తెలంగాణకు మెస్సీ, ఉప్పల్‌లో భారీ ఈవెంట్

తెలంగాణకు ఫుట్‌బాల్ స్టార్ లియొనాల్ మెస్సీ రానున్నారు. ఆయన రాకతో తెలంగాణ యువ క్రీడాభిమానుల్లో ఉత్సాహం ఉరకలేస్తోంది. ఫుట్‌బాల్‌ చరిత్రలో తనదైన ముద్ర వేసుకున్న లియోనెల్‌ మెస్సీ నగరంలో అడుగుపెట్టబోతున్నాడన్న వార్తతో అభిమానుల్లో సంబరాలు మొదలయ్యాయి. వచ్చే నెల 13న ఉప్పల్‌ స్టేడియంలో మెస్సీ గౌరవార్థం ప్రత్యేకంగా ఓ గ్రాండ్‌ ఈవెంట్‌ నిర్వహించేందుకు ఏర్పాట్లు వేగంగా కొనసాగుతున్నాయి.

మెస్సీ సందర్శనను పురస్కరించుకుని సెలబ్రిటీ ఫుట్‌బాల్ మ్యాచ్‌, ప్రత్యేక సన్మాన కార్యక్రమం, సంగీత విభావరి వంటి కార్యక్రమాలు రోజు పొడవునా సందడి చేయనున్నాయి. భావోద్వేగాలు, క్రీడాస్ఫూర్తి, వినోదం—ఆల్ ఇన్ వన్ ప్యాకేజ్‌గా ఈ ఈవెంట్‌ ఉండబోతోంది. గురువారం నుంచే జొమాటో యాప్‌, వెబ్‌సైట్‌ ద్వారా టికెట్‌ అమ్మకాలు ప్రారంభమయ్యాయి. రూ.1,750 నుంచి రూ.30,000 వరకు వివిధ ధరల్లో టికెట్లను అందుబాటులో ఉంచగా, ఇప్పటికే రూ.2,000, రూ.3,250, రూ.5,000, రూ.7,000, రూ.8,000, రూ.13,500 కేటగిరీలకు మంచి స్పందన లభిస్తోంది.

అత్యధిక ధరైన రూ.30,000 టికెట్‌ కొనుగోలు చేసిన వారికి ప్రత్యేక హాస్పిటాలిటీ, ప్రీమియం అనుభవం వంటి సదుపాయాలు కల్పించనున్నట్లు నిర్వాహకులు తెలిపారు. మెస్సీని ప్రత్యక్షంగా చూడాలన్న ఆశతో అభిమానులు ఆతృతగా ఎదురు చూస్తుండగా, ఈ ఈవెంట్‌ హైదరాబాద్‌ స్పోర్ట్స్ క్యాలెండర్‌లో ప్రత్యేక గుర్తింపు పొందే అవకాశం ఉంది.

కోహ్లీ, గిల్ కూడా..

ఫుట్‌బాల్‌ అభిమానులతో పాటు క్రికెట్‌ ప్రేక్షకులను కూడా రసవత్తరం చేస్తున్న సమాచారాన్ని ఈవెంట్‌ ఆర్గనైజర్లు వెల్లడించారు. లియోనెల్‌ మెస్సీ ఇండియా టూర్‌లో భాగంగా టీమిండియా మాజీ కెప్టెన్‌ విరాట్‌ కోహ్లీ, ప్రస్తుత కెప్టెన్‌ శుభ్‌మన్‌ గిల్‌ కూడా పాల్గొననున్నట్లు ప్రకటించారు. మెస్సీతో కలిసి కోహ్లీ, గిల్‌ ఫ్రెండ్లీ ఎగ్జిబిషన్‌ మ్యాచ్‌ ఆడనున్నారని నిర్వాహకులు తెలిపారు. ఒకే వేదికపై ఈ మూడు దిగ్గజాలను చూడటం అభిమానులకు అరుదైన అవకాశమని చెప్పారు.

మెస్సీ భారత పర్యటన డిసెంబర్‌ 13 నుంచి 15 వరకు కొనసాగనుంది. డిసెంబర్‌ 13 ఉదయం మెస్సీ కోల్‌కతాలోని ఈడెన్‌ గార్డెన్స్‌ను సందర్శించనున్నారు. అదే రోజు సాయంత్రం హైదరాబాద్‌ చేరుకోనున్నారు. డిసెంబర్‌ 14 సాయంత్రం ముంబై వాంఖడే స్టేడియాన్ని సందర్శించగా, డిసెంబర్‌ 15 మధ్యాహ్నం 1 గంటకు ఢిల్లీలోని అరుణ్‌ జైట్లీ స్టేడియంలో పాల్గొననున్నారు. ఈ టూర్‌ వివరాలను మెస్సీ ఇప్పటికే సోషల్‌ మీడియా ద్వారా షేర్‌ చేసినట్లు తెలిసింది.

హైదరాబాద్‌లో మెస్సీ, కోహ్లీ, గిల్ ఒకే వేదికపై నిలవబోతున్నారని తెలిసి అభిమానుల్లో సంబరాలు మొదలయ్యాయి.