారు ప్రత్యేక జాగ్రత్తలు తీసుకోవడం అత్యవసరం.