మనిషి బతికున్నా సర్టిఫికేట్ చంపేసిందా ?

జీవించున్న మనిషి సర్టిఫికేట్ లో చనిపోయినట్లుంటే అదే ఫైనలా ? ఖమ్మం జిల్లాలో ఒక టీచర్ కు విచిత్రమైన పరిస్ధితి ఎదురైంది. రిటైర్ ఉద్యోగులు ప్రతి ఏడాది లైవ్ సర్టిఫికేట్ అందించాల్సుంటుంది. తాము బతికే ఉన్నామని చెప్పి సంబంధిత బ్యాంకు అధికారులతో సర్టిఫై చేయించి ప్రభుత్వానికి అందించాల్సుంటుంది. నిజానికి ఇదో విచిత్రమైన ప్రక్రియ. ప్రభుత్వ ఉద్యోగులు ట్రెజరీకి వెళ్ళి తాము బతికున్నట్లు నిరూపించుకుంటే సరిపోయేదానికి బ్యాంకు అధికారుల దగ్గర నుండి లైవ్ సర్టిఫికేట్ తీసుకుని దాన్ని ట్రెజరీకో లేకపోతే సంబంధిత సెక్షన్ అధికారికో అందచేయాల్సి రావటమే విచిత్రం.

అయితే తాజా ఘటనలో ఉద్యోగిని కేంద్రప్రభుత్వంలోని ఒక వెబ్ సైట్లో చనిపోయినట్లు రికార్డయ్యింది. సర్టిఫికేట్లో సదరు మనిషి చనిపోయినట్లుగా రికార్డు అయ్యింది కాబట్టి ఇక ఆ మనిషి బతికున్నానని మొత్తుకుంటున్న ఉపయోగం లేకపోతోంది. ఇంతకీ విషయం ఏమిటంటే ఖమ్మంజిల్లా కారేపల్లి మండలం, భాగ్యనగర్ తండాకు చెందిన జర్పుల వీరన్న ములుగు జిల్లాలోని వెంకటాపురం మండలం ఉప్పేడు స్కూలులో టీచర్ గా 2022లో ఎంపికయ్యాడు. వీరన్నవికలాంగుల కోటాలో స్పెషల్ గ్రేడ్ టీచర్ గా ఉద్యోగంచేస్తున్నాడు.

కేంద్రప్రభుత్వం దివ్యాంగులకు యూడీఐడీ కార్డులు జారీచేస్తోంది. వీరన్న గతంలోనే సర్టిఫికేట్ తీసుకన్నాడు. పాత సర్టిఫికేట్ ను అప్ డేట్ చేసుకోవాలనే మెసేజ్ రాగా అప్ డేట్ చేయించుకునేందుకు ఆన్ లైన్ కేంద్రానికి వెళ్ళాడు. పాత ‘సదరమ్’ సర్టిఫికేట్ ను చూపించి అందులోని రిజిస్టర్డ్ నెంబర్ ను ఎంటర్ చేసి వెబ్ సైట్లోకి ఎంటరయ్యాడు. అందులోని వివరాలను చూసి ఒక్కసారిగా షాక్ అయ్యాడు. కారణం ఏమిటంటే వెబ్ సైట్లో తాను మరణించినట్లు చూపిస్తోంది. తనదగ్గరున్న పాత సర్టిఫికేట్లో వివరాలు అన్నీ సవ్యంగానే ఉన్నా వెబ్ సైట్లో మాత్రం తాను చనిపోయినట్లుగా కనబడుతుండటంతో ఏమిచేయాలో టీచర్ కు అర్ధంకాలేదు. వెబ్ సైట్లో మార్పులు చేద్దామని ప్రయత్నిస్తే సాధ్యంకాలేదు.

అందుకని కలెక్టర్ ఆఫీసుకు వెళ్ళి తనసమస్యనంతా చెప్పుకుని వెబ్ సైట్లో వివరాలను సరిగా నమోదుచేయాలని ప్రజావాణి కార్యక్రమంలో విజ్ఞాపనపత్రం ఇచ్చుకున్నాడు. మరి అధికారులైనా వీరన్న విజ్ఞప్తిని మన్నించి జీవించున్నట్లుగా వివరాలను అప్ డేట్ చేస్తారో లేకపోతే సర్టిఫికేట్ ప్రకారం చనిపోయినట్లే అని ఫైనల్ చేస్తారో చూడాలి.